ក្រោយរងភេរវកម្ម បារាំងនឹងសើរើឡើងវិញពីគម្រោងកាត់បន្ថយទ័ព
ដោយយោងទៅលើតម្រូវការដើម្បីប្រយុទ្ធប្រឆាំងអំពើភេរវកម្ម និងដើម្បីធានាការពារសន្តិសុខជូន ពលរដ្ឋបារាំង លោកប្រធានាធិបតី ហ្វ្រង់ស័រ ហូឡង់ បានប្រកាសកាលពីល្ងាចថ្ងៃពុធម្សិលមិញថា រដ្ឋាភិបាល នឹងសើរើ ពិចារណាឡើងវិញ ពីផែនការកាត់បន្ថយចំនួនកងទ័ព។ លោកហ្រ្វង់ស័រ ហូឡង់បានថ្លែងយ៉ាងដូច្នេះ នៅក្នុងឱកាសលោកថ្លែងសារជូនពរប្រចាំឆ្នាំដល់កងទ័ពបារាំង ដែលធ្វើឡើង នៅលើនាវាផ្ទុកយន្តហោះចម្បាំង Charles de Gaulle នៅកំពង់ផែក្នុងខេត្តទូឡុង ភាគខាងត្បូងបារំាង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
នៅក្នុងនយោបាយរឹតត្បិតចំណាយសាធារណៈ រដ្ឋាភិបាលបានចេញច្បាប់ស្តីពីកម្មវិធីយោធា ដែលគ្រោងនឹងកាត់បន្ថយចំនួនទ័ព ប្រមាណ ៣៣ ៦៧៥ ពីឆ្នាំ ២០១៤ ដល់ឆ្នាំ ២០១៩។ នយោបាយនេះបានធ្វើឲ្យកងទ័ពបារាំងមិនសូវសប្បាយចិត្ត។ ប៉ុន្តែ នៅក្រោយព្រឹត្តិការណ៍ភេរវកម្ម កាលពីសប្តាហ៍មុន ដែលបានសម្លាប់ អ្នកកាសែត ប៉ូលិស និងជនជាតិជ្វីហ្វ ១៧នាក់ ប្រមុខរដ្ឋាភិបាលបានកែប្រែកម្មវិធីនយោបាយរបស់ខ្លួនវិញ។
កាលពីថ្ងៃពុធម្សិលមិញ តាំងពីនៅលើនាវាដឹកយន្តហោះ Charles de Gaulle លោកប្រធានាធិបតីបារាំងបានថ្លែងថា រដ្ឋាភិបាលនឹងពិចារណាឡើងវិញលើរឿងកាត់បន្ថយចំនួនទ័ព ដែលនឹងធ្វើនៅក្នុងរយៈពេល៣ឆ្នាំ ទៅមុខ ពោលគឺធ្វើយ៉ាងណាឲ្យបារាំងមានចំនួនទ័ពគ្រប់គ្រាន់ ទៅតាមតម្រូវការ ចាំបាច់ដើម្បីប្រយុទ្ធប្រឆាំងនឹងអំពើភេរវកម្ម។
លោកប្រធានាធិបតីបារាំងបានបញ្ជាក់ផងដែរថា ថវិកាកងទ័ពប្រចាំឆ្នាំ ប្រមាណ ៣១ពាន់៤រយលាននឹងមិនត្រូវប៉ះពាល់ រហូតដល់ឆ្នាំ ២០១៦ខាងមុខ។ នៅក្នុងទិសដៅទប់ស្កាត់ និងប្រយុទ្ធប្រឆាំងនឹងអំពើភេរវកម្ម ក្រៅតែពីពង្រាយទ័ពយ៉ាងសន្ធឹកសន្ធាប់១ម៉ឺន ៥រយនាក់ នៅលើទឹកដីបារំាងហើយនោះ រដ្ឋាភិបាលបារាំងបានសម្រេចបញ្ជូន Charles de Gaulle នាវាចម្បាំង ដ៏មហិមារបស់បារាំង ទៅអ៊ីរ៉ាក់។ នាវាផ្ទុកយន្តហោះចម្បាំង Charles de Gaulle ដែលឆ្លងកាត់តាមឈូងសមុទ្រពែរ្ស នឹងទៅជួយពង្រឹងប្រតិបត្តិការរបស់យន្តហោះចម្បាំងរបស់បារាំងដែលកំពុងចូលរួមក្នុងប្រតិបត្តិការប្រយុទ្ធប្រឆាំងនឹងក្រុមជីហាត រដ្ឋអ៊ីស្លាម នៅអ៊ីរ៉ាក់។
“បច្ចុប្បន្ន ស្ថានការណ៍ដែលកំពុងកើតមាន នៅតំបន់ដើមបូព៌ាជា ហេតុផលដែលធ្វើនាវាCharles de Gaulle ត្រូវតែបោះយុថ្កា មានវត្តមាននៅទីនោះ។ Charles de Gaulle នឹងជួយផ្តល់គ្រប់មធ្យោបាយ ទៅតាមស្ថានការណ៍តម្រូវ ដែលអាចតានតឹងខ្លាំង។” នេះជាប្រសាសន៍របស់លោកប្រធានាធិបតីបារាំង នៅមុនពេលលោកចូលរួមជូនដំណើរCharles de Gaulle ដែលត្រូវបំពេញបេសកកម្មរយៈពេល៥ខែ នៅមហាសមុទ្រឥណ្ឌា។
សូមបញ្ជាក់ថា កាលពីថ្ងៃអង្គារទី ១៣មករា គឺនៅ៦ថ្ងៃក្រោយអំពើភេរវកម្មវាយប្រហារទៅលើអ្នកកាសែត ប៉ូលិស និងជនជាតិជ្វីហ្វ ក្នុងក្រុងប៉ារីស សភាទាំងពីរជាន់ថ្នាក់របស់បារាំងបានបោះឆ្នោតជាឯកច្ឆន្ទ បើកភ្លើងខៀវឲ្យបារាំងបន្តបេសកម្មប្រយុទ្ធប្រឆាំងនឹងក្រុមជីហាត នៅក្នុងប្រទេសអ៊ីរ៉ាក់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ