ការប្រែប្រួលអាកាសធាតុនឹងគំរាមកំហែងដល់ជីវិតសត្វ និងរុក្ខជាតិក្នុងសមុទ្រ
ការប្រែប្រួលអាកាសធាតុ មិនត្រឹមគំរាមកំហែងជីវិតមនុស្ស និងសត្វលើគោក ប៉ុន្តែ វាជាគ្រោះថ្នាក់មួយដែរសម្រាប់រាល់ជីវិតនៅក្នុងសមុទ្រ។ តាមក្រុមអ្នកស្រាវជ្រាវអន្តរជាតិ ដែលបានបង្ហាញរបាយការណ៍ សិក្សា មួយ នៅក្រុងប៉ារីស កាលពីថ្ងៃព្រហស្បតិ៍ អាកាសធាតុប្រែប្រួល កំពុងធ្វើឲ្យទឹកសមុទ្រឡើងក្តៅ និងសំបូរជាតិអាស៊ីដច្រើនជាងមុន។ ទឹកសមុទ្រក្តៅ និងសំបូរជាតិអាស៊ីដនឹងគំរាមកំហែងដល់ការរស់រានមានជីវិតរបស់ពពួកសត្វ សមុទ្រ និងផ្កាថ្ម ដែលដើរតួសំខាន់ ជាជញ្ជាំង ទប់មិនឲ្យមានរលកធំៗ វាយបោកទៅឆ្នេរ។
ចុះផ្សាយនៅថ្ងៃ៖
ស្តាប់ - ០១:៥៨
ការប្រែប្រួលអាកាសធាតុ នឹងមានផលប៉ះពាល់ទៅលើមហាសមុទ្រ ក៏ពិតមែនហើយ ប៉ុន្តែ វានឹងមិនសូវធ្ងន់ធ្ងរខ្លាំង បើសិន កំដៅនៃផែនដីមិនឡើងខ្ពស់ជាង ២អង្សារសេ។ នេះជាការសន្និដ្ឋានរបស់ក្រុមអ្នកវិទ្យាសាស្រ្តអន្តរជាតិមួយក្រុម នៅក្នុងសន្និសីទមួយ រៀបចំ កាលពីថ្ងៃព្រហស្បតិ៍ម្សិលមិញ ក្នុងក្រុងប៉ារីស។ គំនិតប៉ងរបស់អ្នកវិទ្យាសាស្រ្តមានតែមួយ គឺចង់ជំរុញឲ្យសន្និសីទអង្គការសហប្រជាជាតិ ស្តី ពីអាកាសធាតុ ក្នុងក្រុងប៉ារីស អាចសម្រេចចេញបាននូវកិច្ចព្រមព្រៀងមួយ ដើម្បីកាត់បន្ថយការឡើងកំដៅនៃផែនដី នៅត្រឹម ២អង្សារសេ។
ជោគវាសនារបស់មនុស្សលោក គឺពឹងអាស្រ័យទៅលើអនាគតរបស់មហាសមុទ្រ។ នេះការបញ្ជាក់របស់អ្នកវិទ្យាសាស្រ្តបារាំង លោកAlexandre Magnan អ្នកនិពន្ធម្នាក់របស់របាយការណ៍ ដែលមានឈ្មោះថា គំនិតផ្តួចផ្តើម មហាសមុទ្រ ឆ្នាំ ២០១៥។ តាម អ្នកវិទ្យាសាស្រ្តបារាំង ការប្រែប្រួលអាកាសធាតុនឹងធ្វើឲ្យផែនដីឡើងកំដៅ និងសំបូរជាតិអាស៊ីដ ដែលនឹងគំរាមកំហែងបន្តទៅលើជីវិតប្រព័ន្ធជីវចម្រុះក្នុងសមុទ្រ ដូចជាសត្វសមុទ្រ ផ្កាថ្ម និងព្រៃកោងកាង ជាដើម។
មហាសមុទ្រដែលគ្របដណ្តប់បីភាគបួន នៃផែនដី បានដើរតួនាទីយ៉ាងសំខាន់ ជួយទប់ទល់ មិនឲ្យភពផែនដីឡើងកំដៅ។ គឺមហាសមុទ្រនេះឯងដែលបានស្រូបយកមួយផ្នែកនៃថាមពល និងឧស្ម័នកាបូនិច ដែលជាឧស្ម័នផ្ទះកញ្ចក់ ប្រភពនៃការឡើងកំដៅនៃភពផែនដី។ តាមអ្នកវិទ្យាសាស្រ្ត ទឹកសមុទ្រឡើងក្តៅ មិនត្រឹមគំរាមកំហែងជីវិតសត្វ និងរុក្ខជាតិក្នុងសមុទ្រ ប៉ុន្តែ ទឹកសមុទ្រក្តៅ នឹងស្រូបឧស្ម័នកាបូនិច បានកាន់តែតិចដែរ។
តាមអ្នកស្រាវជ្រាវខាងលើ បើសិនឧស្ម័នផ្ទះកញ្ចក់កើនឡើងខ្លាំង ដែ ភាគច្រើននៃជីវិតក្រោមសមុទ្រនឹងរងខូចខាតធ្ងន់ធ្ងរ។ គេបានប្រមើលមើលឃើញថា ទឹកសមុទ្រឡើងក្តៅ នឹងធ្វើសត្វសមុទ្រ ផ្លាស់ទី ចេញពីតំបន់ត្រូពិច និងបំផ្លាញប្រព័ន្ធជីវចម្រុះ ដូចជាផ្កាថ្មដែលជាជញ្ជាំងទប់កុំឲ្យមានរលកធំវាយបោកទៅលើឆ្នេរ។ ជាលទ្ធផល គឺផលនេសាទ និងវិស័យទេសចរណ៍ដែលនឹងការគំរាមកំហែងខ្លាំងពីការប្រែប្រួលអាកាសធាតុ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ