Slow Food ចង់ឲ្យគេហូប ប្រើចំណីអាហារដែលល្អសម្រាប់សុខភាព និងបរិស្ថាន
នៅថ្ងៃទី ១៩១០ឧសភា ចលនាslow food បានសម្ពោធជាផ្លូវការ ផ្ទះតាំងបង្ហាញរបស់ខ្លួន នៅក្នុង បរិវេណពិព័រណ៌សកល ដែលរៀបចំ នៅទីក្រុងមីឡង់ ប្រទេសអ៊ីតាលី។ នៅក្នុងពិព័រណ៌សកល ឆ្នាំ២០១៥ នៅអ៊ីតាលី មានប្រធានបទចិញ្ចឹមផែនដី និងថាមពលសម្រាប់ជីវិត សមាជិករបស់ចលនា slow food ដែលមានទីតាំងនៅប្រទេសអ៊ីតាលី បានឆ្លៀតយកពិព័រណ៌សកល ដើម្បីផ្សព្វផ្សាយ បញ្ចុះបញ្ចូលអ្នកចូលទស្សនា ដែលគេរង់ចាំ ជាង ២០លាននាក់ នោះ ឲ្យយល់ដឹងពីសារៈសំខាន់នៃអាហារ ដែល”ល្អ ត្រឹមត្រូវ និងមានអនាម័យ”។
ចុះផ្សាយនៅថ្ងៃ៖ កែប្រែថ្ងៃទី៖
បរិភោគអាហារ”ល្អ” ដែលមានរសជាតិ។ “ស្អាតអនាម័យ”សម្រាប់បរិស្ថាន និង”ត្រឹមត្រូវ” នៅពេលគេនិយាយពីទំនាក់ទំនងសេដ្ឋកិច្ចសង្គមរវាងអ្នកផលិត និងអ្នកទិញប្រើប្រាស់។ គឺជាមួយនឹងគំនិតទ្រឹស្តីទាំងអស់នេះហើយ ដែល បុរសជាតិអ៊ីតាលី Carlo Petrini បានបង្កើតចលនា slow food នៅឡើង នៅឆ្នាំ ១៩៨០។ អង្គការមួយនេះបានអះអាងថា ខ្លួនមានសមាជិក អ្នកគាំទ្រ ច្រើនជាង ១លាននាក់ (សកម្មជន កសិករ អ្នកនេសាទ អ្នកជំនាញ និងអ្នកស្រាវជ្រាវនៅសកលវិទ្យាល័យ) នៅក្នុងប្រទេសចំនួន ១៥០។ ប៉ុន្តែ គឺនៅទឹកដីអ៊ីតាលី ដែលល្បីខាងផលិតមុខម្ហូប ដែលអង្គការមួយនេះទាក់ទាញសមាជិកគាំទ្របានច្រើនជាងគេ។
ដើម្បីឲ្យចលនា slow foodត្រូវគេទទួលស្គាល់បានកាន់តែច្រើន ផ្ទះតាំងបង្ហាញ slow foodត្រូវគេសង់ បង្កើតឡើង នៅក្នុងមណ្ឌលតាំងពិព័រណ៌ឆ្នាំ២០១៥ នៅអ៊ីតាលី។ នៅក្នុងផ្ទះតាំងបង្ហាញ slow food គេឃើញ ទីធ្លារធំទូលាយ ដែលមានតាំងពីការដាក់ម្ហូបឲ្យភ្លក់លេង ល្បែងកំសាន្ត ការតាំងពិព័រណ៌រូបថត វីដេអូ ដើម្បីទាកទាញអ្នកចូលទស្សនា ឲ្យចាប់អារម្មណ៍ពីការប្រើប្រាស់ បរិភោគចំណីអាហារដែលស្អាត និងល្អ សម្រាប់សុខភាព។ អ្នករៀបចំ មិនភ្លេចទេ ការផ្តល់គុណតម្លៃទៅលើជីវចម្រុះ និងកសិករ ដែល តាមពិត ជាអ្នកចិញ្ចឹមភពផែនដី។ ដើម្បីទាក់ទាញចំណាប់អារម្មណ៍របស់អ្នកចូលមើល អ្នករៀបចំ បានបង្កើត “l’Arche du Gout” កន្លែងដែលគេអាចស្គាល់ ភ្លក់អាហារ ផ្លែឈើ ដែលជិតផុតពូជពីភពផែនដី និងដែល slow food កំពុងព្យាយាមចូលរួម ថែរក្សា អភិរក្ស។ នេះបើតាមSara Rubeis សកម្មជនម្នាក់ និងជាអ្នកទទួលខុសត្រូវខាងរៀបចំសន្និសីទរបស់ slow food។
នៅl’Arche du Gout គេឃើញ មានផលិតផលកម្រ ដែលមានដូចជា ដើមទំពាំងបាយជូបារាំង Cépage césar de Bourgogne ឬក្រូចរបស់តំបន់Calabre នៅអ៊ីតាលី ស្ថិតនៅក្នុងចំណោមផលិតផល ជាង ២០០០ ដែលគេរកឃើញ នៅក្នុងប្រទេសជាង ៨០ នៅឆ្នាំ ២០១៥។ ដោយសារតែ ជាញឹកញយត្រូវគេមិនស្គាល់ ឬបំភ្លេចចោល ផលិតផលទាំងនោះកំពុងស្ថិតនៅក្នុងគ្រោះថ្នាក់ ឈានទៅរកការផុតពូជក៏មាន។
ដំណើរទស្សនាក្នុងផ្ទះ slow foodចាប់ផ្តើមជាមួយកន្លែងភ្លក់ស្រា និង Fromages (ប្រហុកបារាំង ដែលធ្វើពីទឹកដោះគោ ឬពពែ(។ តាមសកម្មជនរបស់ចលនា slow food គេបានជ្រើសរើសផលិតទាំង២មុខនេះ ដើម្បីបង្ហាញថា ទឹកដោះគោតែមួយ អាចផលិតចេញទៅជាFromages ច្រើនប្រភេទយ៉ាងសម្បូរបែប។ នៅក្នុងស្តង់បង្ហាញភ្លក់មុខម្ហូប ចំណីអាហារអ៊ីតាលីមានសំបូរជាងគេ គឺច្រើនជាងផលិតផលមកពីបារាំង ស្វ៊ីស ឬអង់គ្លេស ហើយមុខម្ហូបភ្លក់របស់ប្រទេសនីមួយៗ នឹងត្រូវគេដូរជារៀងរាល់សប្តាហ៍។
អារម្មណ៍រីករាយដែលបានហូបអាហារដែលល្អសម្រាប់សុខភាព
ទោះបីជាស្ថិតនៅឆ្ងាយ ពីកន្លែងដែលជាទីចាប់អារម្មណ៍របស់ភ្ញៀវចូលទស្សនា នៅក្នុងមណ្ឌលពិព័រណ៌ ឆ្នាំ ២០១៥ ចលនា slow foodនៅតែអាចទាក់ទាញមនុស្សឲ្យចូលមើលផលិតផលតាំងបង្ហាញរបស់ខ្លួន។ នោះក៏មកពី slow foodចេះបង្កើតកម្មវិធីពន្យល់យ៉ាងសាមញ្ញ ដែលថា គេនៅតែអាចជ្រើសរើសការប្រើប្រាស់ ហូបចុក យ៉ាងយឺត និងមធ្យ័ត នៅក្នុងពិភពដែលអ្វីៗកំពុងប្រព្រឹត្តទៅយ៉ាងលឿន។ សន្និសីទជាច្រើនត្រូវបានរៀបចំ ឡើងនៅជុំវិញប្រធានបទដែលនិយាយពីទឹក ឃ្មុំ ឬការប្រយុទ្ធប្រឆាំងនឹងការខ្ជះខ្ជាយ។
នៅកន្លែងកន្លែងតាំងបង្ហាញមួយទៀត កម្មវិធីកំសាន្តប្រកបដោយអប់រំមួយបានទាក់ទាញ មិនថា មនុស្សចាស់ ឬកុមារ។ នោះ គឺនៅក្នុងប្រអប់ខ្មៅមួយ អ្នកចូលទស្សនានឹងអាចស្វែងយល់ស្គាល់ ផ្លែឈឺ គ្រាប់ធញ្ញជាតិ តាមរយៈក្លិនរបស់វា។ ក្លិនដែលគេសឹងតែមិនស្គាល់ ឬភ្លេច ដោយសារតែការលុកលុយនៃផលិតផលឧស្សាហកម្ម។
នៅលើតុមួយទៀត គេបានបង្ហាញចំណុចអវិជ្ជមានរបស់គ្រឿងចំណីអាហារឧស្សាហកម្ម ដូចជាសាឡាដដែលវេចខ្ចប់រួចជាស្រេច និងដែលគេឃើញមានលក់នៅក្នុងហាងទំនើប។ អ្នករៀបចំបានពន្យល់ថា ផលិតផលរបៀបនោះ មិនត្រឹមតែថ្លៃ ១០ដងលើសសាឡាដ ធម្មជាតិ ប៉ុន្តែ វាគ្រោះថ្នាក់សម្រាប់សុខភាព ព្រោះថា ទឹកដែលគេប្រើលាងសាឡាដទាំងនោះ មានលាយជាតិគីមី ដើម្បីអាចរក្សាសាឡាដ ឲ្យនៅស្រស់បានយូរ។ “ពិព័រណ៌ទាំងនេះចង់ដាស់ពញ្ញាក់ស្មារតីយើង ឲ្យចេះ កែប្រែទម្លាប់ ទិញ ហូបប្រើប្រាស់ឡើងវិញ។ យើងត្រូវចេះគិតគូរឡើងវិញ ពីការអភិវឌ្ឍន៍ នៃផែនដីរបស់យើង ជាជាង គិតតែទិញ ទៅតាមរបៀបរបបយើងរស់នៅសព្វថ្ងៃនេះទេ។
ចំណុចខ្សោយមួយរបស់ផ្ទះតាំងពិព័រណ៌ slow foodនៅពិព័រណ៌ សកលក្នុងទីក្រុងមីឡង់ ឆ្នាំ ២០១៥ គឺ ទីតាំងរបស់ពិព័រណ៌ slow food។ វាស្ថិតនៅចុងផ្លូវ ដែលមានចម្ងាយ ១គីឡូម៉ែត្រកន្លះ។ អ្នកចូលទស្សនាជាតិបារាំង ម្នាក់ឈ្មោះ អេមីលីត្អូញថា ទាល់តែគេចង់ណាស់ ទើបអាចដើរមករកកន្លែងពិព័រណ៌ slow foodបាន។ ផ្ទុយទៅវិញ ហាង ដែលបម្រើ លក់ម្ហូបអាហារទាន់ចិត្ត Mcdonaldមានទីតាំងនៅកន្លែងល្អៗ ងាយនឹងដើរ ដល់ រកឃើញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ