អាជ្ញាធរបារាំងកំពុងវក់វីរកយន្តហោះដ្រូនដែលហោះឆ្វែលលើទីតាំងសំខាន់ៗក្នុងក្រុងប៉ារីស
រដ្ឋធានីប៉ារីសត្រូវបានយន្តហោះដ្រូន ដែលគេមិនស្គាល់ប្រភព ហោះ ឆ្វែលពីលើ ២ យប់ជាប់គ្នា នារាត្រីថ្ងៃចន្ទ និងថ្ងៃអង្គារដើមសប្តាហ៍នេះ។ ប៉ូលិសបារាំងកំពុងបើកការស៊ើបអង្កេត ស្វែងរកមុខអ្នកបញ្ជាយន្តហោះដ្រូន ដើម្បីចង់ដឹងពីគោលបំណងរបស់ម្ចាស់យន្តហោះដ្រូន។ នៅថ្ងៃពុធម្សិលមិញ ប៉ូលិសបានចាប់ឃាត់ខ្លួនអ្នកកាសែតបីនាក់របស់ទូរទស្សន៍ អារ៉ាប់ Al Jazeera ដែលបានបញ្ជាយន្តហោះដ្រូនថតព្រៃក្បែរក្រុងប៉ារីស។ តាមប៉ូលិស អ្នកកាសែតទាំងបីគ្មានជាប់ពាក់ព័ន្ធនឹងករណីយន្តហោះដ្រូនដែលហោះលើក្រុងប៉ារីស កាលពីរាត្រីថ្ងៃចន្ទ និងថ្ងៃអង្គារទេ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៤៤
យន្តហោះដ្រូន គ្មានមនុស្សបើក បានហោះពីលើរដ្ឋធានីប៉ារីស ពីរយប់ជាប់គ្នា។ តាមប៉ូលិសបារាំង នៅយប់ថ្ងៃអង្គារ យន្តហោះដ្រូនបានហោះយ៉ាងតិច៥ ដង ពីលើទីតាំងសំខាន់ៗរបស់រដ្ឋធានី ដែលមានតាំងពីរដ្ឋសភា និងនៅលើទីប្រជុំជនរបស់អ្នកទេសចរ ក្បែរអគារTour Eiffel។ កាលពីថ្ងៃចន្ទ វិមានប្រធានាធិបតីបារាំង និងស្ថានទូតអាមេរិកាំងក្នុងទីក្រុងប៉ារីស ដែលស្ថិតនៅមិនឆ្ងាយពីគ្នាប៉ុន្មាន ក៏ត្រូវយន្តហោះដ្រូន មិនស្គាល់ប្រភពហោះឆ្វែលពីលើដែរ។ តាមប៉ូលិស គេអាចចាប់សញ្ញាយន្តហោះដ្រូន ហោះលើក្រុងប៉ារីស បានដោយមកពីមានវត្តមានរបស់យោធា និងកងកម្លាំងរក្សាសន្តិសុខបារាំង ដែលត្រូវបានពង្រាយជាច្រើនម៉ឺននាក់ នៅក្នុងទីក្រុងប៉ារីស នៅក្រោយអំពើភេរវកម្ម របស់ក្រុមជីហាត នៅដើមខែមករា។
តំាងពីយប់ថ្ងៃអង្គារ រដ្ឋអាជ្ញាបារាំងបានបញ្ជារឲ្យកងអាវុធហត្ថ ទទួលបន្ទុកសន្តិសុខក្នុងអាកាស ស៊ើបអង្កេតរកប្រភពអ្នកបញ្ជាយន្តហោះដ្រូន ព្រោះថា ការបង្ហោះយន្តហោះ ដោយគ្មានសុំការអនុញ្ញាតិ គឺជារឿងខុសច្បាប់។
តើអ្វីជាបំណងរបស់អ្នកបញ្ជាយន្តហោះដ្រូន នៅលើទីតាំងរសើបៗរបស់រដ្ឋបារំាង? តើគេបង្ហោះយន្តហោះដ្រូន ដើម្បីគ្រាន់តែការសាកល្បងសមត្ថភាព របស់ម៉ាស៊ីន ឬក៏ដើម្បីចង់ថតរូបពីលើទីក្រុងប៉ារីសនាពេលរាត្រី? វាអាចទេដែលថា ជនខិលខូចអាចប្រើយន្តហោះដ្រូនដើម្បីកត់ចំណាំលើទីតាំង ដើម្បីអាចធ្វើសកម្មភាពឧក្រិដ្ឋ នៅពេលក្រោយ? ឬមួយក៏យន្តហោះដ្រូនត្រូវពួកសកម្មជនតស៊ូមតិបង្ហោះឡើង ដើម្បីបរិហារពីចន្លោះខ្វះខាត ខាងផ្នែករក្សាសន្តិសុខរបស់អាជ្ញាធរបារាំង? រហូតមកដល់ម៉ោងនេះ ការស៊ើបអង្កេតមិនទាន់បានផ្តល់ពន្លឺអ្វីសោះ។ មានន័យថា ប៉ូលិសបារាំងនៅតែមិនទាន់ដឹងច្បាស់ពីមូលហេតុ និងមុខមាត់ពិតប្រាកដរបស់អ្នកបញ្ជាយន្តហោះដ្រូនលើក្រុងប៉ារីសនៅឡើយ។
នេះមិនមែនជាលើកទីមួយទេ ដែលអាជ្ញាធរបារាំងហាក់គ្មានសមត្ថភាពសម្រាប់ទប់ទល់នឹងការឈ្លានពានរបស់យន្តហោះដ្រូន ឧបករណ៍បច្ចេកវិទ្យាទាន់សម័យ នាពេលបច្ចុប្បន្ននេះ។ កាលពីចុងឆ្នាំមុន គេចាប់បានសញ្ញាហោះរបស់យន្តហោះដ្រូន នៅលើទីតាំងរោងចក្រនុយក្លេអ៊ែរចំនួន ១៣ ក្នុងចំណោម១៩កន្លែងរបស់បារាំង។ ចុងខែមករា យន្តហោះដ្រូនត្រូវបានគេរកឃើញហោះពីលើវិមានប្រធានាធិបតីបារាំង និងលើទីតាំងដែលមានការការពារសន្តិសុខដ៏តឹងបំផុត គឺមូលដ្ឋានទ័ពជើងទឹក នៅភាគពាយ័ព្យ ដែលនៅទីនោះ មាននាវាមុជទឹកបារំាង ដែលបំពាក់ដោយអាវុធនុយក្លេអ៊ែរ។ អ្នកជំនាញខ្លះបានលើកឡើងថា យន្តហោះដ្រូនដែលតូចស្រាល មិនអាចបង្កគ្រោះថ្នាក់ព្រោះវាមិនអាចមានសមត្ថភាពដឹកជញ្ជូនគ្រាប់ផ្ទុះបាន។ ប៉ុន្តែ អាជ្ញាធរបារាំង វិញមិនបានចាត់ទុកវត្តមានយន្តហោះដ្រូនថា ជារឿងលេងសើច។ មេបញ្ជាការកងទ័ពជើងអាកាសបារាំងធ្លាប់និយាយថា យន្តហោះដ្រូនហោះជារឿងសំខាន់។ វាអាចជាគ្រោះថ្នាក់ ដែលគេមិនត្រូវធ្វេសប្រហែស ព្រោះវាអាចជាមុខសញ្ញាគំរាមកំហែង ដែលអាចរីកធំ ទៅថ្ងៃអនាគត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ