សមាជិកនៅអឺរ៉ុបរុញទម្លាក់ បន្ទុកដាក់គ្នា ក្នុងរឿងទទួលជនអន្តោប្រវេសន៍
ចុះផ្សាយនៅថ្ងៃ៖
ស្តាប់ - ០៥:០០
ចាប់តាំងពីដើមឆ្នាំនេះ អ៊ីតាលីបានទទួលជនអន្តោប្រវេសន៍តាមទូក ជិត ៦ម៉ឺននាក់ដែលធ្វើដំណើរចេញពីអាហ្រ្វិកខាងជើង សំដៅ អឺរ៉ុប តាមរយៈសមុទ្រមេឌីទែរ៉ាណេ។ ក្រពុលមុខនឹងបន្ទុកដ៏សែនធ្ងន់ នៃជនអន្តោប្រវេសន៍ក្នុងទឹកដីរបស់ខ្លួន ព្រមជាមួយការមិនរវល់ អើពើពីប្រទេសជិតខាងអឺរ៉ុបដទៃទៀត អ៊ីតាលីបានគំរាមអនុវត្តផែនការទីពីរ។ ផែនការទីពីរ ដែលនាយករដ្ឋមន្រ្តីអ៊ីតាលីព្រមានថា នឹងអាចផ្តល់ផលអាក្រក់ដល់សហភាពអឺរ៉ុប បើសិនប្រទេសសមាជិកអឺរ៉ុបនៅតែព្រមចរចា ចុះសម្រុងគ្នា ដើម្បីជួយចែករំលែកទទួលយកជនអន្តោប្រវេសន៍ពីអ៊ីតាលី។
ទីតាំងភូមិសាស្ត្របានធ្វើឲ្យអ៊ីតាលី និងក្រិកប្រឈមនឹងការហូរចូលកាន់តែច្រើន ជនអន្តោប្រវេសន៍តាមទូក ដែលមានធ្វើដំណើរចេញពីប្រទេសលីប៊ី និងតួកគី។ នៅក្នុងរយៈពេល ៦ខែ ឆ្នាំនេះ មានជនអន្តោប្រវេសន៍ជិត ៦ម៉ឺននាក់ ដែលនៅក្នុងនោះ មានភាគច្រើន ជាជនភៀសខ្លួនស៊ីរី និងអាហ្វ្រិក ត្រូវបានអាជ្ញាធរអ៊ីតាលីក៏ដូចប្រទេសអឺរ៉ុបស្រង់ ចេញពីសមុទ្រមេឌីទែរ៉ាណេ និងយកទៅដាក់ក្នុងទឹកដីអ៊ីតាលី។ ដើម្បីសម្រាលបន្ទុករបស់ក្រិក និងអ៊ីតាលី គណៈកម្មការអឺរ៉ុប ធ្លាប់បានស្នើកម្មវិធីមួយ ដែលនៅក្នុងនោះ សមាជិកអឺរ៉ុប ទាំង ២៨ប្រទេស ត្រូវទទួលយកជនភៀសខ្លួន ស៊ីរី និងអេរីត្រេ (Erythrée) ចំនួន ៤ម៉ឺន នាក់ ដែលធ្វើដំណើរមកដល់អ៊ីតាលី និងក្រិក កាលពីខែមេសា។ លើសពីនោះ គណៈកម្មការអឺរ៉ុបចង់ឲ្យប្រទេសសមាជិកអឺរ៉ុបទទួលយកជនភៀសខ្លួនស៊ីរីប្រមាណ ២ម៉ឺននាក់បន្ថែមទៀត ដែលពេលនេះ កំពុងស្ថិតនៅក្នុងជំរំ ក្នុងប្រទេសលីបង់ ឬអ៊ីរ៉ាក់។
សមាជិកអឺរ៉ុបនៅតែចរចា មិនត្រូវគ្នា ពីរឿងទទួលយកជនភៀសខ្លួន ឲ្យទៅក្នុងប្រទេសរបស់ខ្លួន។ កាលពីថ្ងៃអង្គារ រដ្ឋមន្រ្តីមហាផ្ទៃរបស់ប្រទេសសមាជិកអឺរ៉ុបបានបរាជ័យជាថ្មី ដោយមិនអាចនិយាយចុះសម្រុងគ្នា ពីចំនួន និងលក្ខខណ្ឌដែលត្រូវទទួលជនភៀសខ្លួន។ អង់គ្លេស និងអៀរឡង់បានប្រកាសរួចហើយថា នឹងមិនចូលរួមចំណែក នៅក្នុងការទទួលជនភៀសខ្លួន ស្នើឡើងដោយគណៈកម្មការអឺរ៉ុប។ ការបែងចែក ជនភៀសខ្លួន ទៅឲ្យប្រទេសសមាជិកអឺរ៉ុប ធ្វើឡើង ដោយមើលទៅផលិតផលក្នុងស្រុកសរុប និងទៅលើចំនួនមនុស្សគ្មានការងារធ្វើ នៅក្នុងប្រទេស។
ក្នុងចំណោមជនភៀសខ្លួន ៤ម៉ឺននាក់ ដែលប្រទេសនៅអឺរ៉ុបត្រូវចែកចំនួនគ្នា បារាំងត្រូវទទួលប្រមាណ ៩ពាន់នាក់ ចំណែកអាល្លឺម៉ង់ ដែលមានសក្តានុពលសេដ្ឋកិច្ចល្អជាងគេនៅ អឺរ៉ុបត្រូវទទួលម១១៨៤៩នាក់។ បារាំង និងអាល្លឺម៉ង់ យល់ព្រមទទួលជនភៀសខ្លួន ប៉ុន្តែ មានលក្ខខណ្ឌ។ ដំបូង បារាំង និងអាល្លឺម៉ង់ ចង់ឲ្យកាតព្វកិច្ច ត្រូវតែទទួលជនភៀសខ្លួន ធ្វើឡើងជាពិសេស ម្តងម្កាល គឺមិនអចិន្រ្តៃយ៍ រហូតនោះទេ។ បារាំងវិញបញ្ជាក់ថា ខ្លួនចង់ទទួលយកតែជនភៀសខ្លួន និងអ្នកដែលចង់សុំសិទ្ធិជ្រកកោណ នៅអឺរ៉ុប ប៉ុន្តែ មិនទទួលយកជនអន្តោប្រវេសន៍ ដែលភៀសខ្លួន ដោយសារវិបត្តិសេដ្ឋកិច្ច នោះទេ។ ត្រង់ចំណុចនេះ រដ្ឋមន្រ្តីក្រសួងមហាផ្ទៃ បារាំង បានសរសេរនៅក្នុងរបាយការណ៍មួយ កាលពីថ្ងៃពុធ ដាក់ ទៅរដ្ឋាភិបាលដែលថា បារាំង អាចទទួលជនភៀសខ្លួននយោបាយ ប៉ុន្តែ ទន្ទឹមគ្នានោះ បារាំងត្រូវចាត់វិធានការ បង្កើនការចាប់បញ្ជូនជនអន្តោប្រវេសន៍ខុសច្បាប់ឲ្យត្រលប់ទៅប្រទេសកំណើតវិញ។
បារាំងអាចមានសាមគ្គីភាព នៅក្នុងរឿងទទួលជនភៀសខ្លួន ប៉ុន្តែ បារាំងទាមទារឲ្យមានការទទួលខុសត្រូវ។ នេះជាអ្វីដែលរដ្ឋមន្រ្តីមហាផ្ទៃបារំាង ចង់និយាយបញ្ជាក់ទៅភាគីអ៊ីតាលី ដែលមួយរយៈចុងក្រោយនេះ បានបង្កសង្រ្គាមប៉ាកការខ្លាំងៗជាមួយបារាំង។ អ៊ីតាលី ដែលមានព្រំដែនជាប់នឹងបារាំង មិនសប្បាយចិត្តទេ ដែលរដ្ឋាភិបាលប៉ារីស ព្រងើយ កន្តើយ និងតែងតែចាប់បញ្ជូន ជនអន្តោប្រវេសន៍ នៅព្រំដែនអ៊ីតាលី និងបារាំង ឲ្យត្រលប់ចូលក្នុងទឹកដីអ៊ីតាលីវិញ។ នាយករដ្ឋមន្រ្តីអ៊ីតាលី នៅថ្ងៃអង្គារ បានគំរាមរួចហើយថា បើសិន ប្រទេសអឺរ៉ុបផ្សេងទៀត នៅតែមិនអើពើ និងយឺតយ៉ាវ មិនព្រមទទួលជនភៀសខ្លួន នោះអ៊ីតាលីនឹងអនុវត្តផែនការបម្រុង។ នាយករដ្ឋមន្រ្តី អ៊ីតាលីមិនបាននិយាយលម្អិតទេ ប៉ុន្តែ តាមប្រភពស្និទ្ធនឹងរដ្ឋាភិបាលអ៊ីតាលី នៅក្នុងផែនការទីពីរ អ៊ីតាលីអាចនឹងផ្តល់ទិដ្ឋាការ រយៈពេល ៣ខែដល់ជនអន្តោប្រវេសន៍ និងអ្នកដែលចង់សុំសិទ្ធិជ្រកកោន។ ទិដ្ឋាការបណ្តោះអាសន្ន នឹងបើកសិទ្ធិឲ្យពួកគេធ្វើដំណើរដោយសេរី នៅក្នុងលំហរ Schengenរបស់អឺរ៉ុប។
អ៊ីតាលី ក្នុងសម័យដឹកនាំរបស់លោកនាយករដ្ឋមន្រ្តីប៊ែលុយស្កូនី ធ្លាប់បញ្ចេញជនអន្តោប្រវេសន៍ចេញពី ទឹកដីអ៊ីតាលីម្តងហើយ បន្ទាប់ពីប្រទេសអឺរ៉ុបដទៃទៀត មិនព្រមជួយដោះស្រាយបញ្ហាជនអន្តោប្រវេសន៍ និងទុកឲ្យអ៊ីតាលីត្រូវឈឺក្បាលដោះស្រាយតែម្នាក់នោះ។ សម្រាប់ទីក្រុងរ៉ូម អ៊ីតាលីគ្រាន់តែជាច្រកទ្វារ សម្រាប់ធ្វើដំណើរទៅប្រទេសអឺរ៉ុបដទៃទៀត ប៉ុន្តែ មិនមែនជាប្រទេសគោលដៅចង់រស់នៅរបស់ជនអន្តោប្រវេសន៍នោះទេ។ លើកនេះ អ៊ីតាលីទាមទារឲ្យសហភាពអឺរ៉ុបធ្វើកំណែទម្រង់បទបញ្ជាផ្ទៃក្នុង ទីក្រុងឌុបប្លាំង ដែលបានកំណត់ថា ជនអន្តោប្រវេសន៍ ត្រូវតែដាក់ពាក្យសុំសិទ្ធិជ្រកកោណ ទៅរដ្ឋាភិបាលរបស់ប្រទេស ដែលពួកគេបានមកជាន់ដំបូង គេ នៅក្នុងសហភាពអឺរ៉ុប។
បារាំងវិញបានទាមទារឲ្យអ៊ីតាលីគោរពច្បាប់អឺរ៉ុប ស្តីពីការទទួលជនអន្តោប្រវេសន៍ និងបង្កើតជំរំរង់ចាំមួយ ដែលនៅទីនោះ ជនអន្តោប្រវេសន៍នឹងត្រូវកំណត់ បែងចែកជាពីរ គឺមួយ ជាជនភៀសខ្លួន ដែលចង់សុំសិទ្ធិជ្រកកោន និងមួយទៀត ជាជនអន្តោប្រវេសន៍ខុសច្បាប់ ដែលគេត្រូវបញ្ជូនចេញពីអឺរ៉ុបវិញ។ ទីក្រុងប៉ារីសនៅបានព្រមានដែរថា នឹងទាមទារឲ្យមានការផ្លាស់ប្តូរលក្ខខណ្ឌធ្វើដំណើរនៅអឺរ៉ុប ប្រសិនបើអ៊ីតាលីធ្វើដូចមុន គឺបញ្ជូនចេញជនអន្តោប្រវេសន៍មកក្នុងទឹកដីអឺរ៉ុប ជាពិសេស មកបារាំង ដែលមានព្រំដែនជាប់ជាមួយអ៊ីតាលីនោះ។ បារាំងនឹងបង្កើនផងដែរ វិធានការពង្រឹងការត្រួតពិនិត្យ នៅតាមព្រំដែន ដូចដែលបារាំង ធ្លាប់ធ្វើ កាលពីមុន ដើម្បី ទប់ស្កាត់កុំឲ្យជនអន្តោប្រវេសន៍ ធ្វើដំណើរដោយខុសច្បាប់ចេញពីអ៊ីតាលី ចូលទឹកដី បារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ