អន្តោប្រវេសន៍ដែនសមរភូមិនយោបាយថ្មីរបស់ប្រធានាធិបតីបារាំង
ចុះផ្សាយនៅថ្ងៃ៖
ស្តាប់ - ០៤:០៧
ក្នុងខណៈដែលអន្តោប្រវេសន៍ជាប្រធានបទនយោបាយដ៏ក្តៅគគុក កំពុងពុះកញ្ជ្រោលខ្លាំង នៅអឺរ៉ុប ប្រធានាធិបតីបារាំង បានជ្រើសរើសធ្វើជាអធិបតីភាព នៅថ្ងៃទី ១៥ធ្នូ២០១៤ បើកសម្ពោធសារៈមន្ទីរអន្តោប្រវេសន៍ជាផ្លូវការ។ មានទីតាំងនៅទីក្រុងប៉ារីស សារៈមន្ទីរបានបើកទ្វារតាំងពីឆ្នាំ២០០៧ ឆ្នាំដែលលោកនីកូឡា សាកូហ្ស៊ី ជាប់ឆ្នោតជាប្រធានាធិបតី ប៉ុន្តែលោកបានបដិសេធមិនទៅជាន់ទីតាំងនោះ ក្រោមផ្អាករក្សាអត្តសញ្ញាណជាតិ។ ប៉ុន្តែលោកហ្វ្រង់ស័រហូឡង់ យល់ផ្ទុយ ! លោកចង់ផ្តល់រូបភាពវិជ្ជមានដល់អន្តោប្រវេសន៍ ចង់សម្តែងការដឹងគុណចំពោះអន្តោប្រវេសន៍ដែលបំរើបារាំង។
ដោយមានការប្រយ័ត្នប្រយែងខ្លាំង លោក ហ្វ្រង់ស័រ ហូឡង់ មិនដែលលើកយកប្រធានបទអន្តោប្រវេសន៍មកនិយាយដោយចំៗទេ តាំងពីក្លាយជាប្រធានាធិបតីបារាំងមក។ ទើបតែនៅថ្ងៃចន្ទទី ១៥ ធ្នូ ជាលើកទីមួយ លោកហូឡង់បានផ្សងព្រេងលើវិថីអន្តោប្រវេសន៍។ ការចេញស្តី ក្រោយពីស្ងប់ស្ងាត់រាប់ឆ្នាំ ពិតជាមានន័យខ្លាំងណាស់ ! វាពិសេសទៅទៀត វត្តមានរបស់លោកហ្វ្រង់ស័រហូឡង់ ក្នុងឱកាសបើកសម្ពោធសារៈមន្ទីរ ដែលតាំងពីចាប់បើកទ្វារនៅឆ្នាំ២០០៧មក មិនដែលមានប្រធានាធិបតីណានឹងឃើញទៅអើតមើល រហូតមានងារថាសារៈមន្ទីរខ្មោច ពិតជាបញ្ជាក់បានអំពីសារនយោបាយដ៏សំខាន់ ៖ “ជាសុន្ទរកថាដ៏សំខាន់ ! ជាឱកាសដ៏ប្រសើរសម្រាប់និយាយថាអ្វីទៅជាបារាំង បារាំងប្រទេសមានចម្រុះជាតិសាសន៍ ធនធាន និងកតញ្ញូតាចំពោះអន្តោប្រវេសន៍មកពី គ្រប់ជ្រុងនៃពិភពលោក មកជួយស្រោចស្រង់ស្ថាបនា អភវិឌ្ឍន៍ និងផ្តល់ភាពមានបានដល់ប្រទេស”។ ជាប្រយោគដ៏សាមញ្ញរបស់អ្នកឆ្វេងនិយម តាំងពីដើមមក តែការលើកយកមកបរិយាយថ្ងៃនេះ ពេលនេះអាចជាការប្រថុយប្រថានខ្លាំង។
ប៉ុន្តែនេះជាចេតនារបស់លោកហ្វ្រង់ស័រហូឡង់ ! បន្ទាប់ពីស្លុងយុទ្ធសាស្ត្រអស់ពាក់កណ្តាលអាណត្តិជុំវិញតែវិបត្តិហិរញ្ញវត្ថុពន្ធដារនិងថវិកា លោកប្រធានាធិបតីបារាំងចង់បើកទំព័រនយោបាយថ្មី ដោយផ្តោតទៅលើអន្តោប្រវេសន៍ម្តង។ អន្តោប្រវេសន៍ដែលជាចំណុចខ្លាំង និងដែលការពាររហូតមកដោយអ្នកសង្គមនិយម តែមួយរយៈពេលចុងក្រោយត្រូវបានអ្នកស្តាំនិយម និងរណសិរ្សជាតិស្តាំជ្រុលនិយមបារាំងប្រើជាឧបករណ៍សម្រាប់ប្រយោជន៍ជាតិនិយម។
ក្នុងសំឡេងដូចឃោសនាដែលគេខានបានស្តាប់ឮតាំងពីឆ្នាំ២០១២មក លោកហ្វ្រង់ស័រហូឡង់បានថ្លែងការពាររូបភាពវិជ្ជមានរបស់អន្តោប្រវេសន៍ និងរបៀបវាយប្រហារផង ៖ “យើងថារឿងអាក្រក់បានកន្លងផុតហើយ ! មិនទេ ! ជនអន្តោប្រវេសន៍នៅតែត្រូវបានគេចោទប្រកាន់ថាមកដណ្តើមការងារពីជនជាតិបារាំង មកយកចំណេញពីជំនួយសង្គម (បើទោះបីការសិក្សាបានបញ្ជាក់ជនបរទេសផ្តល់ប្រយោជន៍ច្រើនទាញយកជំនួយសង្គមយ៉ាងណាក្តី)។ ខ្យល់អាក្រក់បានរសាត់មកកាន់ច្រើនឡើងៗ យើងត្រូវចាប់ផ្តើមប្រយុទ្ធជាថ្មីម្តងទៀត សាកល្បងឆ្លើយ និងមិនបណ្តោយឱ្យធ្វើអ្វីស្រេចតែចិត្តទេ”។
ថ្វីបើ លោកស្រីម៉ារីន ឡឺប៉ែន ប្រមុខបក្សរណសិរ្សជាតិនិយម និងលោកនីកូឡាសាកូហ្ស៊ី ប្រធានបក្សស្តាំនិយម មិនត្រូវបានវាយប្រហារដោយចំឈ្មោះមែន ប៉ុន្តែអត្ថន័យនៃសុន្ទរកថាអាចបញ្ជាក់បាន ជាឧទាហរណ៍តាមរយៈសំណុំរឿងកិច្ចព្រមព្រៀងSchengen។ បើតាមលោកហ្វ្រង់ស័រហូឡង់ បារាំងត្រូវតែមាននយោបាយអន្តោប្រវេសន៍ ! នយោបាយនេះត្រូវឆ្លងកាត់អឺរ៉ុប ហើយព្រំប្រទល់គឺ Schengen តែមានអ្នកចង់ធ្វើខ្ទាត Schengen ! មិនលំបាកទេ ព្រោះគ្មានអ្នកនរណាស្គាល់ Schengenផង អ្នកខ្លះស្មានតែឈ្មោះតួមនុស្សផង … Schengen គឺជាព្រំដែនរបស់អឺរ៉ុប និងជាបង្អែកសម្រាប់ឱ្យប្រទេសជាសមាជិកអឺរ៉ុបសហការគ្នាត្រួតពិនិត្យអន្តោប្រវេសន៍។ បំបែក Schengen បំបាត់ Schengen គឺដូចជាដើរថយក្រោយ ត្រលប់ទៅកាត់រៀបចំខណ្ឌចែកព្រំប្រទល់ ពីប្រទេសមួយទៅប្រទេសមួយឡើងវិញ។ ដូច្នេះយើងត្រូវតែការពារដើម្បីអនាគតអឺរ៉ុប។
លោកប្រធានាធិបតីបានត្រលប់មករំលឹកអំពីពាក្យសន្យា ក្នុងពេលឃោសនាបោះឆ្នោតឆ្នាំ២០១២ ដែលចង់ឱ្យជនបរទេសមិនសិទ្ធិបោះឆ្នោតតំបន់ឃុំសង្កាត់។ ពាក្យសន្យាមិនបានបំភ្លេចទេ តែពេលខ្លះត្រូវអំណាចប្រតិបត្តិអាចជួបឧបសគ្គព្រោះមិនអាចប្តូរច្បាប់រដ្ឋធម្មនុញ្ញបានដោយងាយៗ។ ដោយមិននិយាយអំពី ជម្រើសអន្តោប្រវេសន៍ ព្រោះជាពាក្យរបស់អ្នកស្តាំនិយម លោកហ្វ្រង់ស័រ ហូឡង់ បានអះអាងបញ្ជាក់ពលរដ្ឋ ថាបារាំងមិនមែនជាប្រទេសដែលមាន និងទទួលជនអន្តោប្រវេសន៍ច្រើនដូចការគិតស្មាននោះឡើយ ក្នុងមួយឆ្នាំៗបារាំងផ្តល់សិទ្ធិនិងបណ្ណស្នាក់នៅដល់អន្តោប្រវេសន៍តែប្រមាណ ២០០០០០នាក់ប៉ុណ្ណោះ ! ជាអត្រាដ៏ទាបបំផុតនៅអឺរ៉ុប។ និងដើម្បីសម្របខ្លួនតាមអឺរ៉ុប បារាំងបានអនុម័តការធ្វើកំណែទម្រង់ច្បាប់អន្តោប្រវេសន៍ ដែលល្បីខាងវែងអូសបន្លាយពេលវេលា ដោយគ្រោងនឹងបញ្ចុះរយៈពេលសិក្សាពាក្យសុំសិទ្ធិជ្រកកោនមកត្រឹម៩ខែ។ ការបន្ធូរបន្ថយមួយទៀតដែលគេបានឮគ្រលាស់ចេញពីមាត់ប្រធានាធិបតីបារាំង គឺការផ្តល់សញ្ជាតិដល់គ្រប់ជនបរទេសណាដែលមានអាយុលើសពី៦៥ឆ្នាំ បានរស់នៅលើទឹកដីបារាំងលើសពី ២៥ឆ្នាំ និងកូនយ៉ាងហោចណាស់ម្នាក់មានសញ្ជាតិបារាំង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ