រុស្ស៊ីកែប្រែយុទ្ធសាស្រ្តទ័ពដើម្បីឆ្លើយតបនឹងស្ថានការណ៍ដែលកំពុងប្រែប្រួលក្បែរទឹកដីខ្លួន
ប្រធានាធិបតីរុស្ស៊ី លោកវ្លាឌីមៀរ ពូទីនបានចុះហត្ថលេខាទៅលើយុទ្ធសាស្រ្តទ័ពថ្មី ដែលទើបត្រូវគេកែប្រែ ដើម្បីឆ្លើយតបទៅនឹងស្ថានកាណ៍ប្រែប្រួលនៅក្នុងពិភពលោក ជាពិសេសនៅតំបន់ក្បែរទឹកដីរុស្ស៊ី។ នេះបើតាមសេចក្តីប្រកាសព័ត៌មានរបស់ក្រេមឡាំង ចេញផ្សាយ កាលពីថ្ងៃ សុក្រម្សិលមិញ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:១៤
យុទ្ធសាស្រ្តទ័ពថ្មី ដែលលោកប្រធានាធិបតីរុស្ស៊ី ទើបបានចុះហត្ថលេខា បានចែងថា រាល់ការពង្រីកសមត្ថភាពទ័ពអូតង់ និងអស្ថិរភាពនៅក្នុងតំបន់ ត្រូវចាត់ទុកជាការគំរាមកំហែងពីខាងក្រៅ សម្រាប់ប្រទេសរុស្ស៊ី។ ចំណែករាល់សកម្មភាពដើម្បីបង្កអស្ថិរភាពនៅក្នុងប្រទេស និងសកម្មភាពភេរវកម្មត្រូវចាត់ថ្នាក់ ជាការគំរាមកំហែងក្នុងស្រុក។
កាលពីខែកញ្ញាកន្លងទៅ អនុប្រធានក្រុមប្រឹក្សាសន្តិសុខជាតិរុស្ស៊ី ធ្លាប់បាននិយាយ រួចហើយថា នឹងកែប្រែយុទ្ធសាស្រ្តទ័ពរុស្ស៊ីឡើងវិញ ឲ្យបានមុនដំណាច់ឆ្នាំ២០១៤នេះ ដើម្បីទុកទប់ទល់នឹងអង្គការអូតង់។ តាមលោកមីខាអ៊ីល ប៉ូប៉ូវ ការកែប្រែយុទ្ធសាស្រ្តទ័ពរុស្សី ធ្វើឡើង ដើម្បីតម្រូវទៅតាមកត្តានយោបាយក្រៅប្រទេស ជាពិសេស នៅក្នុងតំបន់ក្បែរទឹកដីរុស្ស៊ី។ តាំងពីមុនវិបត្តិផ្ទុះនៅអ៊ុយក្រែន រុស្ស៊ីតែងតែសង្កេតឃើញអូតង់ចេះតែបង្កើនវត្តមានទ័ពរបស់ខ្លួន នៅក្នុងប្រទេស លីទុយអានី ឡេតូនី និងអេស្តូនី ប៉ូឡូញ និងរ៉ូម៉ានីជាដើម ដែលសុទ្ធតែមានព្រំដែនជាប់ជាមួយរុស្ស៊ី។
ចាប់តាំងពីរុស្ស៊ីភ្ជាប់ទឹកដីគ្រីមេ របស់អ៊ុយក្រែនទៅក្នុងទឹកដីរបស់ខ្លួន ក្រុមប្រទេសបាល់ទ៍ និងអឺរ៉ុបខាងកើតមួយចំនួន ដែល មានព្រំដែនជាប់ជាមួយរុស្ស៊ី បារម្ភខ្លាចមានការឈ្លានពានជាបន្តទៀត ពីទ័ពរុស្ស៊ី។ ប្រទេសសមាជិកអូតង់ទាំងនេះ បានស្រែកអំពាវនាវរកជំនួយទ័ពពីអង្គការអាត្លង់ទិកអូតង់។ កាលពីនៅក្នុងកិច្ចប្រជុំកំពូលអូតង់ នៅក្នុងប្រទេសអង់គ្លេស នាខែកញ្ញា អូតង់បានសម្រេចបង្កើតមូលដ្ឋានទ័ពដ៏ទំនើប នៅក្នុងបណ្តាប្រទេសបាល់ទ៍ និងប៉ូឡូញ និងរ៉ូម៉ានី។ តាមអូតង់ មូលដ្ឋានទ័ពថ្មីទាំងនោះ មានបំពាក់អាវុធ និងសម្ភារៈយោធាដែលអាចទទួលកងទ័ពអូតង់ នៅក្នុងករណីមានអន្តរាគមយោធា នៅក្នុងតំបន់។
រុស្ស៊ីវិញ បានមើលឃើញ ការដំឡើងខែលមីស៊ីលប្រឆាំងមីស៊ីលរបស់អាមេរិក នៅអឺរ៉ុបខាងកើត ដូចជានៅប៉ូឡូញជាដើម ថា ជាការគំរាមកំហែង ព្រោះវាអាចកាត់បន្ថយសក្តានុពលកម្លាំងរបស់អាវុធបរិមាណូរបស់រុស្ស៊ី។ នៅសប្តាហ៍នេះ ទីក្រុងម៉ូស្គូទើបបានព្រមានរដ្ឋាភិបាលអ៊ុយក្រែន ពីផលវិបាក ប្រសិនបើទីក្រុងគៀវនៅតែចង់ចូលជាសមាជិករបស់អូតង់។ តាមអនុប្រធានក្រុមប្រឹក្សាសន្តិសុខរុស្ស៊ី ចង់ ឬមិនចង់ យុទ្ធសាស្រ្តទ័ពរុស្ស៊ី ដែលបានអនុម័ត ៤ឆ្នាំ មកហើយ (ឆ្នាំ ២០១០) នោះ គឺមិនអាចឆ្លើយតបនឹងស្ថានការណ៍ដែលកំពុងវិវត្ត ប្រែប្រួលនៅក្នុងតំបន់ទៀតទេ។ ដូច្នេះ រុស្ស៊ីចាំបាច់ត្រូវតែកែប្រែយុទ្ធសាស្រ្តទ័ពរបស់ខ្លួន ដើម្បីអាចឆ្លើយតបទៅនឹងកាលៈទេសៈតម្រូវ ក្នុងពេលបច្ចុប្បន្ននេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ