មេធាវីដាក់ពាក្យប្តឹងទៅតុលាការព្រហ្មទណ្ឌអន្តរជាតិធ្វើបទបង្ហាញដល់ប្រជាជនខ្មែរនៅបារាំង
សំណុំរឿងប្តឹងក្រុមអ្នកកាន់អំណាចនៅកម្ពុជាទៅតុលាការព្រហ្មទណ្ឌអន្តរជាតិICCត្រូវបានលើកយកទៅបង្ហាញក្នុងប្រទេសបារាំង។ បន្ទាប់ពីបញ្ចប់ដំណើរផ្សព្វផ្សាយមួយជុំនៅសហរដ្ឋអាមេរិក មេធាវី រីឆាដ រ៉ូជើ មេធាវីតំណាងឲ្យជនរងគ្រោះដោយការរំលោភយកដីធ្លី និងជាអ្នកជាដាក់ពាក្យបណ្តឹងទៅតុលាការព្រហ្មទណ្ឌអន្តរជាតិបានធ្វើដំណើរទៅដល់ទីក្រុងប៉ារីស និងធ្វើយុទ្ធនាការផ្សព្វផ្សាយពីដំណើរការដាក់ពាក្យបណ្តឹងរបស់លោកជូនសហគមន៍ខ្មែរក្នុងទីក្រុងប៉ារីស។ មនុស្សជាង ២០០នាក់ ដែលខ្លះធ្វើដំណើរតាំងពីខេត្តឆ្ងាយៗបានចូលទៅស្តាប់បទបង្ហាញរបស់មេធាវីជាតិអង់គ្លេស រីឆាដ រ៉ូជើ កាលពីល្ងាចថ្ងៃអាទិត្យទី ១៥ កុម្ភៈ។
ចុះផ្សាយនៅថ្ងៃ៖
ស្តាប់ - ០៤:០៨
នៅក្នុងសាលប្រជុំដ៏ធំមួយរបស់មជ្ឈមណ្ឌលRobespierre ដែលមានទីតាំងស្ថិតនៅជាយក្រុងប៉ារីស ប្រជាជនខ្មែរប្រុសស្រី កកកុញ អង្គុយ និងឈររង់ចាំស្តាប់លោកមេធាវី រីឆាដ រ៉ូជើដែលធ្វើដំណើរតាំងពីប្រទេសអង់គ្លេស ដើម្បីធ្វើបទបង្ហាញពីដំណើរសំណុំរឿងប្តឹងក្រុមអ្នកកាន់អំណាចខ្មែរទៅតុលាការព្រហ្មទណ្ឌអន្តរជាតិICC។
បទបង្ហាញដែលបន្តសំណួរ សួរឆ្លើយមានរយៈពេល៣ម៉ោង ដោយជាញឹកញយលោករីឆាដ រ៉ូជើបានទទួលការទះដៃអបអរ និងសរសើរពីសំណាក់ប្រជាជនខ្មែរដែលជាអ្នកស្តាប់។ តាមលោកមេធាវីរីឆាដ រ៉ូជើ ការយល់ដឹងពីដំណើរការដាក់ពាក្យប្តឹងផ្តល់ទៅតុលាការព្រហ្មទណ្ឌជារឿងសំខាន់មួយ ប៉ុន្តែលោករំពឹងថា ប្រជាជនខ្មែរជាច្រើនទៀតនឹងចូលរួមជាមួយលោកដើម្បីចុះហត្ថលេខាលើញត្តិដែលក្រុមរបស់លោកនឹងប្រើជាទម្ងន់ សម្រាប់បញ្ចុះបញ្ចូលឲ្យរដ្ឋអាជ្ញារបស់តុលាការព្រហ្មទណ្ឌអន្តរជាតិពិនិត្យមើលថា ត្រូវធ្វើការស៊ើបអង្កេតបឋមដែរឬទេ។
ជំនួបរវាងសហគមន៍ខ្មែរនៅប៉ារីស ជាមួយមេធាវីរីឆាដ រ៉ូជើ កាលពីថ្ងៃអាទិត្យ កើតចេញពីគំនិតផ្តួចផ្តើមរបស់ក្រុមប្រជាជនខ្មែរដែលនិយាយថា ពួកគេខ្វល់ខ្វាយ និងឈឺឆ្អាលនឹងការឈឺចាប់របស់ជនរងគ្រោះដោយការរំលោភសិទ្ធិមនុស្ស និងការរំលោភដីធ្លី នៅកម្ពុជា។ កាលពីថ្ងៃអាទិត្យ គេប្រមូលបានហត្ថលេខារបស់មនុស្សជាង២០០នាក់ ដែលគាំទ្រពាក្យបណ្តឹង និងអំពាវនាវឲ្យរដ្ឋអាជ្ញានៃតុលាការព្រហ្មទណ្ឌអន្តរជាតិពិនិត្យ និងផ្តើមការស៊ើបអង្កេតទៅលើបទចោទឧក្រិដ្ឋកម្មឲ្យបានឆាប់រហ័ស។
នៅប្រទេសបារំាង ក្នុងរយៈពេលមិនដល់ពីរសប្តាហ៍ផង គេប្រមូលបានញត្តិគាំទ្រពីប្រជាជន៥០០នាក់។ សម្រាប់លោករីឆាដ រ៉ូជើ ដើម្បីជំរុញសំណុំរឿងឲ្យទៅមុខ ប្រជាជនខ្មែរ នៅក្នុងនិងក្រៅប្រទេសអាចចុះហត្ថលេខាលើញត្តិដែលគេអាចធ្វើតាមការរយៈការផ្ញើសំបុត្រ ឬការចុះឈ្មោះតាមអ៊ិនធ័រនេត។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ