ក្តីស្រមៃចង់ពង្រឹងអំណាចប្រធានាធិបតីរបស់លោកអ៊ែរដូហ្គានត្រូវរលាយដូចផ្សែង
ចុះផ្សាយនៅថ្ងៃ៖
ស្តាប់ - ០៥:០៣
គណបក្សដើម្បី យុត្តិធម៌ និងអភិវឌ្ឍន៍ AKP ដែលកាន់អំណាចផ្តាច់មុខតែម្នាក់ នៅតួកគី អស់១៣ឆ្នាំមកហើយ ត្រូវតម្រូវឲ្យចាប់ដៃ ជាមួយបក្សប្រឆាំង ដើម្បីបង្កើតរដ្ឋាភិបាលចម្រុះ។ គណបក្សកាន់អំណាចរបស់លោកប្រធានាធិបតីរេស៊េប តាយីប អ៊ែរដូហ្គាន ទើបទទួលបរាជ័យ យ៉ាងអាម៉ាស់មុខ ជាលើកទី១ នៅក្នុងការបោះឆ្នោតសភា កាលពីថ្ងៃអាទិត្យ ដោយមិនអាចប្រមូលបានសំឡេងភាគច្រើន នៅសភា ដើម្បីបង្កើតរដ្ឋាភិបាលតែម្នាក់ឯង។ កាលពីថ្ងៃអង្គារ លោកប្រធានាធិបតី អ៊ែរដូហ្គាន បានទទួលយល់ព្រម ការចុះចេញពីអំណាចរបស់រដ្ឋាភិបាល និងបានដាក់បន្ទុកឲ្យនាយករដ្ឋមន្រ្តីតួកគី អស់អាណត្តិបង្កើតរដ្ឋាភិបាលថ្មី ដែលនឹងមានការចូលរួមពីរដ្ឋាភិបាល។
នៅតួកគី ការបោះឆ្នោតសភាបានចប់ទៅតាំងពីថ្ងៃអាទិត្យ។ លទ្ធផលបោះឆ្នោតបណ្តោះអាសន្ន ត្រូវបានប្រកាសភ្លាមៗ កាលពីថ្ងៃចន្ទ ដែលបង្ហាញ ថា គណបក្សកាន់អំណាច AKP បានទទួលសំឡេងឆ្នោត ប្រមាណ ៤០ភាគរយ ចំណែកសំឡេងសល់ពីនោះ ធ្លាក់ទៅក្នុងដៃរបស់គណបក្សប្រឆាំងបីផ្សេងទៀត។ សំឡេងឆ្នោត ៤០ភាគរយ ថ្វីដ្បិតតែ ច្រើនជាងគេ បើប្រៀបធៀបនឹងគណបក្សប្រឆាំង ប៉ុន្តែ ជាមួយសំឡេងតែ ៤០ភាគរយនេះ គណបក្សកាន់អំណាច មិនអាចបង្កើតរដ្ឋាភិបាល តែម្នាក់រួចទេ។ នេះជាលើកទីមួយក្នុងប្រវត្តិបោះឆ្នោត របស់គណបក្សAKP ដែលបានទទួលសំឡេងឆ្នោត មិនគ្រប់គ្រាន់ ដើម្បីបង្កើតរដ្ឋាភិបាលតែម្នាក់ឯង។ ក្នុងរយៈពេល១៣ឆ្នាំមកនេះ គណបក្សដើម្បីយុត្តិធម៌ និងអភិវឌ្ឍន៍តួកគី របស់លោកប្រធានាធិបតី អ៊ែរដូហ្គាន តែងឈ្នះឆ្នោត ទទួលបានអាសនៈភាគច្រើន នៅសភា និងអាចបង្កើតរដ្ឋាភិបាលតែម្នាក់ឯង ដោយមិនចាំបាច់ ត្រូវការគណបក្សដទៃ។
ប៉ុន្តែ នៅក្នុងការបោះឆ្នោត កាលពីថ្ងៃអាទិត្យ គណបក្សកាន់អំណាចបានទទួលបរាជ័យដោយមិនអាចទទួលបានអាសនៈចំនួន ៣៣០ នៅសភា ទៅតាមការគ្រោងទុក ដើម្បី អាចបង្កើតរដ្ឋាភិបាលផ្តាច់មុខ។ គណបក្សកាន់អំណាចបានទទួលអាសនៈតែ ២៥៨ គឺបាត់បង់សំឡេងឆ្នោត ជាង២លានសំឡេង។ បរាជ័យរបស់គណបក្សកាន់អំណាចនៅក្នុងការបោះឆ្នោតសភា គឺមានន័យ ស្មើនឹងក្តីសង្ឃឹមរលាយដូចផ្សែងរបស់លោកប្រធានាធិបតីអ៊ែរដូហ្គានដែលចង់ប្រើលទ្ធផលបោះឆ្នោតសភា ដើម្បី ផលប្រយោជន៍ អំណាចផ្ទាល់ខ្លួន។ ត្រូវដឹងថា លោកប្រធានាធិបតី អ៊ែរដូហ្គាន បានដុតដៃដុតជើង ឃោសនាខ្លាំងណាស់ សម្រាប់គណបក្សAKP ព្រោះថា បើគណបក្សរបស់លោកឈ្នះ ដោយទទួលបានសំឡេងឆ្នោត ភាគច្រើននៅសភា នោះ គណបក្សរបស់លោកនឹងអាចមានសិទ្ធិកែប្រែរដ្ឋធម្មនុញ្ញ ដោយមិនចាំបាច់ការបោះឆ្នោតប្រជាមតិ ដើម្បី ប្តូរតួកគី ពីរបបសភា មករបបប្រធានាធិបតី មានន័យថា អំណាចប្រធានាធិបតីនឹងត្រូវពង្រឹង ខ្លាំងជាងមុន។
គឺមហិច្ឆតា ការចង់បានជ្រុល ក្នុងការប្រមូលអំណាចមកនៅក្នុងដៃ តែមួយរបស់ប្រធានាធិបតី នោះហើយ ដែលធ្វើឲ្យ ក្តីសង្ឃឹមរបស់លោកប្រធានាធិបតីត្រូវរលាយទៅវិញនោះ។ គណបក្សប្រឆាំងវិញ ក្រៅតែពីបរិហារពីការធ្លាក់ចុះនៃសេដ្ឋកិច្ច វិបត្តិគ្មានការងារធ្វើ នៅបានឆ្លៀតរិះគន់ មិនឈប់ និន្នាការទៅរករបបផ្តាច់ការនិយមរបស់លោកអ៊ែរដូហ្គាន ដើម្បីអូសទាញប្រជាជនម្ចាស់ឆ្នោត ដែលបារម្ភខ្លាចមានប្រធានាធិបតីប្រើអំណាចផ្តាច់ការ។
លទ្ធផលឆ្នោតបានបង្ហាញហើយថា នឹងគ្មានទេ អំណាចប្រធានាធិបតីផ្តាច់ការ។ គណបក្សរបស់លោកប្រធានាធិបតី អ៊ែរដូហ្គានគ្មានសំឡេងច្រើន ដើម្បីធ្វើព្យុះធ្វើភ្លៀងដូចមុន ប៉ុន្តែ ត្រូវ បង្ខំចិត្ត ចាប់ដៃ ជាមួយគណបក្សប្រឆាំងណាមួយ ដើម្បី បង្កើតរដ្ឋាភិបាលចម្រុះ។ ផ្ទុយទៅវិញ រហូតមកដល់ថ្ងៃនេះ គណបក្សប្រឆាំងទាំងបី ដែលបានទទួលអាសនៈនៅ សភា សរុប ២៩២ បានបញ្ជាក់ហើយថា ពួកគេមិនចង់ចូលរួមបង្កើតរដ្ឋាភិបាលចម្រុះ ជាមួយគណបក្សរបស់លោកប្រធានាធិបតីអ៊ែរដូហ្គានទេ។ តាំងពីនៅក្នុងយុទ្ធនាការឃោសនាបោះឆ្នោតម្ល៉េះ គណបក្សប្រឆាំងបានរិះគន់អំណាចផ្តាច់ការនិយម របស់លោកប្រធានាធិបតីអ៊ែរដូហ្គាន។ ដូច្នេះ ការចូលរួមគ្នារវាងគណបក្សកាន់អំណាច និងគណបក្សប្រឆាំងណាមួយ ដើម្បីបង្កើតរដ្ឋាភិបាលចម្រុះ គឺជារឿងដែលមិនអាចទៅរួច។
កាលពីថ្ងៃអង្គារ លោកប្រធានាធិបតីតួកគី រេស៊ិប តាយីប អ៊ែរដូហ្គាន បានដាក់បន្ទុកឲ្យនាយករដ្ឋមន្រ្តីអស់អាណត្តិ ចាប់ផ្តើមចរចា ដើម្បីបង្កើតរដ្ឋាភិបាលចម្រុះ។ គណបក្សដែលបានទទួលសំឡេងឆ្នោត នៅសភា មានពេល ៤៥ថ្ងៃ ដើម្បី ចរចាគ្នា បង្កើតឲ្យចេញរដ្ឋាភិបាលមួយ បើមិនដូច្នោះទេ សភាថ្មីនឹងត្រូវរំលាយ ហើយប្រជាជនតួកគីនឹងត្រូវត្រលប់ទៅបោះឆ្នោតសាជាថ្មី។ ការបោះឆ្នោតម្តងទៀត មិនមែនជាដំណឹងល្អ ទាំងសម្រាប់គណបក្សកាន់អំណាច និងគណបក្សប្រឆាំង។ ផ្ទុយទៅវិញ វានឹងធ្វើឲ្យខាតពេល ហើយប្រជាជនតួកគី ក៏អស់ទឹកចិត្ត បាត់ជំនឿពីអ្នកនយោបាយទៀត។
អនុប្រធានគណបក្សប្រឆាំង គឺគណបក្សប្រជាធិបតេយ្យប្រជាជន ដែលទទួលបានសំឡេងឆ្នោត ច្រើន និងមានអាសនៈរបស់ខ្លួន ជាលើកទី១ នៅរដ្ឋសភា តួកគី ធ្លាប់បានពន្លយពាក្យរដ្ឋាភិបាលចម្រុះ ដែលមានការចូលរួមពីគណបក្សប្រឆាំងទាំង៣ ដោយផាត់ចោល គណបក្សកាន់អំណាច។ សេណារីយ៉ូមួយនេះ ក៏ស្មុគស្មាញ ព្រោះថា គណបក្សប្រជាធិបតេយ្យប្រជាជន ដែលឈ្នះឆ្នោត ដោយសារមានការគាំទ្រពីជនជាតិភាគតិច គួក ជាសត្រូវរបស់គណបក្សជាតិនិយមជ្រុលរបស់តួកគី ដែលប្រឆាំង មិនចរចាសន្តិភាព ជាមួយនឹងពួកឧទ្ទាមគួក។ ដោយសារតែការផ្សំផ្គុំមិនត្រូវគ្នា អនាគតនយោបាយរបស់តួកគីត្រូវស្ថិតនៅស្រពិចស្រពិលនៅឡើយ។ តួកគីធ្លាប់ជួប អស្ថិរភាពនយោបាយម្តងហើយ នៅចន្លោះឆ្នាំ១៩៩០ និងឆ្នាំ២០០០ ពោលគឺការមុនចូលកាន់អំណាចរបស់គណបក្សរបស់លោកប្រធានាធិបតីអ៊ែរដូហ្គាន។ ស្រមោលអស្ថិរភាពនយោបាយនឹងអាចត្រលប់មកគ្របតួកគីម្តងទៀត បើសិនអ្នកនយោបាយតួកគីមិនអាចចុះសម្រុង ចរចា គ្នា បង្កើតរដ្ឋាភិបាលចម្រុះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ