អ៊ីតាលី ប្រឈមមុខតែម្នាក់ឯង ទទួលជនភៀសខ្លួនអាហ្វ្រិករាប់ពាន់នាក់
ជនភៀសខ្លួនអាហ្រ្វិកដែលឆ្លងទូកផ្សងជីវិត មកកាន់ដែនដីអ៊ីតាលី មានចំនួនកាន់តែច្រើន ហើយគ្រោះថ្នាក់លេចទូកកណ្តាលសមុទ្រ បានកើតឡើងជាញឹកញាប់ដែរ។ កាលពីថ្ងៃអាទិត្យ ទី១២ មេសា ជនភៀសខ្លួន ៤០០នាក់ បានបាត់ខ្លួនក្នុងសមុទ្រ មិនទាន់រកឃើញនៅឡើយ ហើយនៅថ្ងៃព្រហស្បតិ៍ទី ១៦ មេសានេះ ទៀត មានជនភៀសខ្លួន៤១នាក់ បានលង់ទឹកសមុទ្រស្លាប់។ ប្រឈមមុខនឹងការមកដល់ នូវជនភៀសខ្លួនដ៏ច្រើនសន្ធឹកសន្ធាប់បែបនេះ អ៊ីតាលីដែលកំពុងតែខ្វះខាតស្រាប់ទៅហើយ បានរិះគន់សហភាពអឺរ៉ុបថា បានឈរឱបដៃមើល ទុកឲ្យអ៊ីតាលីត្រដាបត្រដួសតែម្នាក់ឯង។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:២០
សង្រ្គាមកាប់សម្លាប់ និងគ្រោះទុរភិក្សនៅតំបន់ដើមបូព៌ា តាមប្រទេសអាហ្វ្រិកខាងកើត បានជំរុញប្រជាជនអាហ្វ្រិករាប់ម៉ឺននាក់ ឲ្យរត់ចោលផ្ទះសម្បែង ផ្សងវាសនាធ្វើដំណើរមកកាន់ទ្វីបអឺរ៉ុប។ ជនភៀសខ្លួន បានជិះទូកទាំងក្រុមៗ ឆ្លងពីប្រទេសលីប៊ី មកកាន់ដីកោះតំបន់ស៊ីស៊ីល ភាគខាងត្បូងប្រទេសអ៊ីតាលី ដោយត្រូវឆ្លងកាត់រលកសមុទ្រមេឌីទែរ៉ាណេ។ គ្រោះថ្នាក់លេចទូក មានជាហូរហែរ ដែលគេបានដាក់ងារសមុទ្រមេឌីទែរ៉ាណេ ជាទីវាលកប់ខ្មោចទៅហើយ។
កាលពីថ្ងៃព្រហស្បតិ៍ ទី ១៦ មេសា ជនភៀសខ្លួនចំនួន៤៥នាក់ បានជិះទូកធ្វើពីពោងកៅស៊ូរខេករខាក ឆ្លងពីប្រទេសលីប៊ី មកកាន់អ៊ីតាលី។ ទូកពោងបានធ្លាយ ហើយលេចនៅកណ្តាលសមុទ្រ។ នាវាល្បាតរបស់អ៊ីតាលី បានស្រង់យកបានអ្នកនៅរស់ចំនួន៤នាក់ ចំណែក ៤១នាក់ផ្សេងទៀត គេគ្មានសង្ឃឹមថានៅរស់នោះទេ។ ដូចគ្នានេះ ផងដែរ កាលពីថ្ងៃអាទិត្យ ទី ១២ មេសា កូននាវាមួយដែលមានផ្ទុកជនភៀសខ្លួនចំនួន ៤០០នាក់ ក៏បានបាត់នៅក្នុងសមុទ្រម៉េឌីទែរ៉ាណេដែរ។ រហូតមកដល់ពេលនេះ គេនៅមិនទាន់រកឃើញអ្នកនៅរស់រានមានជីវិត រឺក៏សាកសពនៅឡើយទេ។
លោក រដ្ឋមន្រ្តីការបរទេសអ៊ីតាលី បានសម្តែងការមួរម៉ៅ ក្តៅក្រហាយ នឹងភាពព្រងើយកន្តើយរបស់សហភាពអឺរ៉ុប និងបណ្តាប្រទេសអឺរ៉ុបផ្សេងទៀត។ លោកថា បញ្ហាជនភៀសខ្លួន ជាបញ្ហារបស់ប្រទេសអ៊ឺរ៉ុបទាំងអស់គ្នា ប៉ុន្តែផ្ទុយទៅវិញ គេទុកឲ្យអ៊ីតាលីតែម្នាក់ឯង ជាអ្នកដោះស្រាយបញ្ហា។
ក្រុង Reggio ដែលស្ថិតនៅភាគខាងត្បូង អ៊ីតាលី កំពុងតែជួបបញ្ហា ដោយការមកដល់របស់ក្រុមអ្នកភៀសខ្លូន យ៉ាងសន្ធឹកសន្ធាប់។ ក្រៅពីខ្វះខាត កន្លែងស្នាក់នៅ នៅតាមមណ្ឌលទទួលជនភៀសខ្លួន ទីក្រុងនេះ កំពុងតែប្រឈមមុខនឹងបញ្ហាអនាម័យ និងសុខភាព ដោយសារតែមានជនភៀសខ្លួន រាប់ពាន់នាក់ ហើយដែលអាចមានជំងឺឆ្លងផ្សេងៗ។ អ៊ីតាលី ដែលកំពុងតែជួបវិបត្តិសេដ្ឋកិច្ចយ៉ាងធ្ងន់ធ្ងរ គ្មានលទ្ធភាព គ្រប់គ្រាន់ ក្នុងការទំនុកបំរុងជនភៀសខ្លួន ទាំងអស់នេះទេ។
គួរបញ្ជាក់ផងដែរថា អ៊ីតាលីគឺជាច្រក ដែលជនភៀសខ្លួន ធ្វើដំណើរចូលមកក្នុងទឹកដីអឺរ៉ុប។ ព្រំដែនសមុទ្រអ៊ីតាលី ក៏ជាព្រំដែនរបស់អឺរ៉ុបផងដែរ។ បើរាប់ចាប់ពីដើមឆ្នាំ ២០១៥នេះ មានជនភៀសខ្លួនជាង៥០០នាក់ហើយ ដែលបានស្លាប់ លង់ទឹកសមុទ្រ ក្នុងពេលជិះទូកឆ្លងចូលមកអ៊ីតាលី នេះនៅមិនទាន់រាប់ករណីថ្មីៗ ទាំងពីរខាងលើទេ។ បើសរុបតាមមណ្ឌលទទួលជនភៀសខ្លួនទាំងអស់នៅអ៊ីតាលី មានមនុស្សយ៉ាងហោចណាស់ ៨ម៉ឺននាក់ ដែលកំពុងតែរងចាំជំនួយ។ អ៊ិតាលី ក៏ដូចជាអង្គការមនុស្សធម៌នានា បានស្តីបន្ទោសដោយចំៗ ទៅលើសហភាពអឺរ៉ុប នឹងប្រទេសអឺរ៉ុបផ្សេងទៀត ដែលបានតែមាត់តែខ្វះការទទួលខុសត្រូវ និងសាមគ្គីភាព ទុកឲ្យអ៊ីតាលី ដោះស្រាយបញ្ហាតែម្នាក់ឯង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ