OTAN ច្រានចោលសន្ធិសញ្ញា ដែលហាមឃាត់ទាំងស្រុងនូវអាវុធនុយក្លេអ៊ែរ
សមាជិកនៃអង្គការOTAN បានរួមគ្នាធ្វើការប្រកាសមួយ ដោយបានច្រានចោល មិនទទួលយកសន្ធិសញ្ញាហាមឃាត់ទាំងស្រុង នូវអាវុធនុយក្លេអ៊ែរ ដែលមានប្រទេសមួយចំនួនធំ បាននាំគ្នាចុះហត្ថលេខា នៅឯអង្គការសហប្រជាជាតិ។ សម្រាប់អង្គការអូតង់ សន្ធិសញ្ញាហាមឃាត់នុយក្លេអ៊ែរនេះ មិនបានឆ្លើយតបទៅនឹងស្ថានភាពស្មុគស្មាញនៃសន្តិសុខពិភពលោកបច្ចុប្បន្នទេ ហើយសន្ធិសញ្ញានេះក៏នឹងគ្មានប្រសិទ្ធិភាពអ្វី ជួយដល់ការកាត់បន្ថយអាវុធនុយក្លេអ៊ែរដែរ។
ចុះផ្សាយនៅថ្ងៃ៖
ស្តាប់ - ០២:១៦
ផ្តួចផ្តើមឡើងដោយប្រេស៊ីល អូទ្រីស មិចស៊ិក អាហ្វ្រិកខាងត្បូង និងនូវែលហ្សេឡង់ សន្ធិសញ្ញាហាមឃាត់អាវុធនុយក្លេអ៊ែរទាំងស្រុងមួយ ត្រូវបានអនុម័តឡើង កាលពីថ្ងៃទី ៧កក្កដា ដោយប្រទេសសមាជិកអង្គការសហប្រជាជាតិចំនួន១២២ប្រទេស។ ចាប់ពីថ្ងៃទី ២០ កញ្ញាមក ប្រទេសទាំងនោះ បានចាប់ផ្តើម ធ្វើសច្ចាប័ន ហើយគេត្រូវការប្រទេសយ៉ាងហោចណាស់ ៥០ ផ្តល់សច្ចាប័ន ទើបសន្ធិសញ្ញានេះ អាចចូលជាធរមានបាន។ សម្រាប់ប្រទេសហត្ថលេខី សន្ធិសញ្ញានេះ គឺជាការបោះជំហានជាប្រវត្តិសាស្ត្រ ដែលឲ្យពិភពលោក ឈានទៅគ្មានអាវុធនុយក្លេអ៊ែរ។
តែយ៉ាងណា សន្ធិសញ្ញនេះ កំពុងទទួលរងនូវការរិះគន់ ពីសំណាក់ ប្រទេសសមាជិកអង្គការអូតង់ ដែលក្នុងនោះមានមហាអំណាចនុយក្លេអ៊ែរ ៤ប្រទេស។ អង្គការអូតង់ បានចេញលិខិតប្រកាសថា គេមិនគាំទ្រចំពោះសន្ធិសញ្ញានេះជាដាច់ខាត ព្រោះថាសន្ធិសញ្ញានេះ មិនបានឆ្លើយតប ទៅនឹងកាលៈទេសៈនៃការគំរាមកំហែងបច្ចុប្បន្ន ព្រមទាំងភាពស្មុគស្មាញ នៃការកាត់បន្ថយអាវុធនុយក្លេអ៊ែរទេ។ សម្រាប់អូតង់ អាវុធនុយក្លេអ៊ែរ គឺជាវិធីតែមួយគត់ ដើម្បីការពារខ្លួន និងបញ្ជៀសសង្រ្គាម។
អង្គការអូតង់ លើកឡើងថា គេមិនអាចគ្រាន់តែ ធ្វើសន្ធិសញ្ញា ហាមឃាត់អាវុធនុយក្លេអ៊ែរ ហើយពិភពលោក និងល្អផូរផង់ អស់អាវុធប្រល័យលោកនោះទេ។ អូតង់ យល់ថា ទីមួយ សន្ធិសញ្ញាដែលមានប្រទេសហត្ថលេខី សុទ្ធតែជាប្រទេសគ្មាននុយក្លេអ៊ែរ គឺវាមិនអាចទៅជួយអ្វីបានទេ ដល់ការកាត់បន្ថយអាវុធនុយក្លេអ៊ែរ។ ទីពីរ គឺសន្ធិសញ្ញានេះ នឹងមិនជួយអ្វីដល់ការការពារសន្តិសុខ សុវត្ថិភាពរបស់ប្រទេសនីមួយៗទេ ហើយក៏មិនអាចជួយអ្វីបានដល់ការការពារសន្តិសុខអន្តរជាតិដែរ។
ផ្ទុយទៅវិញ អូតង់យល់ថា សន្ធិសញ្ញានេះ នឹងធ្វើឲ្យល្អក់កករ ដល់សន្ធិសញ្ញានៃការមិនរីកសាយភាព នូវអាវុធនុយក្លេអ៊ែរ ដែលបានចុះហត្ថលេខារួចហើយ កាលពីឆ្នាំ១៩៦៨។ មានន័យថាសន្ធិសញ្ញា ហាមឃាត់ទាំងស្រុងនេះ នឹងធ្វើឲ្យបែកបាក់គ្នាជាពីរក្រុម ក្រុមអ្នកមាននុយក្លេអ៊ែរ និងក្រុមអ្នកគ្មាននុយក្លេអ៊ែរ។ ចំណុចនេះ វាជះផលមិនល្អទេ នៅក្នុងបរិបទបច្ចុប្បន្ន ដែលគេត្រូវសហការគ្នា ផ្តល់ព័ត៌មានឲ្យគ្នា ដើម្បីកាត់បន្ថយចំនួនស្តុកនៃក្បាលគ្រាប់នុយក្លេអ៊ែរ។
សូមបញ្ជាក់ថា បច្ចុប្បន្ននេះ មានក្បាលគ្រាប់នុយក្លេអ៊ែរសរុបប្រមាណជា១៥០០០គ្រាប់ ទូទាំងពិភពលោក។ ប្រទេសសមាជិកអូតង់ ធំៗទាំងបួនដែលមាននុយក្លេអ៊ែរ បានកាត់បន្ថយចំនួនស្តុករបស់គេ យ៉ាងច្រើន ក្នុងរយៈពេលជិត៥០ឆ្នាំមកនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ