អង់គ្លេសផ្តើមបញ្ចុះបញ្ចូលអឺរ៉ុបឲ្យផ្តល់សម្បទាន ជាថ្នូរនឹងការរក្សាអង់គ្លេសក្នុងសហភាពអឺរ៉ុប
២០ថ្ងៃក្រោយជាប់ឆ្នោត ក្លាយជាលោកនាយករដ្ឋមន្រ្តីអង់គ្លេស សម្រាប់អាណត្តិទី ២ លោកដាវីដ កាម៉េរ៉ូនបានផ្តើមកាលពីថ្ងៃព្រហស្បតិ៍ ទី ២៩ ទស្សនកិច្ច នៅក្នុងបណ្តា ប្រទេសសមាជិកសហភាពអឺរ៉ុប ដោយចាប់ផ្តើមដំបូងជាមួយ ប្រទេសហូឡង់ និងបារាំង។ គោលដៅនៃទស្សនកិច្ចរយៈពេលពីរថ្ងៃ នៅប្រទេសជិតខាងអឺរ៉ុប គឺបញ្ចុះបញ្ចូលសមាជិកអឺរ៉ុបដទៃទៀត ឲ្យចូលរួមធ្វើកំណែទម្រង់សហភាពអឺរ៉ុប។
ចុះផ្សាយនៅថ្ងៃ៖
លោកដាវីដ កាម៉េរ៉ូន ទំនងមិនចង់ឲ្យម្ចាស់ឆ្នោតរបស់លោកខកចិត្ត។ គ្រាន់តែជាប់ឆ្នោត បន្តធ្វើជានាយករដ្ឋមន្រ្តី សម្រាប់មួយអាណត្តិទៀត លោកចាប់ផ្តើមភ្លាម សំណុំរឿងដ៏ចម្រូងចម្រាស នោះគឺ ការបោះឆ្នោតប្រជាមតិ ដែលនឹងសម្រេចថា តើអង់គ្លេស នឹងត្រូវបន្តស្ថិតនៅ ឬដើរចេញពីសហភាពអឺរ៉ុប។ កាលពីថ្ងៃ ព្រហស្បតិ៍ រដ្ឋាភិបាលថ្មីបានដាក់ជូនសភា នូវសេចក្តីព្រាងច្បាប់ និយាយលម្អិតពីការបោះឆ្នោតប្រជាមតិ ដែលនឹងអាចរៀបចំយ៉ាងយូរបំផុត នៅចុងឆ្នាំ ២០១៧។ តើអង់គ្លេស ត្រូវស្ថិតនៅជាសមាជិកអឺរ៉ុប? នេះជាសំណួរដែលប្រជាជនអង់គ្លេសត្រូវផ្តល់ចម្លើយមកវិញ ថា ព្រម ឬមិនព្រម។
ប៉ុន្តែ នៅមុនប្រជាជនអង់គ្លេសត្រូវសម្រេចចិត្ត នៅក្នុងការបោះឆ្នោតប្រជាមតិ លោកនាយករដ្ឋមន្រ្តីអង់គ្លេស ដាវីដ កាម៉េរ៉ូន ដែលមិនមែនជាអ្នកដឹកនាំស្អប់អឺរ៉ុបខ្លាំងណាស់ណានោះ បានព្យាយាមរកដំណោះស្រាយ ផ្លូវកណ្តាល។ លោកធ្លាប់បានប្រកាសឲ្យថា បើសិនសហភាពអឺរ៉ុបចង់រក្សាអង់គ្លេសឲ្យនៅក្នុងរង្វង់សមាជិករបស់ខ្លួន នោះសហភាពអឺរ៉ុបត្រូវតែយល់ព្រមធ្វើកំណែទម្រង់។ តាមរយៈការធ្វើកំណែទម្រង់សហភាពអឺរ៉ុប អង់គ្លេស ចង់បានមកវិញ នូវអំណាចរបស់ខ្លួន ដែលត្រូវបានផ្ទេរទៅឲ្យសហភាពអឺរ៉ុប ចាប់តំាងពីអង់គ្លេសក្លាយជាសមាជិកអឺរ៉ុប។ ជារួម អង់គ្លេស ចង់ទាមទារមានសិទ្ធិសម្រេចអ្វីមួយដោយខ្លួនឯង ដោយមិនចាំបាច់ត្រូវសុំការយល់ព្រមពីសភាអឺរ៉ុប។ លើសពីនោះ ដោយធ្វើកំណែទម្រង់អឺរ៉ុប នាយករដ្ឋមន្រ្តីអង់គ្លេស ចង់ទាមទារផងដែរឲ្យគេរឹតបន្តឹងលក្ខខណ្ឌ ទទួលជំនួយសង្គម ដែលប្រជាជនអឺរ៉ុបធ្លាប់តែបានទទួលផលកន្លងមក។
នាយករដ្ឋមន្រ្តីបានចាប់ផ្តើមបញ្ចុះបញ្ចូលសមាជិកដទៃទៀត ដោយចាប់ផ្តើមជាមួយប្រទេសហូឡង់។ នៅល្ងាចថ្ងៃព្រហស្បតិ៍ លោកត្រូវជួបពិភាក្សាជាមួយនឹងប្រធានាធិបតីបារាំង មុននឹងចេញទៅជួបនាយករដ្ឋមន្រ្តីប៉ូឡូញនៅព្រឹកថ្ងៃសុក្រ។ លោកបញ្ចប់ទស្សនកិច្ចមួយជុំរយៈពេល២ថ្ងៃ នៅក្នុងប្រទេសអាល្លឺម៉ង់ ជាមួយជំនួប មួយនឹងទល់មួយ ជាមួយលោកស្រីនាយករដ្ឋមន្រ្តីអង់ហ្គែឡា ម៉ែគែល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ