អ៊ីតាលីចង់បានកិច្ចសហប្រតិបត្តិការខ្លាំងក្លាដើម្បីទប់ទល់អន្តោប្រវេសន៍ខុសច្បាប់
ចុះផ្សាយនៅថ្ងៃ៖
ស្តាប់ - ០៧:០៩
បន្ទាប់ពីបានសង្គ្រោះនាវាដឹកទំនិញ«Ezadeen» និងជនអន្តោប្រវេសន៍ខុសច្បាប់ស៊ីរីជិត៤០០នាក់ ឱ្យផុតពីសេចក្តីស្លាប់ ពេលវេលានៃការបញ្ចេញប្រតិកម្មនយោបាយបានធ្លាក់មកជាបន្តបន្ទាប់នៅអ៊ីតាលី។ រដ្ឋមន្ត្រីក្រសួងមហាផ្ទៃអ៊ីតាលីបានគូសបញ្ជាក់ថាត្រូវការទំនាក់ទំនងនិងកិច្ចសហប្រតិបត្តិការប្រសើរជាងនេះ ជាមួយប្រទេសជិតខាងពាក់ព័ន្ធដូចជាក្រិក និងតួកគី ដើម្បីប្រយុទ្ធប្រឆាំងនឹងចរន្តជួញដូរអន្តោប្រវេសន៍ខុសច្បាប់។
ជាសរុបមានជនអន្តោប្រវេសន៍ខុសច្បាប់ចំនួន ៣៦០នាក់ សុទ្ធសឹងជាជនជាតិស៊ីរី ៣៤៣នាក់ប្រុស ៤៣នាក់ស្រី ក្នុងនោះបួននាក់មានផ្ទៃពោះផង និង៧៤នាក់ ជាក្មេងមិនទាន់ពេញវ័យ។ ដំណើររត់ភៀសខ្លួន មានរយៈពេលមិនដល់១៥ថ្ងៃទេ។ ពួកគេបានចាកចេញពី ស៊ីរី ប្រទេសកំណើត សំដៅតួកគីដោយឆ្លងកាត់ប្រទេសលីបង់ជិតខាង តាមជើងយន្តហោះ ដើម្បីមកឡើងនាវាដឹកសត្វ នៅថ្ងៃទី ៣១ ធ្នូ ក្នុងតម្លៃដ៏ថ្លៃ ប្រមាណពី ៤០០០ ទៅ ៨០០០ដុល្លារ សម្រាប់អ្នកដំណើរម្នាក់ៗ ដែលចង់រត់គេចសង្គ្រាម។
បើតាមនាយករដ្ឋមន្ត្រីអ៊ីតាលី នាវា Ezadeen បានចាកចេញពីកំពង់ផែតួកគី តែបើតាមវិបសៃត៍ចរាចរណ៍នាវា កប៉ាលអេហ្សាឌិន បានចាកចេញពី កំពង់ផែ ហ្វាម៉ាហ្គូស្ត របស់ប្រទេសស៊ីប ក្រោមការបញ្ជារបស់តួកគី បន្ទាប់ពីធ្វើដំណើរចេញមកពីប្រទេសស៊ីរី។ ហើយតើតាមវិបសៃត៍ឯកទេសផ្នែកចរាចរណ៍សមុទ្ទដដែល នាវាមានទិសដៅផ្លូវការសំដៅទៅកាន់កំពុងផែ សែត របស់បារាំង។
ប៉ុន្តែដំណើររបស់ពួកគេត្រូវបញ្ឈប់កណ្តាលមហាសាគរមេឌីទែរ៉ាណេ ព្រោះអ្នកបើកបរនាវា បានរត់បាត់ បណ្តោយឱ្យនាវាបរទៅមុខពេញមួយទំហឹងរហូតទាល់តែអស់ប្រេង និងទម្រាំឆ្មាំសមុទ្ទគ្រប់គ្រង និងតម្រង់ទិសសណ្តោងមកដល់ដីគោកអ៊ីតាលីបាន។ ប៉ុន្តែការអ្នកបើកបរដែលបាំងមុខជិតរហូតមក អាចឱ្យគេសន្និដ្ឋានបានថា កាំពីទែនបានបោះបង់តួនាទីជាបញ្ជានាវាមែន តែទំនងជាមិនបានចាកចេញពីនាវាទេ ! អ្នកបើកបរនោះទំនងជាអាចកំពុងបន្លំក្នុងហ្វូងអន្តោប្រវេសន៍ខុសច្បាប់ផ្សេងៗទៀតផង។
ក្រុមឈ្មួញ មេខ្យល់បានថែមទាំងប៉ុស្តិ៍ក្នុងទំព័រហ្វេសប៊ូល ទាក់ទាញរកភ្ញៀវ ម្នាក់៥៥០០ដុល្លារ ឬ ៤៥០០ដុល្លារសម្រាប់ក្រុមចាប់ពី២៥នាក់ឡើងទៅ។ ហើយជាលើកទីមួយ នៅថ្ងៃនេះ កាពីទែននាវាដឹកនាំទំនិញមួយទៀត ឈ្មោះ blue sky M ដែលដឹកជនស៊ីរីរត់ភៀសខ្លួនចំនួន ៨០០នាក់ មកដល់អ៊ីតាលីកាលពីថ្ងៃ១មករា បានប្រាប់អ្នកកាសែតសុខចិត្តបើកបរនាវាមកអឺរ៉ុបជាថ្នូរនឹងប្រាក់១៥០០០ ព្រមទាំងក្តីសង្ឃឹមជួយសង្គ្រោះគ្រួសារឱ្យរត់ភៀសខ្លួនមកអឺរ៉ុប។
ជួញដូរអន្តោប្រវេសន៍ខុសច្បាប់ តាមនាវាដឹកទំនិញ នាវាពាណិជ្ជកម្ម រួចបោះបង់ចោលនាវានោះ គឺជាយុទ្ធសាស្ត្រថ្មីរបស់ពួកមេខ្យល់ ឬអ្នករកស៊ីពង្រត់អន្តោប្រវេសន៍មកអឺរ៉ុប។ នាវាអេហ្សាឌិន គឺជាករណីទីបី បញ្ជាក់យ៉ាងច្បាស់ពីជំនួញបែបថ្មី។ ក្នុងរយៈពេលតែបីសប្តាហ៍អ៊ីតាលីបានទទួលជនភៀសខ្លួនខុសច្បាប់បែបនេះ ដល់ទៅជិតពីរពាន់នាក់។ ជិត៨០០នាក់ កាលពីយប់ថ្ងៃឆ្លងឆ្នាំសកល ជិត៨០០នាក់ដែរ កាលពីថ្ងៃទី ២០ធ្នូ និងជិតបួនរយនាក់នៅលើកនេះ។ ជារៀងរាល់លើក នាវាទាំងបានចាកចេញពីប្រទេសតួកគី ដូចគ្នា ហើយឈ្មួញ បានបោះបង់នាវា ឬ ប្រកាសថានាវាខូច សុំជំនួយពីឆ្មាំសមុទ្ទអឺរ៉ុប។ ជំនួញបែបនេះ អាចផ្តល់ផលចំណេញដល់លានអឺរ៉ូ ក្នុងមួយជើងៗ ហេតុដូច្នេះហើយបានអ្នកបើកបរមិនខ្លាចនឹងចំណាយនាវាកញ្ចាស់ទ្រុឌទ្រោមឡើយ។
ប៉ុន្តែគេត្រូវរង់ចាំដល់ល្ងាចថ្ងៃសៅរ៍ទី ៣មករានេះ ទើបគេឃើញរដ្ឋាភិបាលអ៊ីតាលី បញ្ចេញប្រតិកម្ម ទាក់ទងនឹងជំនួញអន្តោប្រវេសន៍ខុសច្បាប់បែបថ្មី តាមរយៈប្រសាសន៍របស់រដ្ឋមន្ត្រីក្រសួងមហាផ្ទៃ ដោយប្រកាសថា គេត្រូវការឱ្យគ្រប់ប្រទេសចូលរួមកម្ចាត់ការត់ពន្ធមនុស្ស ក្នុងន័យនេះ អ៊ីតាលីបានភ្ជាប់ទំនាក់ទំនងជាមួយនឹងអាជ្ញាធរតួកគីរួចរាល់ហើយ ដើម្បីរួមគ្នាប្រយុទ្ធប្រឆាំងជាដាច់ខាត នឹងការជួញដូរមនុស្ស ឱ្យដល់ឬសគល់។ អ៊ីតាលីនឹងពង្រឹងការសហការជាមួយ ក្រិក ដើម្បីចាប់នាវាដឹកទំនិញមានផ្ទុកជនអន្តោប្រវេសន៍ស៊ីរីឱ្យបានមុនមកដល់ក្បែរឆ្នេរអ៊ីតាលីទាន់។
អឺរ៉ុប និងរដ្ឋាភិបាលនៃប្រទេសជាសមាជិកសហភាព មិនអាចបដិសេធធ្វើមិនដឹងថាមានអំពីBusinessថ្មីនេះឡើយ ប៉ុន្តែអ្នកនាំពាក្យអឺរ៉ុប បានត្រឹមអះអាងថា មធ្យោបាយថ្មីសម្រាប់ប្រយុទ្ធប្រឆាំងនឹងការជួញដូរអន្តោប្រវេសន៍ខុសច្បាប់ នឹងក្លាយជាអាទិភាពសំខាន់មួយ ក្នុងចំណោមអាទិភាពសំខាន់ៗប្រចាំឆ្នាំ២០១៥របស់សហភាពអឺរ៉ុប៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ