RSF៖អ្នកកាសែតនៅជាអាជីពគ្រោះថ្នាក់ ដោយមានស្លាប់ ១១០នាក់ក្នុងឆ្នាំ ២០១៥
នៅថ្ងៃអង្គារ ទី២៩ ធ្នូនេះ អង្គការអ្នកយកព័ត៌មានគ្មានព្រំដែន Reporters Sans Frontières (RSF) បានផ្សព្វផ្សាយរបាយការណ៍ប្រចាំឆ្នាំ ២០១៥ ស្តីពីស្ថានភាពអ្នកកាសែតនៅក្នុងពិភពលោក។ របាយការណ៍របស់ RSF បានប្រាប់ឲ្យដឹងថា ក្នុងឆ្នាំ ២០១៥ ដែលជិតបិទបញ្ចប់ទៅ មានអ្នកកាសែតចំនួន ១១០នាក់បានបាត់បង់ជីវិតនៅក្នុងការប្រកបអាជីពរបស់ខ្លួន។ បើគិតក្នុងរយៈពេល ១០ឆ្នាំចុងក្រោយនេះ ពោលតាំងពីឆ្នាំ ២០០៥ គឺមានស្លាប់អ្នកកាសែតយ៉ាងតិច ៧៨៧នាក់។ នៅក្នុងន័យនេះ RSF បានអំពាវនាវជាថ្មីម្តងទៀតឲ្យមានការតែងតាំងអ្នកតំណាងពិសេសម្នាក់នៅអង្គការសហប្រជាជាតិដើម្បីការពារជីវិតអ្នកកាសែត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០៥:២១
ក្នុងចំណោមអ្នកកាសែតស្លាប់ទាំង ១១០នាក់នាឆ្នាំ ២០១៥ នេះត្រូវបានអង្គការអ្នកយកព័ត៌មានគ្មានព្រំដែន Reporters Sans Frontières បំបែកជា ៣ប្រភេទខុសៗគ្នាដោយផ្អែកតាមលទ្ធផលនៃការស៊ើបអង្កេត។ ប្រភេទទី១ មាន១៨នាក់បានបាត់បង់ជីវិតនៅលើសរភូមិក្នុងពេលបំពេញការងារ ប្រភេទទី២ មាន៤៩នាក់បានបាត់បង់ជីវិតដោយត្រូវគេបាញ់សម្លាប់ និង ប្រភេទទី៣ មាន៤៣នាក់បានស្លាប់ដោយមិនដឹងមូលហេតុច្បាស់លាស់។ ការស្លាប់ក្នុងប្រភេទទី៣ នេះត្រូវបាន Reporters Sans Frontières លើកយកមកពន្យល់ថា មកពីកង្វះការស៊ើបអង្កេតផ្លូវការប្រកបដោយស៊ីជម្រៅ និងមិនលំអៀង។
ក្រៅពីអ្នកស្លាប់ចំនួន ១១០នាក់ក្នុងឆ្នាំ ២០១៥ Reporters Sans Frontières ក៏បានប្រាប់ឲ្យដឹងពីចំនួនអ្នកកាសែតដែលកំពុងជាប់ជាចំណាប់ខ្មាំងចំនួន៥៤នាក់ ក្នុងនោះមាន ២៦នាក់នៅក្នុងប្រទេសស៊ីរី និងចំនួនអ្នកកាសែតដែលកំពុងដេកក្នុងគុកចំនួន ១៥៣នាក់ ក្នុងនោះមាននៅចិន ២៣នាក់ នៅអេហ្ស៊ីប ២២នាក់ និង ១៨នាក់នៅក្នុងប្រទេសអ៊ីរ៉ង់។ បើគេគិតក្នុងរយៈពេល ១០ឆ្នាំកន្លងទៅ ពោលតាំងពីឆ្នាំ ២០០៥ មក មានអ្នកកាសែតយ៉ាងតិច ៧៨៧នាក់បានបាត់បង់ជីវិតដោយសារការប្រកបអាជីពរបស់ខ្លួន។
មាន ៩ប្រទេសនាំមុខគេដែល Reporters Sans Frontières ចាត់ចំណាត់ថ្នាក់មានអ្នកកាសែតស្លាប់ច្រើនជាងគេក្នុងឆ្នាំ ២០១៥ គឺអ៊ីរ៉ាក់មានស្លាប់ ១១នាក់ ស៊ីរីស្លាប់ ១០នាក់ បារាំងស្លាប់ ៨នាក់ យេម៉ែនស្លាប់ ៨នាក់ ស៊ូដង់ខាងត្បូងស្លាប់ ៧នាក់ ឥណ្ឌាស្លាប់ ៩នាក់ ម៉ិចស៊ិកសម្លាប់ ៨នាក់ ហ្វីលីពីនស្លាប់ ៧នាក់ និងប្រទេសហុងឌូរ៉ាសមានស្លាប់ ៧នាក់។
បារាំងជាប្រទេសបស្ចិមលោកទី១ ដែលមានអ្នកកាសែតស្លាប់ច្រើន
ក្នុងចំណោមប្រទេសទាំង ៩ ដែលមានស្លាប់អ្នកកាសែតច្រើនជាងគេក្នុងឆ្នាំ ២០១៥ នេះ បារាំងបានស្ថិតនៅលំដាប់ទី៣។ តែគេពិតជាមិនអាចប្រៀបប្រដូចសិទ្ធិសេរីភាពសារព័ត៌មាន និងការប្រកបអាជីពជាអ្នកកាសែតនៅក្នុងប្រទេសបារាំងទៅនឹងប្រទេសផ្សេងដូចយ៉ាងនៅអ៊ីរ៉ាក់ ឬនៅស៊ីរីបានទេ។ ទន្ទឹមគ្នានេះ គេក៏អាចចាត់ទុកបារាំងជាប្រទេសគ្រោះថ្នាក់សម្រាប់អ្នកប្រកបអាជីពជាអ្នកកាសែតនោះដែរ។ អ្វីដែលគេអាចនិយាយបានពេលនេះគឺថា ឆ្នាំ ២០១៥ ជាឆ្នាំពិសេស និងជាលើកទី១ ដែលបារាំងបានក្លាយជាប្រទេសលោកខាងលិចដំបូងបង្អស់ដែលមានអ្នកកាសែតស្លាប់ច្រើនក្នុងឆ្នាំ ២០១៥។
គួររម្លឹកជូនឡើងវិញថា អ្នកកាសែតបារាំងស្លាប់ទាំង ៨នាក់ក្នុងឆ្នាំ ២០១៥ សុទ្ធសឹងជាអ្នកកាសែតរបស់ទស្សនាវដ្តីត្លុកកប្លែង Charlie Hebdo ដែលរងការវាយប្រហារភេរវនិយមកាលពីថ្ងៃទី៧ មករា។ រហូតមកដល់ថ្ងៃនេះទៀត អ្នកកាសែតភាគច្រើនរបស់ Charlie Hebdo បានទទួលការការពារពីកម្លាំងប៉ូលិសស៊ីវិលជាប់ជាប្រចាំ និងកំពុងបន្តរស់នៅដោយការភ័យខ្លាច ពិសេសអ្នកកាសែតដែលសរសេរអត្ថបទទាក់ទងនឹងសាសនាអ៊ីស្លាម។ មានអ្នកកាសែតខ្លះបានបង្ខំចិត្តប្តូរកន្លែងរស់នៅរៀងរាល់ ៦ខែម្តង ឬមួយក៏ម្តងទៅសម្រាកនៅសណ្ធាគារ និងម្តងទៅសម្រាកនៅផ្ទះបងប្អូន។ល។ និង។ល។
អនុសាសន៍របស់ Reporters Sans Frontières សម្រាប់ការពារជីវិតអ្នកកាសែត
មានអនុសាសន៍សំខាន់ចំនួនពីរដែល Reporters Sans Frontières បានធ្វើសំណើទៅកាន់អគ្គលេខាធិការអង្គការសហប្រជាជាតិ ទៅកាន់ក្រុមប្រឹក្សាសន្តិសុខ និងទៅកាន់មហាសន្និបាតអង្គការសហប្រជាជាតិក្នុងការការពារជីវិតអ្នកកាសែត។ អនុសាសន៍ទី១ គឺតែងតំាងអ្នកតំណាងពិសេសម្នាក់របស់អគ្គលេខាធិការអង្គការសហប្រជាជាតិដើម្បីទទួលបន្ទុកការពារអ្នកកាសែត។ អ្នកតំណាងពិសេសសម្រាប់ការពារអ្នកកាសែតរូបនោះមានតួនាទីជាអ្នកត្រួតពិនិត្យថា តើរដ្ឋសមាជិកនីមួយៗមានគោរពច្បាប់អន្តរជាតិត្រឹមត្រូវ និងមានទម្ងន់នយោបាយ ក៏ដូចជាសមត្ថភាពពេញលេញក្នុងការការពារអ្នកកាសែតប្រកបដោយប្រសិទ្ធិភាពដែរ ឬទេ។
ចំណែកនៅក្នុងអនុសាសន៍ទី២ Reporters Sans Frontières បានស្នើឲ្យក្រុមប្រឹក្សាសន្តិសុខប្តឹងទៅតុលាការព្រហ្មទ័ណ្ឌអន្តរជាតិនៅពេលដែលកើតមានឧក្រិដ្ឋកម្មសង្រ្គាមប្រឆាំងនឹងអ្នកកាសែត។ នៅក្នុងសេចក្តីប្រកាសព័ត៌មានមួយ លោក Christophe Deloire អគ្គលេខាធិការ Reporters Sans Frontières បានបញ្ជាក់ថា វាល្មមដល់ពេលដែលគេត្រូវបង្កើតយន្តការមួយច្បាស់លាស់ដើម្បីឲ្យមានការអនុវត្តន៍ច្បាប់អន្តរជាតិស្តីពីការការពារអ្នកកាសែត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ