Brexit៖ សហភាពអឺរ៉ុបនឹងសម្រេចគ្នា រឿងលើកថ្ងៃចាកចេញរបស់អង់គ្លេសម្តងទៀត
ថ្ងៃផ្តាច់ខ្លួនរបស់អង់គ្លេស ចេញពីសហភាពអឺរ៉ុប ដែលបានកំណត់ថានៅថ្ងៃទី៣១ តុលានោះ ទំនងប្រហែលជាត្រូវពន្យាពេលទៅមុខទៀត។ ការពិចារណាស្តីពីការលើកថ្ងៃចាកចេញម្តងទៀតនេះ គឺធ្វើឡើងបន្ទាប់ពីសភាអង់គ្លេស បានបោះឆ្នោតយល់ព្រមទទួលជាគោលការណ៍ នូវកិច្ចព្រមព្រៀងផ្តាច់ខ្លួន ក៏ប៉ុន្តែសភាអង់គ្លេស បានសុំពេលយូរបន្តិច ដើម្បីពិនិត្យកិច្ចព្រមព្រៀងនោះ ឲ្យបានស៊ីជម្រៅ។ នៅថ្ងៃពុធនេះ លោកប្រធានក្រុមប្រឹក្សាអឺរ៉ុប បានជូនដំណឹងទៅកាន់សមាជិកសហភាពអឺរ៉ុបទាំង២៧ប្រទេស ឲ្យពិចារណា ព្រមលើកថ្ងៃចាកចេញរបស់អង់គ្លេសម្តងទៀត។
ចុះផ្សាយនៅថ្ងៃ៖
ស្តាប់ - ០២:១០
កាលកំណត់ថ្ងៃទី៣១តុលា ដែលអង់គ្លេសត្រូវផ្តាច់ខ្លួនចេញពីសហភាពអឺរ៉ុប អាចនឹងត្រូវពន្យា សាជាថ្មីម្តងទៀត។ ថ្វីបើសមាជិកសភាអង់គ្លេស បានបោះឆ្នោតយល់ព្រមជាគោលការណ៍ ក្នុងការទទួលយកកិច្ចព្រមព្រៀងផ្តាច់ខ្លួន ដែលលោកបូរីស ចនសុន និងសហភាពអឺរ៉ុប បានត្រូវរ៉ូវគ្នានោះមែន ក៏ប៉ុន្តែសភា អង់គ្លេស បានសុំពេលវេលាបន្ថែម ដើម្បីពិនិត្យឲ្យបានស៊ីជម្រៅម៉ដ្ឋចត់ លើកិច្ចព្រមព្រៀងកម្រាស់១១០ទំព័រនេះ។
យ៉ាងណាមិញ ការសម្រេចរបស់សភាអង់គ្លេស កាលពីថ្ងៃអង្គារនេះ ត្រូវបានបណ្តាញសារព័ត៌មានអង់គ្លេសមួយចំនួន សរសេរសើចចំអក ព្រោះវាបានបង្ហាញពីភាពច្រេមច្រុម ស្ទាក់ស្ទើរមិនចេះដាច់ស្រេច របស់សមាជិកសភាអង់គ្លេស ដែលបោះឆ្នោតយល់ព្រមហើយ តែទន្ទឹមនឹងនេះបែរជាសុំពេលពិចារណាបន្ថែមទៀត។
ក្រោយលទ្ធផលឆ្នោតរបស់សភាអង់គ្លេស លោក ដូណាល់ ទូស្គ ប្រធានក្រុមប្រឹក្សាអឺរ៉ុប បានបញ្ជាក់ថា លោកបានស្នើទៅកាន់សមាជិកទាំង២៧ប្រទេសរបស់សហភាពអឺរ៉ុប ឲ្យពិចារណា យល់ព្រមពន្យាពេលថ្ងៃចាកចេញជាថ្មីម្តងទៀត។ ក៏ប៉ុន្តែលើកនេះ គឺធ្វើតាមរយៈនីតិវិធីសរសេរលាយលក្ខន៍អក្សរ ដោយមិនចាំបាច់ជួបប្រជុំគ្នា បើកជំនួបកំពូលជាពិសេសទេ។
សូមបញ្ជាក់ថា លោក បូរីស ចនសុន នាយករដ្ឋមន្ត្រីអង់គ្លេស បានស្នើកាលពីថ្ងៃសៅរ៍សប្តាហ៍មុន ដោយសុំពន្យាថ្ងៃចាកចេញ រហូតដល់៣ខែទៀត ពោលគឺនៅថ្ងៃទី៣១មករា ឆ្នាំ២០២០។ បើផ្អែកតាមមន្ត្រីសហភាពអឺរ៉ុប បានឲ្យដឹងថា នៅថ្ងៃពុធនេះតំណាងអង្គទូតនៃប្រទេសទាំង២៧ប្រចាំនៅសហភាពអឺរ៉ុប ត្រូវជួបប្រជុំគ្នា ដើម្បីជជែកពីការលើកពេលនៃថ្ងៃចាកចេញនេះ។ តែយ៉ាងណា មានមតិជាច្រើនបានលើកឡើងថា រយៈពេលនៃការពន្យា គឺសមាជិកសហភាពអឺរ៉ុប ជាអ្នកសម្រេចថាប៉ុន្មានទើបសក្តិសម។
លោកប្រធានក្រុមប្រឹក្សាអឺរ៉ុប ធ្លាប់បានលើកឡើងថា ពន្យាពេល៣ខែទៀត គឺយូរណាស់។ លោកបញ្ជាក់ថា ការពន្យាលើកនេះ គឺជាការពន្យាដែលមានលក្ខណៈបច្ចេកទេស ដើម្បីឲ្យសភាអង់គ្លេស អាចមានពេលពិនិត្យឲ្យបានស៊ីជំរៅលើកិច្ចព្រមព្រៀងផ្តាច់ខ្លួនតែប៉ុណ្ណោះ។ ដូចគ្នាដែរ តំណាងរដ្ឋាភិបាលបារាំង បានលើកឡើងថា ការពន្យាលើកនេះ អាចធ្វើបានត្រឹមប៉ុន្មានថ្ងៃតែប៉ុណ្ណោះ ដោយចៀសវាងយ៉ាងណា កុំឲ្យភាគីអង់គ្លេសកិកកុក ចង់ចរចាសើររើកិច្ចព្រមព្រាងសាជាថ្មី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ