បារាំង និងអាមេរិកបរិហារលើការថ្លែងរបស់ប្រមុខការទូតស៊ីរីទាក់ទងនឹងលោកអាសាដ
សំណុំរឿងនៃប្រទេសស៊ីរីបានក្លាយជាប្រធានបទចម្បងនៃដំណើរទស្សនកិច្ចរបស់លោកប្រមុខការទូតអាមេរិកចន ឃ៊ែរីក្នុងទីក្រុងប៉ារីស ប្រទេសបារាំងនាថ្ងៃអាទិត្យ ទី១៣ មីនា។ នៅក្រោយជំនួបជាមួយសមភាគីបារាំង អាល្លឺម៉ង់ អ៊ីតាលី អង់គ្លេស និងសហភាពអឺរ៉ុប លោកចន ឃ៊ែរីបានបរិហារលើពាក្យសម្តីរបស់លោកប្រមុខការទូតស៊ីរីវ៉ាលីដ មូអាឡិមដែលបដិសេធមិនព្រមឲ្យលើកយកបុគ្គលលោកប្រធានាធិបតីស៊ីរីអាសាដទៅជជែកនៅក្នុងកិច្ចចរចាស្វែងរកសន្តិភាពឲ្យស៊ីរីបើកធ្វើក្នុងថ្ងៃចន្ទ ទី១៤ មីនានេះក្នុងទីក្រុងហ្សឺណែវ ប្រទេសស្វ៊ីស។ ប្រតិកម្មបរិហារដូចគ្នានេះក៏មានពីលោករដ្ឋមន្រ្តីការបរទេសបារាំងហ្សង់ម៉ាក អេរ៉ូដែរ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥២
សម្រាប់លោកប្រមុខការទូតអាមេរិកចន ឃ៊ែរីគឺច្បាស់ណាស់ ការថ្លែងរបស់លោករដ្ឋមន្រ្តីការបរទេសស៊ីរីវ៉ាលីដ មូអាឡិមជាសក្ខីកម្មមួយដែលបង្ហាញយ៉ាងច្បាស់ក្រឡែតថា លោកបានព្យាយាមធ្វើឲ្យមានភាពរអាក់រអួលនៅក្នុងដំណើរកិច្ចចរចាស្វែងរកសន្តិភាពឲ្យស៊ីរីក្នុងទីក្រុងហ្សឺណែវ ប្រទេសស្វ៊ីស។ ទាក់ទងនឹងកិច្ចព្រមព្រៀងឈប់បាញ់ដែលបានចូលជាធរមានតាំងពីថ្ងៃទី២៧ កុម្ភៈត្រូវបានលោកឃ៊ែរីព្រមានថា គ្រប់ភាគីត្រូវតែបញ្ឈប់ការប្រឈមមុខដាក់គ្នាផ្លូវអាវុធ ចូលរួមសហការណ៍ក្នុងការដឹកជញ្ជូនជំនួយមនុស្សធម៌ និងគោរពឲ្យបានត្រឹមត្រូវនូវដំណើរការកិច្ចចរចាក្នុងការបង្កើតឲ្យបានរដ្ឋាភិបាលអន្តរកាលមួយនៅស៊ីរី។
នៅត្រង់ចំណុចនេះត្រូវបានលោកឃ៊ែរីបន្ថែមធ្ងន់ៗថា បើរបបក្រុងដាម៉ាស និងសម្ព័ន្ធមិត្តស៊ីរីគិតថា សហគមន៍អន្តរជាតិមិនអាចធ្វើអ្វីកើតទេនោះ គឺពួកគេកំពុងយល់ច្រឡំធំណាស់។ ក្រៅពីព្រមានរបបស៊ីរី និងសម្ព័ន្ធមិត្តស៊ីរី លោកប្រមុខការទូតអាមេរិកក៏បានចាប់អារម្មណ៍លើយុទ្ធនាការវាយប្រហារពួកជីហាតអង្គការរដ្ឋអ៊ីស្លាមក្នុងទឹកដីស៊ីរីដែរ។ តាមលោកឃ៊ែរី ក្នុងរយៈពេល ៣សប្តាហ៍ចុងក្រោយនេះ កម្លាំងសម្ព័ន្ធមិត្តអារ៉ាប់ និងបស្ចិមលោកបានសម្លាប់ពួកជីហាតអង្គការរដ្ឋអ៊ីស្លាមចំនួន ៦០០នាក់ និងរឹបអូសដែនដីពីពួកនេះបានវិញចំនួន ៣ ០០០គីឡូម៉ែត្រក្រឡា។
ប្រតិកម្មបរិហារសម្តីរបស់លោកប្រមុខការទូតស៊ីរីវ៉ាលីដ មូអាឡិមក៏មានពីលោករដ្ឋមន្រ្តីការបរទេសបារាំងហ្សង់ម៉ាក អេរ៉ូដែរ។ លោកអេរ៉ូដែលបានចាត់ទុកសម្តីលោកមូអាឡិមថាជាសញ្ញាអាក្រក់មួយដែលមិនបានឆ្លើយតបនឹងស្មារតីនៃបទឈប់បាញ់នៅស៊ីរីទេ។ លោកហ្សង់ម៉ាក អេរ៉ូបានបន្ថែមថា ដើម្បីធានាពីភាពជឿជាក់នៃកិច្ចចរចា គេត្រូវតែគោរពឲ្យបានត្រឹមត្រូវនូវបទឈប់បាញ់ និងការបើកផ្លូវជំនួយមនុស្សធម៌ដោយសេរី៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ