ល្បែងគ្រោះថ្នាក់របស់សហភាពអឺរ៉ុប ជាមួយកិច្ចព្រមព្រៀងពាណិជ្ជកម្មសេរីCETA និងTAFTA
ចុះផ្សាយនៅថ្ងៃ៖
ស្តាប់ - ០៦:៣៩
កាលពីថ្ងៃអាទិត្យ ទី៣០ តុលា កាណាដា និងសហភាពអឺរ៉ុប បានសម្រេចចិត្តចុះហត្ថលេខា លើកិច្ចព្រមព្រៀងសេដ្ឋកិច្ច និងពាណិជ្ជកម្មរួម ហៅកាត់ថា CETA។ ចុះហត្ថលេខារួចរាល់មែន តែឧបសគ្គ នៅមានវែងឆ្ងាយតទៅទៀត មុននឹងកិច្ចព្រមព្រៀងនេះ ចូលជាធរមានបាន ដោយត្រូវឆ្លងកាត់ការផ្តល់សច្ចាប័ន ដោយសភាតំណាងតាមបណ្តាប្រទេសសមាជិកអឺរ៉ុប។ ស្របពេលដែលវាសនានៃកិច្ចព្រមព្រៀងពាណិជ្ជកម្មសេរី អឺរ៉ុប-កាណាដា -នៅតែមិនទាន់ច្បាស់ ចំណែកគម្រោងកិច្ចព្រមព្រៀងពាណិជ្ជកម្មសេរី រវាងអឺរ៉ុប និងសហរដ្ឋអាមេរិក ឯនោះវិញ កាន់តែគ្មានសង្ឃឹង ថាបានសម្រេច។ មតិសាធារណៈ ដែលនឿយណាយនឹងវិបត្តិសង្គមគ្រប់យ៉ាងនៅអឺរ៉ុប ហាក់លែងចង់ស្តាប់ហេតុផលរបស់ថ្នាក់ដឹកនាំសហភាពអឺរ៉ុប ដែលព្យាយាមការពារកិច្ចព្រមព្រៀងទាំងពីរនេះ។
បើទោះបីជាមានការតវ៉ា និងឧបសគ្គជាច្រើនជំពូក ទីបំផុតទៅកិច្ចព្រមព្រៀងពាណិជ្ជកម្មសេរី រវាងសហភាពអឺរ៉ុប និងកាណាដា ហៅកាត់ថា CETA ត្រូវបានចុះហត្ថលេខាហើយ។ ថ្នាក់ដឹកនាំអឺរ៉ុបខិតខំអះអាងថា តម្លៃនិងគោលការគ្រិះនៃទីផ្សារសហភាពអឺរ៉ុប នឹងមិនត្រូវបានបន្ទាបបន្ថោក ដោយសារកិច្ចព្រមព្រៀងនេះទេ។ ក្រិត្យក្រមបរិស្ថាន គុណភាពទំនិញ និងការគោរពសិទ្ធិការងាររបស់បុគ្គលិក ដែលផលិតផលិតផលទាំងនោះ នៅតែជាតំលៃរួម ដែលសហភាពអឺរ៉ុបការពារដដែល។
ចុះហត្ថលេខា មែន តែឧបសគ្គនៅមានច្រើនសម្រាប់CETA៖
ប៉ុន្តែសម្រាប់មតិអ្នកប្រឆាំងមួយចំនួន កិច្ចព្រមព្រៀងនេះ នឹងធ្វើឲ្យសហភាពអឺរ៉ុប ពោលគឺប្រទេសសមាជិកសហភាពអឺរ៉ុបខាតប្រយោជន៍ ច្រើនជាងចំណេញ។ ខាតប្រយោជន៍ គឺដោយសារ នៅអឺរ៉ុបទំនិញចរាចរណ៍ ត្រូវគោរពលក្ខខណ្ឌស្តង់ដារច្រើនវិស័យ ខុសពីទំនិញរបស់កាណាដា។ ការបណ្តោយឲ្យទំនិញ រឺផលិតផលកាណាដា នាំចូលដោយសេរីមកក្នុងអឺរ៉ុប គឺមិនខុសពីយករបស់មានតំលៃ ទៅប្តូរជាមួយវត្ថុគ្មានគុណភាព ហើយទីបំផុតកសិករ និងសិប្បករអឺរ៉ុបទេ ដែលជាអ្នកផ្កាប់ឆ្នាំងបាយ ដោយសារតែលក់លែងដាច់។
ជាងនេះទៅទៀត កិច្ចព្រមព្រៀងនេះ គ្រាន់តែជាឈ្នាន់សម្រាប់ឲ្យក្រុមហ៊ុនអាមេរិកមួយចំនួនធំ ដែលមានសាខានៅកាណាដា អាចស្រូបយកផលប្រយោជន៍ពីទីផ្សារអឺរ៉ុបតែប៉ុណ្ណោះ។ ក្នុងកំឡុងពេលដែលអាមេរិក និងសហភាពអឺរ៉ុប មិនទាន់មានកិច្ចព្រមព្រៀងពាណិជ្ជកម្មសេរីនឹងគ្នា ក៏មិនចោទជាបញ្ហា ព្រោះក្រុមហ៊ុនអាមេរិក អាចទៅបង្កើតសាខានៅកាណាដា ហើយនាំទំនិញចូលអឺរ៉ុប ជាការសេ្រច។ សកម្មជនប្រឆាំងនឹង សន្ធិសញ្ញាពាណិជ្ជកម្មនេះ បានធ្វើការឃោសនាតាមបណ្តាញសង្គម ដោយខ្លះសរសេរថា “តើបងប្អូនចង់ហូបសាច់មាន់ សាច់គោចាក់ថ្នាំគីមី នាំចូលពីកាណាដា និងពីអាមេរិកទេ?”
សូមបញ្ជាក់ថា កិច្ចព្រមព្រៀង សេដ្ឋកិច្ចពាណិជ្ជកម្មសេរី អឺរ៉ុប កាណាដានេះ មានចែងជាច្រើនជំពូក ដែលជារួមគឺដើម្បីកាត់បន្ថយនូវឧបសគ្គនានា រវាងភាគីទាំងពីរ ដែលអាចរារាំងដល់ការនាំចេញនាំចូល នៃផលិតផលរៀងខ្លួន។ វិស័យទាំងនោះមានដូចជា វិស័យពន្ធដា សេវាហិរញ្ញវត្ថុ ការទទួលស្គាល់ស្តងដារទំនិញគ្នាទៅវិញទៅមក ការកំណត់វិធានលើការការពារសិទ្ធិលើផលិតផលភូមិសាស្រ្តផ្តាច់មុខ និងកិច្ចសន្យាទីផ្សារសាធារណៈជាដើម។
ប៉ុន្តែចំណុចសំខាន់ដែលមានចែងក្នុងកិច្ចព្រមព្រៀងនេះ ហើយដែលជាប្រភពនៃការតវ៉ា រិះគន់ដ៏ខ្លាំងក្លានោះ គឺចំណុចដែលទាក់ទងនឹងនិតីវិធីដោះស្រាយវិវាទពាណិជ្ជកម្ម ដោយការចរចា តាមរយៈការតែងតាំងអាជ្ញាកណ្តាល និងចៅក្រមឯករាជ ដែលក្រុមហ៊ុនជាប់វិវាទ ជាអ្នកជ្រើសរើស។ សម្រាប់ប្រជាជនអឺរ៉ុប ដែលមានវប្បធម៌ប្រពៃណី គោរពអំណាចតុលាការយ៉ាងខ្ជាប់ខ្ជួន តាំងពីរាប់សតវត្សមកហើយនោះ នីតិវិធីនេះ គឺមិនខុសពីការដែលសហភាពអឺរ៉ុប បណ្តោយឲ្យក្រុមហ៊ុនឯកជនរបស់កាណាដា មកទះកំផ្លៀងប្រព័ន្ធយុត្តិធម៌របស់ប្រទេសអឺរ៉ុបនោះទេ។
យ៉ាងណាក៏ដោយ ថ្វីបើកិច្ចព្រមព្រៀងនេះត្រូវបានចុះហត្ថលេខាមែនពិត តែនៅឧបសគ្គជាច្រើនទៀត ដែលនឹងមកដល់ មុននឹងវាចូលជាធរមាន។ កិច្ចព្រមព្រៀងនេះ អាចត្រូវបានអនុវត្តមួយផ្នែកតែប៉ុណ្ណោះ ក្នុងដំណាក់កាលដំបូង បន្ទាប់ពីសភាអឺរ៉ុប និងសភាកាណាដា បោះឆ្នោតទទួលយក។ បន្ទាប់មកទៀត តាមច្បាប់ កិច្ចព្រមព្រៀងនេះ នឹងត្រូវយកទៅដេញដោលដើម្បីផ្តល់សច្ចាប័ន ដោយសភាតំបន់ និងសភាជាតិនៃប្រទេសសមាជិកអឺរ៉ុប សរុបទាំងអស់ចំនួន៣៨សភា មុននឹងចូលជាធរមាន ជាផ្លូវការ។ ការនេះ អាចត្រូវការពេលវេលាច្រើនឆ្នាំ។ យើងបានឃើញបទពិសោធន៍សភាតំបន់ Wallonie របស់ប៊ែលហ្សិក រួចមកហើយ កាលពីសប្តាហ៍មុន ដែលបានធ្វើការប្រឆាំងដាច់អហង្ការ ទៅនឹងកិច្ចព្រមព្រៀងCETA នេះ ។ ចុះទំរាំដល់ទៅឆ្លងកាត់សភា ដល់ទៅ៣៨ទៀត នោះនឹងទៅជាយ៉ាងណា។
TAFTAស្លាប់បាត់ទៅហើយ៖
កិច្ចព្រមព្រៀងពាណិជ្ជកម្មសេរីជាមួយកាណាដា ហៅកាត់ថាCETA នេះ គ្រាន់តែជាកិច្ចព្រមព្រៀងតូចមួយទេ។ កិច្ចព្រមព្រៀងដ៏មហិមាមួយទៀត ដែលអឺរ៉ុបកំពុងចង់ធ្វើនោះ គឺកិច្ចព្រមព្រៀងពាណិជ្ជកម្មសេរីជាមួយសហរដ្ឋអាមេរិក ដែលហៅកាត់ថា TTIP¨ រឺTAFTA។ សម្រាប់ក្រុមអ្នកតវ៉ា កិច្ចព្រមព្រៀងទាំងពីរនេះគ្មានអ្វីខុសគ្នាទេ។ អឺរ៉ុបបានចុះហត្ថលេខាជាមួយកាណាមែនពេលនេះ តែមិនមែនមានន័យថាអឺរ៉ុបនឹងអាចចុះហត្ថលេខាជាមួយអាមេរិកទេ។ ក្រុមអ្នកតវ៉ា ព្រមទាំងថ្នាក់ដឹកនាំមួយចំនួននៅអឺរ៉ុប បានសម្តែងការមិនពេញចិត្តខ្លាំងណាស់ អំពីចំណាត់ការរបស់សហភាពអឺរ៉ុប ដែលចង់ជំរុញឲ្យមានកិច្ចព្រមព្រៀងទាំងពីរនេះ។ ឥឡូវបានមួយហើយ គេចង់បានមួយទៀត។ ប្រហែលជាមិនងាយដូចការគិតទេ។ អ្នកតំណាងរាស្ត្រ និងអ្នកនយោបាយតាមបណ្តាប្រទេសអឺរ៉ុបជាច្រើន ដូចជានៅអាល្លឺម៉ង់ និងបារាំង នៅមានមន្ទិលសង្ស័យច្រើន ហើយមិនពេញចិត្តពីខ្លឹមសារនៃកិច្ចព្រមព្រៀងជាមួយសហរដ្ឋអាមេរិក។
លោករដ្ឋលេខាធិការទទួលបន្ទុក ពាណិជ្ជកម្មក្រៅប្រទេសរបស់បារាំង បានបង្ហាញជំហរយ៉ាងច្បាស់ថា លោកប្រឆាំងដាច់ខាតនូវការចុះហត្ថលេខាដោយតក់ក្រហល់ លើកិច្ចព្រមព្រៀងពាណិជ្ជកម្មជាមួយអាមេរិក។ សម្រាប់លោក សហភាពអឺរ៉ុប កំពុងតែដើរទៅរកផ្លូវ បែបសេរីនិយមជ្រុលហួសហេតុ លែងខ្វល់ពីតំលៃរួម នៃលទ្ធិប្រជាធិបតេយ្យ ដោយគិតតែប្រយោជន៍សេដ្ឋកិច្ច របស់ក្រុមហ៊ុនធំៗ។ សមាជិកសភាអឺរ៉ុប គួរណាតែត្រូវគេសួរយោបល់តាំងតែពីដំបូង មិនមែនចុះហត្ថលេខាហើយ ទើបយកទៅឲ្យសភាអនុម័តតាមក្រោយនោះទេ។
តំណាងរាស្ត្រនៃតំបន់ Wallonie របស់ប៊ែលហ្សិក បានប្រកាសហើយថា កិច្ចព្រមព្រៀងពាណិជ្ជកម្មសេរីជាមួយអាមេរិក ហៅកាត់ថា TAFTAនោះ បានស្លាប់បាត់ទៅហើយ មិនបាច់ចរចាបន្តទៀតទេ។ នៅតែ២ខែទៀត អាមេរិក នឹងដូររដ្ឋាភិបាលថ្មី។ វាជារឿងគ្រោះថ្នាក់ណាស់ ដែលចង់ចរចា និងចុះហត្ថលេខាដោយតក់ក្រហល់។
ប្រជាជនទូទៅអស់ជំនឿចិត្ត និងលែងទុកចិត្តសហភាពអឺរ៉ុប៖
ការប្រឆាំងតវ៉ា ជាមួយនឹងសហភាពអឺរ៉ុប ពីសំណាក់មតិសាធារណៈរបស់ប្រជាជនអឺរ៉ុបទូទៅ ស្តីពីកិច្ចព្រមព្រៀងទាំងពីរ នេះ គឺវាអាចមានប្រភពច្រើន ហើយដែលប្រភពនោះ វាអាចមិនស្ថិតនៅលើខ្លឹមសារនៃកិច្ចព្រមព្រៀងនេះទេ។ ការប្រឆាំងតវ៉ានេះ គឺវាស្តែងចេញពីគំលាតគ្នាកាន់តែឆ្ងាយទៅៗ រវាងប្រជាជនទូទៅ នឹងថ្នាក់ដឹកនាំសហភាពអឺរ៉ុប នៅទីក្រុងព្រុចសែល។ ពីមួយថ្ងៃទៅមួយថ្ងៃ វិបត្តិមានបន្ថែមជានិច្ច វិបត្តិសេដ្ឋកិច្ច វិបត្តិអត់ការងារធ្វើ រោងចក្រ ក្រុមហ៊ុនបិទជាបន្តបន្ទាប់ ជនភៀសខ្លួនរាប់សែននាក់សំរុកមករស់នៅ រប៉ាត់រប៉ាយ ពាសពេញអឺរ៉ុប។ ទាំងអស់នេះសហភាពអឺរ៉ុប គ្មានលទ្ធភាពដោះស្រាយនៅឡើយទេ។ ទាំងអស់នេះ ក៏អាចជាស្នាដៃដឹកនាំរបស់សហភាពអឺរ៉ុបដែរ។ នេះនៅមិនរាប់ពីការគំរាមកំហែងភេរវកម្ម ដែលប្រជាជនអឺរ៉ុប ត្រូវរស់នៅប្រចាំថ្ងៃ ជាមួយនឹងការភ័យខ្លាច។
មតិសាធារណៈទូទៅ បានបាត់បង់ជំនឿចិត្តលើថ្នាក់ដឹកនាំនៅក្រុងព្រុចសែល។ ពួកគេមានអារ្មណ៍ថា សម្លេងតវ៉ា ការលំបាកប្រចាំថ្ងៃរបស់ពួកគេ មិនត្រូវបានថ្នាក់ដឹកនាំនៅព្រុចសែល ទទួលដឹងឮទេ។ ផ្ទុយទៅវិញ គេគិតតែពីជំរុញ អនុម័តនេះ អនុម័តនោះ បើកផ្លូវឲ្យប្រព័ន្ធហិរញ្ញវត្ថុ និងក្រុមហ៊ុនអន្តរជាតិបរទេសធំ ចិញ្ច្រាំយកទីផ្សារ ដោយមិនគិតពីសុខមាលភាពរបស់ប្រជាជនអឺរ៉ុប។ បើសហភាពអឺរ៉ុប កាន់តែខំឃោសនា ផ្សាយពាណិជ្ជកម្ម ជំរុញឲ្យយល់ព្រម ទទួលយកកិច្ចព្រមព្រៀងពាណិជ្ជកម្មជាមួយអាមេរិក គឺធ្វើឲ្យគេកាន់តែសង្ស័យ និងមិនទុកចិត្ត។ ថ្នាក់ដឹកនាំអឺរ៉ុប តែងតែអះអាងថា កិច្ចព្រមព្រៀងពាណិជ្ជកម្មសេរី និងផ្តល់ប្រយោជន៍ឲ្យទាំងអស់គ្នា។ តែពេលប្រជាជនសួរបកទៅវិញ ថាកិច្ចព្រមព្រៀងនោះ នឹងនាំប្រយោជន៍ជាក់ស្តែងអ្វីខ្លះដល់ជីវភាពប្រចាំថ្ងៃរបស់ប្រជាជន ស្រាប់តែថ្នាក់ដឹកនាំអឺរ៉ុប រកពាក្យមកឆ្លើយមិនបានផង ក្រៅតែពីសូត្រដដែលៗ ពីទ្រឹស្តីនៃសកលភាវូបនីយកម្ម៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ