អង្គការតម្លាភាពអន្តរជាតិរិះគន់ បារាំងថា បរាជ័យក្នុងការប្រឆាំង អំពើពុករលួយរបស់ក្រុមហ៊ុនបារាំង នៅបរទេស
អង្គការតម្លាភាពអន្តរជាតិTransparency International នៅថ្ងៃព្រហស្បតិ៍ទី ១៧ កញ្ញា បានចេញសេចក្តីថ្លែងការណ៍ មួយ បរិហារបរាជ័យរបស់រដ្ឋាភិបាលបារាំង ក្នុងការប្រយុទ្ធប្រឆាំងអំពើពុករលួយ ប្រព្រឹត្តដោយក្រុមហ៊ុនបារាំង នៅបរទេស។ អង្គការតម្លាភាពអន្តរជាតិបានស្នើរដ្ឋាភិបាលបារាំងឲ្យបង្កើតតុលាការពិសេស យកគំរូតាមអាមេរិក ដើម្បី ពិន័យក្រុមហ៊ុនបារាំង ដែលប្រព្រឹត្តអំពើពុករលួយ នៅបរទេស។
ចុះផ្សាយនៅថ្ងៃ៖
ស្តាប់ - ០៧:៤៦
សេចក្តីថ្លែងការណ៍របស់អង្គការតម្លាភាពអន្តរជាតិបានបញ្ជាក់បន្ថែម ការវាយតម្លៃកន្លងមក របស់អង្គការប្រទេសអ្នកមាន OCDE។ នៅក្នុងរបាយការណ៍របស់ខ្លួន អង្គការ OCDE (Organisation for Economic Co-operation and Development) បានសរសេរថា យោងទៅលើទំហំសេដ្ឋកិច្ចបារាំង និងការប្រព្រឹត្តិជាហូរហែ អំពើពុករលួយរបស់ក្រុមហ៊ុនបារាំង នៅបរទេស បរាជ័យរបស់រដ្ឋបារាំង ក្នុងការប្រយុទ្ធប្រឆាំងអំពើពុករលួយ កំពុងក្លាយជាក្តីកង្វល់ និងបញ្ហា ដែលគេត្រូវតែដោះស្រាយ។
នៅក្នុងសេចក្តីថ្លែងការណ៍របស់ខ្លួន ចេញផ្សាយ នៅថ្ងៃព្រហស្បតិ៍នេះ អង្គការតម្លាភាពអន្តរជាតិ Transparency Internationalបានបន្ទោសរដ្ឋាភិបាលបារាំង ថា បានបរាជ័យ ក្នុងរឿងប្រយុទ្ធប្រឆាំងអំពើពុករលួយ ដែលប្រព្រឹត្តដោយក្រុមហ៊ុនបារាំង នៅបរទេស។ តាមអង្គការតម្លាភាពអន្តរជាតិ រដ្ឋាភិបាលបារាំង ធ្លាប់បានចុះហត្ថលេខាលើអនុសញ្ញាស្តីពីការប្រយុទ្ធប្រឆាំងអំពើពុករលួយអន្តរជាតិ ប៉ុន្តែ នៅពេលក្រុមហ៊ុនបារាំង ជាមុខសញ្ញា ជាអ្នកប្រព្រឹត្តអំពើពុករលួយ សូកប៉ាន់ ដើម្បីដេញថ្លៃ បានគម្រោង នៅបរទេស រដ្ឋាភិបាលបារាំង នៅធ្មឹង មិនចាត់វិធានការជាក់ស្តែងអ្វីទាំងអស់។ រហូតមកដល់ពេលនេះ មិនទាន់មានក្រុមហ៊ុនបារាំងមួយ ដែលធ្លាប់ប្រព្រឹត្តពុករលួយ នៅបរទេស ជាប់សំណាញ់ច្បាប់ ត្រូវដាក់ពិន័យ ធ្ងន់ធ្ងរ ពីតុលាការបារាំង នៅឡើយទេ។
ផ្ទុយទៅវិញ គេរកឃើញថា មានក្រុមហ៊ុនបារាំងធំៗ ជាច្រើនបានជាប់ក្នុងសំណាញ់ច្បាប់របស់សហរដ្ឋអាមេរិក។ ក្រុមហ៊ុនបារាំង ដូចជា Technip Alcatel Lucent ក្រុមហ៊ុនប្រេងTotal ធនាគារBNP Parisbas ជាដើមសុទ្ធតែត្រូវជាប់ជុចតុលាការអាមេរិកាំង ក្នុងរឿងប្រព្រឹត្តអំពើពុករលួយ នៅបរទេស។ ករណីចុងក្រោយដែល ច្បាស់ជាងគេ គឺក្រុមហ៊ុនAlstom របស់បារាំង ដែលជំនាញខាងសាងសង់ផ្លូវគមនាគមន៍ ជាពិសេស រទេះភ្លើង ត្រូវបានតុលាការអាមេរិកាំង កាត់ទោស កាលពីចុងឆ្នាំ មុន ពិន័យជាប្រាក់ដល់ទៅ ៧៧២លានដុល្លារ។
អង្គការតម្លាភាពបង្ហាញ ការយល់ស្របរបស់ខ្លួន ជាមួយការលើកឡើងកន្លងមក របស់អង្គការOCDE ដែលថា រដ្ឋាភិបាលបារាំងយឺត ប្រយុទ្ធប្រឆាំងគ្មានប្រសិទ្ធិភាព អំពើពុករលួយរបស់ក្រុមហ៊ុនបារាំង នៅ បរទេស។ ដូចសហភាពអឺរ៉ុប អង្គការOCDEបានបន្ទោសរដ្ឋាភិបាល ថាមិនបានធានាឯករាជ្យភាព ដល់អាយ្យការបារាំង ដែលត្រូវស៊ើបអង្កេតលើករណីប្រព្រឹត្តិអំពើពុករលួយរបស់ក្រុមហ៊ុននៅបរទេស។ ជាញឹកញយ គេរកឃើញថា ស្ថាប័នរដ្ឋមួយនេះ ដែលស្ថិតនៅក្រោមការគ្រប់គ្រងរបស់ក្រសួងយុត្តិធម៌បារាំង តែងតែស្ថិតនៅក្រោមឥទ្ធិពលរបស់អ្នកនយោបាយ។
មួយវិញទៀត នៅពេលគេចាប់ផ្តើមស៊ើបអង្កេតទៅលើក្រុមហ៊ុនបារាំងនៅបរទេស ដូចជាករណី ក្រុមហ៊ុនតូតាល់ នៅលីប៊ី ឬក្រុមហ៊ុនVeolia នៅការតា ជាដើម មន្រ្តីយុត្តិធម៌បារាំង ច្រើនជួបឧបសគ្គ មិនអាចទទួលបានឯកសារ ភស្តុតាង ពីអាជ្ញាធរមានសមត្ថកិច្ច ដែលតែងតែលើកឡើង ថា សំណុំរឿងទាំងនោះ មានជាប់ពាក់ព័ន្ធកិច្ចការសម្ងាត់ជាតិ។
ទីភ្នាក់ងារប្រយុទ្ធប្រឆាំងអំពើពុករលួយ នៅឆ្នាំ ២០១៦
រដ្ឋាភិបាលបារាំង បានធ្វើកំណែទម្រង់ជាច្រើន ដែលនៅក្នុងនោះ មានផងដែរ ការបង្កើតអាយ្យការជាតិផ្នែកហិរញ្ញវត្ថុ។ ច្បាប់បារាំងថ្មី ស្តីពីការប្រយុទ្ធប្រឆាំងអំពើពុករលួយ ទៀតសោត នឹងផ្តល់មធ្យោបាយច្រើនដល់រដ្ឋាភិបាលបារាំង ដើម្បីអាចចូលត្រួតពិនិត្យនយោបាយ វិធានការរបស់ក្រុមហ៊ុន ដើម្បីប្រយុទ្ធប្រឆាំងអំពើពុករលួយ។ មួយវិញទៀត សេចក្តីព្រាងច្បាប់ស្តីពីតម្លាភាព ក្នុងវិស័យសេដ្ឋកិច្ច នឹងត្រូវដាក់ឲ្យសភាពិភាក្សា និងអនុម័ត នៅដើមឆ្នាំក្រោយ។ សេចក្តីព្រាងច្បាប់ចុងក្រោយនេះ សំខាន់ ព្រោះនៅក្នុងនោះ មានចែងផងដែរ ពីការបង្កើតទីភ្នាក់ងារ ជាតិមួយ ដើម្បី តាមដានចាប់បទល្មើសពុករលួយរបស់ក្រុមហ៊ុន នៅបរទេស។
រដ្ឋាភិបាលបារាំងបានចូលរួមប្រយុទ្ធប្រឆាំង អំពើពុករលួយអន្តរជាតិ ដោយបានចុះហត្ថលេខាលើអនុសញ្ញាចងក្រងដោយអង្គការOCDE។ អង្គការOCDEកោតសរសើរ និងលើកទឹកចិត្តរដ្ឋាភិបាលបារាំង បន្ទាប់ពី រដ្ឋអាជ្ញាបារាំងបានបើកការស៊ើបអង្កេតទៅលើសំណុំរឿងពុករលួយ នៅបរទេស ដល់ទៅ ២៤ករណី ចាប់តាំងពីឆ្នាំ ២០១២។
ប៉ុន្តែ អង្គការOCDEសោកស្តាយថា ការដាក់ទោស ពីតុលាការបារាំង ទៅលើក្រុមហ៊ុនដែលជាប់ពាក់ព័ន្ធ ប្រព្រឹត្តអំពើពុករលួយ គឺនៅស្រាលនៅឡើយ។ រហូតមកដល់ពេលនេះ បុគ្គល និងក្រុមហ៊ុនទាំង៧ ដែលរដ្ឋអាជ្ញាបារាំងចោទប្រកាន់ក្នុងបទប្រព្រឹត្តអំពើពុករលួយ នៅបរទេស គឺសុទ្ធសឹងតែជាមនុស្សសំខាន់ និងជាក្រុមហ៊ុនធំៗ គ្រាក់ៗ របស់បារាំង។ ដូច្នេះ ក្រៅតែការកសាងសំណុំរឿង ប្រឆាំងនឹងក្រុមហ៊ុនទាំងនោះ ដំណើរការដោយយឺតៗហើយ ការដាក់ទោស គឺសឹងតែគ្មាន ព្រោះតែទោសជាប់ពន្ធនាគារត្រូវតុលាការព្យួរ ចំណែកការពិន័យជាប្រាក់ ក៏មានតិចតួច ស្តួចស្តើង បំផុត។ ឧទាហរណ៍ ក្រុមហ៊ុនSafran បារាំង ជាប់ពាក់ព័ន្ធក្នុងរឿងសូកប៉ាន់ ដើម្បីបានកុងត្រា តម្លៃ ១៧០លានអឺរ៉ូ សម្រាប់ផលិត កាត អត្តសញ្ញាណប័ណ្ណ នៅប្រទេស នីហ្សេរីយ៉ា។ សាលាដំបូងបារាំង បានជំនុំជម្រះ សម្រេចឲ្យក្រុមហ៊ុនបង់ពិន័យ ៥សែនអឺរ៉ូ។ ប៉ុន្តែ កាលពីខែកញ្ញាឆ្នាំមុន សាលាឧទ្ធរណ៍បារាំងបានទម្លាក់ចោលការចោទប្រកាន់។ មានន័យថា ក្រុមហ៊ុនមិនត្រូវបង់ប្រាក់ពិន័យអ្វីសូម្បីមួយសេន។
អនុសាសន៍របស់អង្គការតម្លាភាព ទៅរដ្ឋបារាំង
នៅពេលដែលបារាំង ត្រូវរិះគន់ជាញឹកញយ ក្នុងរឿងខ្វះយន្តការសម្រាប់ប្រយុទ្ធប្រឆាំងយ៉ាងប្រសិទ្ធិភាព អំពើពុករលួយ របស់ក្រុមហ៊ុនបារាំង នៅបរទេស អង្គការតម្លាភាពអន្តរជាតិ បានស្នើអនុសាសន៍ សំខាន់មួយ នោះ គឺការបង្កើតតុលាការពិសេសសម្រាប់កាត់ក្តី ជំនុំជម្រះបុគ្គល ឬក្រុមហ៊ុនបារាំង ដែលជាប់ពាក់ព័ន្ធប្រព្រឹត្តអំពើពុករលួយ នៅបរទេស។
អង្គការតម្លាភាពចង់ឲ្យរដ្ឋបារាំង យកគំរូ ធ្វើតាមប្រព័ន្ធយុត្តិធម៌អាមេរិកាំង ដែលមានឈ្មោះថា ករណីអំពើពុករលួយរបស់ក្រុមហ៊ុនបរទេស។ រហូតមក តុលាការអាមេរិកបានប្រើប្រព័ន្ធនេះ ដើម្បីជំនុំជម្រះ ករណីពុករលួយរបស់ក្រុមហ៊ុនបារាំង ដែលជាប់ចោទប្រព្រឹត្តអំពើពុករលួយ នៅអាមេរិក។ ជាមួយនឹងប្រព័ន្ធ ពិសេសមួយនេះ តុលាការអាមេរិក មិនបានប្រកាស ថា ខ្លួនរកឃើញថា ក្រុមហ៊ុនបារាំងមានទោស នោះទេ ឬ គ្មានទេ ជាប់ទោស ក្នុងពន្ធនាគារ។ ប៉ុន្តែ ផ្ទុយទៅវិញ ក្រុមហ៊ុនបារាំង ទាំងនោះត្រូវបង់ប្រាក់ពិន័យ ដែលមានរហូតដល់ទៅ រាប់រយលានដុល្លារ ដូចករណីក្រុមហ៊ុន បារាំង Alstom ជាដើម។
តាមអង្គការតម្លាភាពអន្តរជាតិ បើសិនបារាំង បង្កើតតុលាការពិសេស ដោយយកគំរូតាមប្រព័ន្ធអាមេរិកាំងមែន នោះ បារាំង នឹងកាត់បន្ថយឧបសគ្គ បានច្រើន។ ពោលគឺ ប្រព័ន្ធនេះ នឹងមិនសំដៅថ្កោលទោសដាក់ពន្ធនាគារទេ ប៉ុន្តែ គឺការដាក់ពិន័យជាប្រាក់ ដូចជាការបង់សងជម្ងឺចិត្តដល់ជនរងគ្រោះដោយសារអំពើពុករលួយរបស់ក្រុមហ៊ុនបារាំង នៅបរទេស ក៏ដូចជាការរឹបអូសយកទ្រព្យដែលបានមកពីសកម្មភាពខុសច្បាប់ ឲ្យមកចូលជាសម្បត្តិរដ្ឋ។ ប្រាកដណាស់ ការដាក់ពិន័យទាំងនោះ គឺជាថ្នូរទៅនឹងការបោះបង់ទាំងស្រុង ការប្តឹងផ្តល់ ប្រឆាំងនឹងក្រុមហ៊ុនទាំងនោះ នៅតុលាការ។ សម្រាប់អង្គការតម្លាភាពអន្តរជាតិ វិធានការខាងលើនឹងជួយស្តារ សមត្ថភាព របស់ប្រព័ន្ធតុលាការបារាំងផង និង ដើម្បី ដកអភ័យឯកសិទ្ធិ ឈប់ឲ្យក្រុមហ៊ុនបារំាង ប្រព្រឹត្តអំពើពុករលួយ សូកប៉ាន់ នៅបរទេសផង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ