គណៈកម្មាធិការស៊ើបអង្កេតរុស្ស៊ី៖ឃាតកម្មសម្លាប់លោក Nemtsov មានការរៀបចំទុកជាមុនយ៉ាងល្អិតល្អន់
នៅក្នុងប្រទេសរស្ស៊ី ជាង ១២ម៉ោង ក្រោយឃាតកម្មសម្លាប់មេបក្សប្រឆំាងលោក Boris Nemtsov ក្បែរវិមានក្រិមឡំាងចំកណ្តាលទីក្រុងម៉ូស្គូមក គណៈកម្មាធិការស៊ើបអង្កេតរុស្ស៊ីទើបបានចេញផ្សាយសេចក្តីជូនដំណឹងមួយដោយបញ្ជាក់ថា ឃាតកម្មសម្លាប់លោក Nemtsov គឺជាឃាតកម្មមួយដែលបានរៀបចំទុកជាមុនយ៉ាងល្អិតល្អន់ជាទីបំផុត។ ដោយឡែក លោកប្រធានាធិបតីរុស្ស៊ីពូទីនក៏បានបញ្ជាក់ជាថ្មីថា រដ្ឋអំណាចនឹងធ្វើអ្វីៗគ្រប់បែបយ៉ាងទំាងអស់ដើម្បីវែកមុខ និងចាប់ជនដៃដល់ទៅកាត់ទោសឲ្យសក្តិសមនឹងទង្វើរបស់ពួកគេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០១
គេនៅមិនដឹងថា តើឃាតកម្មសម្លាប់មេបក្សប្រឆំាងរុស្ស៊ីលោក Boris Nemtsov កាលពីជិតអធ្រាត្រយប់ថ្ងៃសុក្រឆ្លងចូលថ្ងៃសៅរិ៍ ទី២៨ កុម្ភៈបានរៀបចំដោយក្រុមណា និងជនដៃដល់ណាមួយទេ។ តែបើយោងសេចក្តីជូនដំណឹងរបស់គណៈកម្មាធិការស៊ើបអង្កេតរុស្ស៊ីឲ្យដឹងថា ឃាតកម្មសម្លាប់លោក Nemtsov ត្រូវបានរៀបចំទុកជាមុនយ៉ាងល្អិតល្អន់ជាទីបំផុត។ សេចក្តីជូនដំណឹងដដែលបានបញ្ជាក់ថា ទំាងទីកន្លែង និងទំាងពេលវេលាសុទ្ធតែបានជ្រើសរើសទុកជាមុន។ រីឯកំាភ្លើងដែលឃាតករបានប្រើ ជាកំាភ្លើងខ្លី Makarov ដែលប្រើដោយកម្លំាងប៉ូលីស និងទាហានរុស្ស៊ីសព្វថ្ងៃ។ នៅកន្លែងកើតហេតុ ក្រុមអ្នកស៊ើបអង្កេតបានរកឃើញសំបកគ្រាប់កំាភ្លើងចំនួន ៦គ្រាប់ដែលផលិតដោយក្រុមហ៊ុនខុសៗគ្នា។ អ៊ីចឹងហើយបានជាក្រុមអ្នកស៊ើបអង្កេតពិបាកនឹងកំណត់ពីប្រភពដើមនៃគ្រាប់កំាភ្លើងទំាងនោះ។
យ៉ាងណាក៏ដោយ ឃាតកម្មសម្លាប់លោក Boris Nemtsov ត្រូវបានគណៈកម្មាធិការស៊ើបអង្កេតរុស្ស៊ីទាញចេញជាសម្មតិកម្មចំនួន ៣ ទី១ ជាឃាតកម្មនយោបាយផ្ទៃក្នុង ទី២ ជាឃាតកម្មបង្កឡើងដោយពួកអ៊ីស្លាមនិយមជ្រុល ព្រោះថ្មីៗនេះ លោក Nemtsov បានចេញមុខគំាទ្រទស្សនាវដ្តីបារំាង Charlie Hebdo បន្ទាប់ពីទស្សនាវដ្តីថ្លុកកំប្លែងមួយនេះបានរងការវាយប្រហារកាលពីដើមខែមករាកន្លងទៅក្នុងទីក្រុងប៉ារីស និងសម្មតិកម្មទី៣ ជាឃាតកម្មដែលមានជាប់ពាក់ព័ន្ធនឹងវិបត្តិនៅក្នុងប្រទេសអ៊ុយក្រែន ព្រោះកន្លងមក សកម្មជនប្រឆំាងរូបនេះបានអំពាវនាវឲ្យប្រជាជនរស្ស៊ីចុះផ្លូវធ្វើបាតុកម្មប្រឆំាងនឹងការឈ្លានពានរបស់រុស្ស៊ីនៅអ៊ុយក្រែន។
ដោយឡែក ទន្ទឹមនឹងសេចក្តីជូនដំណឹងរបស់គណៈកម្មាធិការស៊ើបអង្កេតរុស្ស៊ី លោកប្រធានាធិបតីរុស្ស៊ីពូទីនក៏បានផ្ញើសារមួយចូលរួមរំលែកទុកជាមួយក្រុមគ្រួសារលោក Boris Nemtsov ដែរ។ នៅសារផ្ញើជូនម្តាយរបស់លោក Nemtsov លោកពូទីនបានថ្លែងថា លោក Nemtsov បានបន្សល់ទុកស្លាកស្នាមសម្រាប់ប្រវត្តិប្រទេសរុស្ស៊ី និងនៅក្នុងជីវិតនយោបាយ ក៏ដូចជានៅក្នុងសង្គម និងសន្យាថា រដ្ឋអំណាចនឹងធ្វើអ្វីៗគ្រប់បែបយ៉ាងទំាងអស់ដើម្បីវែកមុខ និងចាប់ជនដៃដល់ទៅកាត់ទោសឲ្យសក្តិសមនឹងទង្វើរបស់ពួកគេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ