សមុទ្ទមេឌីទែរ៉ាណេ ជាផ្នូរកប់ខ្មោចអន្តោប្រវេសន៍ខុសច្បាប់ ដល់ថ្ងៃណា ?!
ចុះផ្សាយនៅថ្ងៃ៖
ស្តាប់ - ០៦:១៩
សេណារីយោដដែលបានកើតឡើងជាថ្មីនៅក្នុងផ្ទៃសមុទ្ទអ៊ីតាលី ... ពីរថ្ងៃក្រោយការចាប់បាននាវាដឹកទំនិញ មានបង្កប់ជនអន្តោប្រវេសន៍ខុសច្បាប់៧០០នាក់ នៅយប់មិញនេះ នាវាដឹកទំនិញមួយទៀតរបស់ប្រទេសសៀរ៉ាឡេអូន ដែលមានផ្ទុកជនភៀសខ្លួនខុសច្បាប់ ៤៥០នាក់ ភាគច្រើនជាជនជាតិស៊ីរី បានទាញសញ្ញាអាសន្នសុំការសង្គ្រោះ ពីឆ្មាំសមុទ្ទអ៊ីតាលី ព្រោះកាពីទែនបានរត់គេចខ្លួនបោះបង់នាវាចោលកណ្តាលមហាសាគរ។ពេលនេះឧទ្ធម្ភាគចក្រយោធាអ៊ីតាលី អាចគ្រប់គ្រង់ស្ថានការណ៍និងកំពុងជាតម្រង់នាវាឆ្ពោះមកកាន់ដីគោក។ សោកនាកម្ម អាចបញ្ចៀសបានមែន ប៉ុន្តែសំណួរនៅចោទឡើងដដែល ថាតើត្រូវធ្វើដូចម្តេច ទើបទប់ស្កាត់រលកជនភៀសខ្លួនខុសច្បាប់តាមសមុទ្ទមេឌីទែរ៉ាណេ ? ហេតុអ្វីបានចំនួនជនរត់ភៀសខ្លួនតាមសមុទ្ទមេឌីទែរ៉ាណេ កើនឡើងឥតឈប់ ? តើសហភាពអឺរ៉ុបចាត់វិធានការបែបណា ប្រឆាំងនឹងចរន្តនេះ ?
បើតាមអង្គការអន្តោប្រវេសន៍អន្តរជាតិ ឆ្នាំ២០១៤ គឺជាឆ្នាំដែលអាក្រក់បំផុតសម្រាប់ការរត់ភៀសខ្លួនតាមសមុទ្ទមេឌីទែរ៉ាណេ។ មានស្លាប់យ៉ាងហោចណាស់ ២៩០០នាក់ ពោលគឺបួនដងលើសឆ្នាំ២០១៣ ដែលមានអ្នកសាកល្បងឆ្លងសមុទ្ទមេឌីទែរ៉ាណេស្លាប់តែ៧០០នាក់។ នេះជាតួលេខផ្លូវការ ដែលមិនរាប់ចំនួនអ្នកបាត់ខ្លួនទេ។ កាលពីខែសីហា មានទូកដឹកជនភៀសខ្លួនមួយបានលិច ធ្វើមនុស្សអស់យ៉ាងហោចណាស់ ៥០០នាក់បាត់ខ្លួន។
ចំនួនអ្នកស្លាប់ច្រើន មកពីចំនួនអ្នកភៀសខ្លួនក៏កើនឡើងខ្លាំង។ កាលពីឆ្នាំ២០១៣ មានជនអន្តោប្រវេសន៍ប្រមាណតែ៦ម៉ឺននាក់ប៉ុណ្ណោះ ទល់នឹងជាង១៣០ ០០០នាក់ នៅឆ្នាំ២០១៤ និងគិតត្រឹមតែកញ្ញាសោះ។ ការកើនឡើងនេះ ដោយសារមូលហេតុច្រើន ៖ សំខាន់ជាងគេគឺបណ្តាលមកវិបត្តិនិងជម្លោះប្រដាប់អាវុធច្រើននៅលើពិភពលោក មានជាអាទិ៍សង្គ្រាមនៅស៊ីរី។ មូលហេតុទីពីរ បែបចាស់គំរិលបន្តិច គឺដោយឆ្នេរសមុទ្ទលីប៊ី មិនសូវមានការត្រួតពិនិត្យខ្លាំងដូចសម័យលីប៊ីដឹកនាំដោយ កាដាហ្វ៊ី ដែលបានចុះហត្ថលេខាជាមួយអតីតប្រធានាធិបតីអ៊ីតាលី ស៊ីលវីយូ បែលុយស្កូនី ទប់ស្កាត់ចរន្តភៀសខ្លួនតាមសមុទ្ទ ជាថ្នូរនឹងប្រាក់ជំនួយ៥ពាន់លាន។ តែឥលូវលីប៊ី ហែកហួរ មានវិបត្តិផ្ទៃក្នុង ទើបបានជាក្រុមមេខ្សល់អាចធ្វើសកម្មភាពបានស្រេចនឹងចិត្ត។ ហើយគេពិតជាលំបាកកម្ចាត់ក្រុមមេខ្យល់ដែលខ្លះជាអ្នកចង់រត់ភៀសខ្លួនមកអឺរ៉ុបដែរណាស់ ព្រោះមិនអាចធ្វើអង្កេតដូចអឺរ៉ុបចង់បាន មានប៉ូលិស មានចៅក្រម ... នៅក្នុងប្រទេសលីប៊ី ឬប្រទេសផ្សេងទៀតតាមបណ្តោយឆ្នេរមេឌីទែរ៉ាណេឡើយ។ បារាំងមានកងប៉ូលិសពិសេសផ្នែកប្រយុទ្ធប្រឆាំងនឹងបណ្តាញរត់ពន្ធអន្តោប្រវេសន៍ ប៉ុន្តែគ្មានមធ្យោបាយធ្វើការនៅក្រៅប្រទេសបារាំងទេ។
តើអ៊ីតាលីប្រយុទ្ធប្រឆាំងនឹងចរន្តអន្តោប្រវេសន៍ នៅមេឌីទែរ៉ាណេ តែម្នាក់ឯង ?
ចរន្តជនភៀសខ្លួនខុសច្បាប់ចូលអឺរ៉ុបមានច្រើនច្រកណាស់ ជាផ្លូវគោក ដូចជាចូលអឺរ៉ុបដោយខុសច្បាប់តាមប្រទេសតួកគី ប៊ុលហ្ការី ឬក្រិក ឬតាមផ្លូវអាកាស តាមរយៈលិខិតក្លែងក្លាយផងក៏មាន។ មេឌីទែរ៉ាណេ អាចច្រកធំ និងគ្រោះថ្នាក់ដល់ស្លាប់ច្រើនជាងគេ និងជិតជាងគេ បើគិតតាមផ្លូវទឹក។
មិនមែនតែអ៊ីតាលីទេ ដែលបញ្ចេញសកម្មភាពប្រយុទ្ធប្រឆាំងនឹងចរន្តអន្តោប្រវេសន៍នេះ ! អឺរ៉ុបគ្មានកន្លែងនិងលទ្ធភាពទទួលជនភៀសខ្លួនទៀតទេ តែអឺរ៉ុបត្រូវតែប្រឈមមុខនឹងពាក្យថាមនុស្សធម៌ ស្របតាមច្បាប់អន្តរជាតិ។ ប្រទេសជាសមាជិកសហភាពអឺរ៉ុបបានសាកល្បងធ្វើការរួមគ្នា តាំងពីជាច្រើនឆ្នាំមកហើយ ដើម្បីរកដំណោះស្រាយ។ អឺរ៉ុប បានបង្កើតភ្នាក់ងារព្រំដែនឈ្មោះថា Frontex ដែលមានភារកិច្ច តាមធម្មតាតាំងពីឆ្នាំ២០០៥មក រៀបចំប្រតិបត្តិការល្បាតនិងសង្គ្រោះនៅមេឌីទែរ៉ាណេ។ ហើយកាលពីខែតុលា ២០១៣ អឺរ៉ុបបានបង្កើតប្រតិបត្តិការមួយមានឈ្មោះ ថា Mare Nostrum ដើម្បីជួយទូកក្នុងស្ថានភាពអាសន្ន។
ប៉ុន្តែទាំង Frontex និង Mare Nostrum ដូចជាគ្មានប្រសិទ្ធិភាពទប់ស្កាត់ចរន្តអន្តោប្រវេសន៍សោះ។ បើតាមអ្នកសង្កេតការណ៍ខ្លះ យល់បញ្ច្រាសទៅវិញ ថាជនភៀសខ្លួនកាន់តែមានសេចក្តីក្លាហានជាងមុន ព្រោះពេលឆ្លងសមុទ្ទ ចូលដល់ដែនទឹកអ៊ីតាលីហើយ អាចសុំការសង្គ្រោះបាន មិនប្រថុយស្លាប់ដូចពេលមុនពេកទេ។ ពីមុនជាការភៀសខ្លួនរត់ពន្ធ តាមទូកតូចៗ ឥលូវជាមធ្យោបាយធំៗ ជានាវាដឹកទំនិញ ធំៗ ដូចយើងបានឃើញជាក់ស្តែងពីរករណីចុងក្រោយនេះ។
ជនភៀសខ្លួនទាំងអស់នោះ នៅពេលមកដល់ដែនដីអ៊ីតាលី ឬអឺរ៉ុបហើយ តើពួកគេនឹងក្លាយទៅយ៉ាងណា ?
ជារួម មានជនភៀសខ្លួនខុសច្បាប់តិចណាស់ ដែលនឹងត្រូវបញ្ជូនត្រលប់ទៅប្រទេសកំណើតវិញ។ នៅពេលណាដែលជនអន្តោប្រវេសន៍ទាំងប្រកាសខ្លួនថាមកពីប្រទេសមានសង្គ្រាម ដូចយ៉ាងស៊ីរី អេរីត្រេ ប៉ាឡេស្ទីន... ពួកគេនឹងត្រូវការពារដោយច្បាប់អន្តរជាតិ មានតែជនជាតិ ម៉ារុក អាល់ហ្សេរី ឬទុយនីស៊ី ដែលអាចរងគ្រោះបណ្តេញទៅប្រទេសវិញនោះ។
ក្នុងករណីនាវាដឹកទំនិញមានផ្ទុកជនភៀសខ្លួន៤៥០នាក់ថ្ងៃនេះ ពួកគេភាគច្រើនជាជនជាតិស៊ីរី
ជាញឹកញយ និងដោយចេតនា ជនភៀសខ្លួន គ្មានក្រដាសស្នាមនឹងខ្លួនទេ ! បន្ទាប់ពីឃុំឃាំង មួយរយៈអ្នកខ្លះត្រូវបញ្ជូនត្រលប់ទៅស្រុក ខ្លះក៏បានសិទ្ធិជាជនភៀសខ្លួននយោបាយ និងខ្លះទៀតត្រូវដោះលែងឱ្យមានសេរី ដើរពាសវាលពាសកាល ផ្សងព្រេងពេញអឺរ៉ុប។ មិនដឹងថាខ្សែជីវិតពួកគេនឹងក្លាយទៅយ៉ាងណាខ្លះទេ។ ប៉ុន្តែទិសដៅចម្បងរបស់ជនភៀសខ្លួនតាមសមុទ្ទមេឌីទែរ៉ាណា តែត្រូវការអឺរ៉ុបធ្វើជាឈ្នាន់ មិនចង់រស់នៅត្រឹមបារាំង ឬអ៊ីតាលីទេ ភាគច្រើនសំដៅទិសទៅអង់គ្លេស៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ