តុលាការកំពូលបារាំងសម្រេចបញ្ជូនលោកស្រីគ្រីស្ទីន ឡាហ្កាដឡើងតុលាការសាធារណរដ្ឋ
លោកស្រីគ្រីស្ទីន ឡាហ្កាដ អគ្គនាយកមូលនិធិរូបិយវត្ថុអន្តរជាតិ កំពុងតែជាប់រឿងអាស្រូវក្តីក្តាំមួយ។ តុលាការកំពូលបារាំង បានសម្រេចបញ្ជូនលោកស្រីគ្រីស្ទីន ឡាហ្កាដទៅកាន់តុលាការយុត្តិធម៌សាធារណរដ្ឋ ដើម្បីសម្រេចទោសលោកស្រី ជុំវិញរឿងអាស្រូវ អាជ្ញាកណ្តាលឯកជនរវាងធនាគារបារាំង ក្រេឌី លីយ៉ូណេ និងមហាសេដ្ឋីបារាំង លោក ប៊ែរណា តាពី ដែលបានធ្វើឲ្យខាតប្រាក់រដ្ឋចំនួន៤០៤លានអឺរ៉ូ។
ចុះផ្សាយនៅថ្ងៃ៖
ស្តាប់ - ០២:២៣
លោកស្រី គ្រីស្ទីន ឡាហ្កាដ ស្រ្តីជនជាតិបារាំង ដែលមានមុខតំណែងធំជាងគេបង្អស់ក្នុងលោក កំពុងតែអាចប្រឈមមុខនឹងទោសជាប់ពន្ធនាគារមួយឆ្នាំ រួមទាំងត្រូវបង់ប្រាក់ពិន័យ១៥០០០អឺរ៉ូ។ នៅថ្ងៃសុក្រ ទី២២ កក្កដា តុលាការកំពូលបារាំង បានសម្រេចក្តី ដោយបដិសេធបណ្តឹងរបស់លោកស្រី គ្រីស្ទីន ឡាហ្គាដ ហើយបានសម្រេចបញ្ជូនករណីលោកស្រី ទៅកាន់តុលាការយុត្តិធម៌សាធារណៈរដ្ឋ ដើម្បីចាត់ចែងរកខុសត្រូវ។
សូមបញ្ជាក់ថា លោកស្រីគ្រីស្ទីន ឡាហ្កាដ ដែលបច្ចុប្បន្នជាអគ្គនាយកមូលនិធិរូបិយវត្ថុអន្តរជាតិ ហៅកាត់ថា FMI បានជាប់ពាក់ព័ន្ធនឹងរឿងអាស្រូវមួយ ដែលបានធ្វើឲ្យខាតបង់ថវិការដ្ឋចំនួន៤០៤លានអឺរ៉ូ។ ក្នុងឆ្នាំ២០០៧ នៅ ពេលដែលលោកស្រី ជារដ្ឋមន្ត្រីក្រសួងសេដ្ឋកិច្ចបារាំង កាលនោះ លោកស្រីបានសម្រេចឲ្យមានការ ដោះស្រាយជំលោះ ក្រៅប្រព័ន្ធតុលាការ ពោលគឺតាមរយៈក្រុមប្រឹក្សាអាជ្ញាកណ្តាលឯកជន ដើម្បីដោះស្រាយជម្លោះរវាងធនាគារ Crédit Lyonnais នឹងលោក Bernard Tapie ។ ទីបំផុត ក្រុមប្រឹក្សាអាជ្ញាកណ្តាលឯកជននេះ បានតម្រូវឲ្យធនាគារ Crédit Lyonnais ដែលកាលនោះ ជាធនាគាររបស់រដ្ឋបារាំង ឲ្យត្រូវបង់ប្រាក់សងទៅលោក Bernard Tapie ចំនួន៤០៤លានអឺរ៉ូ ទាក់ទិននឹងកិច្ចសន្យាទិញលក់ក្រុមហ៊ុន Adidas។
តុលាការកំពូលបារាំង ក៏បានសម្រេចចាត់ទុកជាមោឃៈ នូវសេចក្តីសម្រេចរបស់អាជ្ញាកណ្តាលឯកជននេះ បន្ទាប់ពីបានពិនិត្យឃើញនូវចំណុចមិនប្រក្រតីមួយចំនួន ទាក់ទិននឹងទំនាក់ទំនងរវាងលោក Bernard Tapie និងលោក Pierre Estoup ដែលជាអាជ្ញាកណ្តាលម្នាក់ ក្នុងចំណោមទាំងបីនាក់។ ចៅក្រមតុលាការកំពូល យល់ឃើញថា ការសម្រេចចិត្តរបស់លោកស្រីគ្រីស្ទីន ឡាហ្កាដ ក្នុងនាមជារដ្ឋមន្ត្រីក្រសួងសេដ្ឋកិច្ច ដែលបញ្ជារឲ្យដោះស្រាយជំលោះតាមផ្លូវអាជ្ញាកណ្តាល ជាជាងការនាំយកសំណុំរឿងទៅតុលាការ គឺជារឿងមួយ ដែលបង្ហាញពីភាពខ្វះការប្រុងប្រយ័ត្ន របស់លោកស្រី ហើយដែលឈានទៅដល់ការខាតបង់ថវិការដ្ឋ។ យ៉ាងណាមិញ កាលពីឆ្នាំ២០១៥ តុលាការឧទ្ធរណ៍បារាំង បានកាត់សេចក្តីតម្រូវឲ្យលោក Bernard Tapis សងប្រាក់មករដ្ឋបារាំងវិញទាំងអស់។
ក្នុងកាលៈទេសៈនេះ លោកស្រីគ្រីស្ទីន ឡាហ្កាដ នឹងត្រូវជំនំជំរះក្តី នៅចំពោះមុខតុលាការយុត្តិធម៌សាធារណរដ្ឋ ដែល មានតួនាទីកាត់ទោសមន្ត្រីរដ្ឋាភិបាលណា ដែលបានធ្វើខុស ក្នុងពេលបំពេញមុខងាររបស់ខ្លួន។ យ៉ាងណាក៏ដោយ លោកស្រីគ្រីស្ទីន ឡាហ្កាដ នៅតែអះអាងថាលោកស្រី បានធ្វើដោយយោងទៅលើផលប្រយោជន៍រដ្ឋជាធំ ហើយបានធ្វើដោយគោរពច្បាប់ជាធរមាន។ ដោយឡែក ក្រុមប្រឹក្សាភិបាលមូលនិធិរូបិយវត្ថុអន្តរជាតិ បានចេញសេចក្តីប្រកាសភ្លាមៗដែរ កាលពីល្ងាចថ្ងៃសុក្រថា សូមបន្តគាំទ្រ និងផ្តល់ទំនុកចិត្តចំពោះលោកស្រីគ្រីស្ទីន ឡាហ្កាដជានិច្ច៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ