លោកហ្រ្វង់ស័រ ហូឡង់៖បារំាងត្រូវតែត្រៀមខ្លួនដើម្បីប្រឈមទប់នឹងទង្វើភេរវនិយមផ្សេងទៀត
នៅក្នុងប្រទេសបារំាង ឯកអគ្គរដ្ឋទូតបារំាងទំាងអស់ប្រចំានៅបរទេសបានចូលរួមនៅក្នុងប្រជុំមួយរៀបចំនៅវិមានប្រធានាធិបតី Elysée ក្នុងទីក្រុងប៉ារីស។ មានសំណុំរឿងជាតិ និងអន្តរជាតិជាច្រើនដែលលោកប្រធានាធិបតីបារំាងហ្រ្វង់ស័រ ហូឡង់បានថ្លែងនាឱកាសនោះ រួមមាន លំហូរជនភៀសខ្លួននៅក្នុងទ្វីបអឺរ៉ុប ស្ថានភាពសេដ្ឋកិច្ចពិភពលោក ការឡើងកំដៅនៅក្នុងបរិយកាស និងភេរវនិយម។ នៅក្នុងរឿងភេរវនិយម លោកហូឡង់បានសង្កត់ធ្ងន់លើទង្វើវាយប្រហារនៅក្នុងរថភ្លើង Thalys ដែលធ្វើដំណើរពីទីក្រុងអំាស្ទែរដាមប្រទេសហូឡង់មកកាន់ទីក្រុងប៉ារីស។ លោកហូឡង់យល់ថា បារំាងត្រូវតែត្រៀមខ្លួនដើម្បីប្រឈមទប់នឹងទង្វើវាយប្រហារភេរវនិយមផ្សេងទៀត។
ចុះផ្សាយនៅថ្ងៃ៖
ស្តាប់ - ០១:៣០
« ប្រទេសបារំាងរបស់យើងបានទទួលរងការវាយប្រហារកាលពីខែមករាកន្លងទៅ។ តែបារំាងបានចាត់វិធានការឆ្លើយបកវិញភ្លាមៗយ៉ាងទាន់ហន់ជាមួយនឹងភាពក្លាហាន។ ប្រតិកម្មរបស់បារំាងត្រូវបានធ្វើឡើងដោយមានការឯកភាពជាធ្លុងមួយ និងដោយមានការជួយគំាទ្រជាលក្ខណៈអន្តរជាតិដ៏វិសេសវិសាលមួយដែលមិនធ្លាប់មាន។ នេះក៏ដោយសារថា ប្រទេសបារំាងបានតំណាងឲ្យពិភពលោកទំាងមូលនូវសេរីភាព។
ជានិច្ចកាល បារំាងជាប្រទេសដែលកំពុងប្រឈមនឹងការគំរាមកំហែងភេរវនិយម។ ទង្វើវាយប្រហារនៅក្នុងរថភ្លើង Thalys ដែលធ្វើដំណើរពីទីក្រុងអាំស្ទែរដាមប្រទេសហូឡង់មកកាន់ទីក្រុងប៉ារីសកាលពីថ្ងៃសុក្រកន្លងទៅ គឺជាភស្តុតាងមួយមិនអាចប្រកែកបាន។ ទង្វើវាយប្រហារនៅលើរថភ្លើង Thalys អាចនឹងបង្កឲ្យមានសោកនាដកម្មធ្ងន់ធ្ងរមួយ ប្រសិនបើគ្មានអន្តរាគមន៍ទាន់ពេល និងប្រកបដោយក្តីក្លាហានពីអ្នកដំណើរជាច្រើននាក់ ពិសេសជនជាតិអាមេរិកំាងដែលខ្ញុំបានបំពាក់មេដាយកិតិ្តយសឲ្យកាលពីថ្ងៃចន្ទម្សិលមិញ។
ច្បាស់ណាស់ ទង្វើវាយប្រហារចុងក្រោយនេះជាភស្តុតាងថ្មីមួយដែលយើងត្រូវតែត្រៀមខ្លួនដើម្បីប្រឈមទប់នឹងការវាយប្រហារថ្មីៗទៀតដើម្បីការពារខ្លួន »៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ