Brexit៖ មនុស្សរាប់ពាន់នាក់ ធ្វើបាតុកម្ម ឲ្យមានការបោះឆ្នោតប្រជាមតិម្តងទៀត
កាលពីថ្ងៃសៅរ៍ទៅ ២០តុលា មានមនុស្សរាប់ពាន់នាក់ មកពីគ្រប់ច្រកល្ហក បានមកជួបជុំគ្នា នៅទីក្រុងឡុង ដើម្បីធ្វើបាតុកម្ម ទាមទារ ឲ្យរដ្ឋាភិបាលអង់គ្លេស រៀបចំការបោះឆ្នោតប្រជាមតិម្តងទៀត ស្តីពីការផ្តាច់ខ្លួនចេញពីសហភាពអឺរ៉ុប។ គួរបញ្ជាក់ថា ប៉ុន្មានខែចុងក្រោយនេះ គំនិតចង់បានការបោះឆ្នោតប្រជាមតិ ជាលើកទី២ ត្រូវបានគេគាំទ្រកាន់តែច្រើន។ តែយ៉ាងណាក៏ដោយ លោកស្រីតេរ៉េហ្សា ម៉េ នាយករដ្ឋមន្ត្រីអង់គ្លេស ធ្លាប់បានបញ្ជាក់ហើយ បញ្ជាក់ទៀត ថាប្រជាមតិមានតែម្តងទេ មិនអាចសើរើលទ្ធផល បោះឆ្នោតម្តងទៀតបានទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២៧
រថយន្តធំៗដឹកអ្នកដំណើរ មានមិនតិចជាង១៥០គ្រឿងទេ ដែលបានធ្វើដំណើរមកពីគ្រប់ទិស ជាយទីក្រុងឡុង ដើម្បីមកចូលរួមបាតុកម្ម ឆ្ពោះទៅកាន់វិមានរដ្ឋសភា កណ្តាលទីក្រុង។ ក្នុងចំណោមមនុស្សរាប់ពាន់នាក់ គេសង្កេតឃើញមានប្រជាជនជនជាតិអឺរ៉ុបផ្សេងទៀត ដែលរស់នៅ និងធ្វើការនៅក្នុងប្រទេសអង់គ្លេស ក៏បានមកចូលរួម ក្នុងបាតុកម្មនេះដែរ។
សូមរំលឹកថា កាលពីខែមិថុនា មានបាតុកម្មស្រដៀងគ្នានេះមួយដែរ ដែលមានមនុស្សចូលរូមប្រមាណ១០ម៉ឺននាក់ នៅទីក្រុងឡុង។ កម្មវត្ថុនៃបាតុកម្ម គឺទាមទារ ឲ្យរដ្ឋាភិបាលអង់គ្លេស រៀបចំការបោះឆ្នោតធ្វើប្រជាមតិជាលើកទី២ ស្តីពីការផ្តាច់ខ្លួនអង់គ្លេស ចេញពីសហភាពអឺរ៉ុប។ បាតុកម្មលើកនេះ ត្រូវបានអ្នករៀបចំ រំពឹងថា នឹងកាន់តែធំ និងលាន់តែកងរំពង ជាងកាលពីលើកមុន ដើម្បីចាប់បង្ខំរដ្ឋាភិបាលអង់គ្លេស ឲ្យស្តាប់ការចង់ទាមទារនេះ។
តំណាងរៀបចំបាតុកម្មនេះ បានលើកឡើងថា ប្រជាជនអង់គ្លេស ប្រមាណ៥២% ដែលបានបោះឆ្នោតគាំទ្រការផ្តាច់ខ្លួនចេញពីសហភាពអឺរ៉ុប ប្រាកដជាគិតសាឡើងវិញ ហើយបោះឆ្នោតខុសពីមុន នៅពេលពួកគេបានឃើញនិងបានយល់ ពីផលអវិជ្ជមាន ដែលកើតចេញពីការចាកចេញពីសហភាពអឺរ៉ុប។ លោក Peter Hancock បាតុករម្នាក់ បានលើកឡើងថា មតិមហាជនអង់គ្លេស ត្រូវបានគេបំពុលក្រោមរូបភាពផ្សេងៗ បានជាមួយភាគធំ បានបោះឆ្នោតគាំទ្រ ការផ្តាច់ខ្លួន។ តែលោកជឿថាមកទល់ពេលនេះ ពួកគេទាំងនោះ បានយល់ និងភ្លឺភ្នែកថា ការចាកចេញពីអឺរ៉ុប គ្មានអ្វីចំណេញទេ គឺមានតែខាត។
ដោយឡែក លោកស្រីតេរ៉េហ្សា ម៉េ នាយករដ្ឋមន្ត្រីអង់គ្លេស បានបញ្ជាក់ កាលពីថ្ងៃពុធកន្លងទៅថា នឹងគ្មានការបោះឆ្នោតប្រជាមតិជាលើកទី២ទេ។ លោកស្រីលើកឡើងថា ប្រជាជនអង់គ្លេសបានសម្រេចរួចហើយ ដូច្នេះរដ្ឋាភិបាលលោកស្រី មានទួនាទីគោរពការសម្រេចចិត្តនេះ ហើយចរចាផ្តាច់ខ្លួនឲ្យបាន។
គួរកត់សំគាល់ថា នៅសល់មិនប្រមាណ៥ខែទៀតទេ គឺដល់ថ្ងៃអង់គ្លេស ត្រូវផ្តាច់ខ្លួនជាស្ថាពរពីសហភាពអឺរ៉ុបហើយ។ ក៏ប៉ុន្តែគេសង្កេតឃើញថា ការចរចានៅនឹងថ្កល់ ដោយមិនដឹងថា ក្រោយផ្តាច់ខ្លួនទៅ ទំនាក់ទំនងរវាងអឺរ៉ុបនិងអង់គ្លេស ត្រូវដើរតាមផ្លូវណានោះទេ។ មានសំណុំរឿងជាច្រើន ដែលនៅជាប់គាំង ជាក់ស្តែងបញ្ហាព្រំដែន រវាងប្រទេសអៀរឡង់ និងតំបន់អៀរឡង់ខាងជើង ដែលជាដីរបស់អង់គ្លេស។ ប្រឈមមុខនឹងដំណើររាំងស្ទះ និយាយមិនចុះសម្រុងគ្នានេះ មានមតិកាន់តែច្រើន ដែលចង់ឲ្យអង់គ្លេសធ្វើប្រជាមតិម្តងទៀត។ យ៉ាងណាមិញ លោកតូនី ប្លែរ អតីតនាយករដ្ឋមន្ត្រីអង់គ្លេស បានចេញមុខគាំទ្រគំនិតនេះ។ ហើយចុងក្រោយថ្មីៗនេះ លោក សាឌីក ខាន់ អភិបាលទីក្រុងឡុងតែម្តង ដែលចេញមុខគាំទ្រ ចង់ឲ្យបោះឆ្នោតប្រជាមតិសាជាថ្មី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ