COP២១៖រដ្ឋាភិបាលបារំាងរឹតបន្តឹងការត្រួតពិនិត្យតាមព្រំដែនរយៈពេល ១ខែ
នៅថ្ងៃសុក្រ ទី៦ វិច្ឆិកា ប្រទេសបារំាងបានប្រកាសឲ្យដឹងពីការបង្កើតប៉ុស្តិ៍ត្រួតពិនិត្យនៅតាមព្រំដែនរយៈពេល ១ខែក្នុងពេលដែលបារំាងធ្វើជាម្ចាស់ផ្ទះរៀបចំសន្និសីទអន្តរជាតិស្តីពីបញ្ហាអាកាសធាតុហៅកាត់ថា COP២១។ ទីក្រុងប៉ារីសបានលើកឡើងថា វិធានការបង្កើតប៉ុស្តិ៍ត្រួតពិនិត្យនៅតាមព្រំដែនរយៈពេល ១ខែពីថ្ងៃទី១៣ វិច្ឆិកាដល់ថ្ងៃទី១៣ ធ្នូខាងមុខធ្វើឡើងដើម្បីបង្ការទប់នឹងការគំរាមកំហែងភេរវនិយមជាយថាហេតុ ឬមួយក៏ហានិភ័យផ្សេងៗ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់
វិធានការបង្កើតប៉ុស្តិ៍ត្រួតពិនិត្យនៅតាមព្រំដែនរយៈពេល ១ខែនាឱកាសសន្និសីទអន្តរជាតិស្តីពីបញ្ហាអាកាសធាតុត្រូវបានប្រកាសឡើងដោយលោករដ្ឋមន្រ្តីក្រសួងមហាផ្ទៃបារំាង Bernard Cazeneuve។ តែលោក Cazeneuve បានបញ្ជាក់ច្បាស់ៗថា វិធានការនេះមិនមែនជាការព្យួរកិច្ចព្រមព្រៀង Schengen ដែលបារំាងជាប្រទេសហត្ថលេខីមួយដែរនោះទេ។ គួររម្លឹកជូនឡើងវិញថា Schengen ឬហៅថា លំហ Schengen គឺជាកិច្ចព្រមព្រៀងមួយរបស់អឺរ៉ុបដែលសម្រួលចរាចរណ៍ទំនិញ និងការធ្វើដំណើររបស់មនុស្សដោយគ្មានការត្រួតពិនិត្យនៅតាមព្រំដែនរវាងប្រទេសអឺរ៉ុប ២៦។
ទន្ទឹមគ្នានេះ កិច្ចព្រមព្រៀង Schengen ក៏បានអនុញ្ញាតឲ្យរដ្ឋហត្ថលេខីដែលត្រូវធ្វើជាម្ចាស់ផ្ទះរៀបចំសន្និសីទអន្តរជាតិសំខាន់ៗ ដូចករណីបារំាងត្រូវរៀបចំសន្និសីទអន្តរជាតិស្តីពីបញ្ហាអាកាសធាតុនាពេលខាងមុខមានលទ្ធភាពបង្កើតប៉ុស្តិ៍ត្រួតពិនិត្យនៅតាមព្រំដែនក្នុងរយៈពេលកំណត់មួយ។ កន្លងមក ប្រទេសដាណឺម៉ាកក៏ធ្លាប់បានបង្កើតប៉ុស្តិ៍ត្រួតពិនិត្យតាមព្រំដែនខ្លួនក្នុងឆ្នំា ២០០៩ និងប្រទេសប៉ូឡូញក្នុងឆ្នំា ២០១៣ នាឱកាសសន្និសីទអន្តរជាតិស្តីពីបញ្ហាអាកាសធាតុ។
យោងតាមលោក Bernard Cazeneuve បារំាងបានជូនដំណឹងនេះដល់ដៃគូរបស់ខ្លួនតំាងពីពាក់កណ្តាលខែតុលា និងថា ប៉ុស្តិ៍ត្រួតពិនិត្យតាមព្រំដែនបារំាងនឹងចាប់ផ្តើមធ្វើពីថ្ងៃទី១៣ វិច្ឆិកាដល់ថ្ងៃទី១៣ ធ្នូនៅច្រកព្រំដែនសមុទ្រ ផ្លូវគោក ផ្លូវអាកាស និងផ្លូវអយស្ម័យយាន។ សូមជម្រាបជូនថា បារំាងក៏ធ្លាប់បានអនុវត្តន៍នូវវិធានការដូចគ្នានេះនាឱកាសជំនួបកំពូល G៨ ឬមួយក៏ជំនួបកំពូលរបស់អង្គការអូតង់ក្នុងទីក្រុង Strasbourg កាលពីឆ្នំា ២០០៩។
យ៉ាងណាក៏ដោយ លោករដ្ឋមន្រ្តីមហាផ្ទៃបារំាង Bernard Cazeneuve បានអះអាងថា វិធានការបង្កើតប៉ុស្តិ៍ត្រួតពិនិត្យតាមព្រំដែនរយៈពេល ១ខែមិនមានជាប់ពាក់ព័ន្ធនឹងវិបត្តិលំហូរជនភៀសខ្លួន និងជនអន្តោប្រវេសន៍ដែលសហភាពអឺរ៉ុបកំពុងជួបប្រទះសព្វថ្ងៃទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ