ទស្សនកិច្ចនាយករដ្ឋមន្ត្រីក្រិកនៅម៉ូស្គូ ក្រោមក្រសែភ្នែកសហភាពអឺរ៉ុប
មូលហេតុមកពីគណៈកម្មការអឺរ៉ុបដែលជាក្បាលម៉ាស៊ីនដឹកនាំសហភាពអឺរ៉ុបដាក់ទណ្ឌកម្មទល់នឹងរុស្ស៊ីបានព្រមានក្រិកជាសមាជិកសហភាពនេះថា នាកិច្ចចរចាជាមួយលោកប្រធានាធិបតីរុស្ស៊ីពូទីនថ្ងៃនេះ ត្រូវតែប្រកាន់យកគោលជំហររួមតែមួយរបស់សហភាពនេះចំពោះប្រទេសរុស្ស៊ីដែលជាប់ចោទក្នុងការបង្កឲ្យមានវិបត្តិនៅអ៊ុយក្រែន។
ចុះផ្សាយនៅថ្ងៃ៖
ស្តាប់ - ០២:០៨
ការព្រមាននេះមិនមែនចៃដន្យទេ ពីព្រោះក្នុងរបៀបវារៈប្រចាំថ្ងៃ តាមដែលវិមានក្រេមឡាំងប្រកាសឲ្យដឹង លោកនាយករដ្ឋមន្ត្រីក្រិក Alexis Tsipras ដែលជាប្រមុខរដ្ឋាភិបាលទី១៨៦ ក្នុងប្រវត្តិក្រិកនឹងពិភាក្សាជាមួយលោកប្រធានាធិបតីរុស្ស៊ីពូទីន គឺចង្កោមបញ្ហាយ៉ាងទូលំទូលាយនៃសហប្រតិបត្តិការរវាងប្រទេសទាំងពីរ ក្នុងនោះមាន វិស័យពាណិជ្ជកម្ម-សេដ្ឋកិច្ច វិស័យវិនិយោគ វប្បធម៌-មនុស្សធម៌ ហើយជាតុល្យការនៃកិច្ចចរចានឹងមានចុះហត្ថលេខាលើឯកសារទ្វេភាគីមួយចំនួន។
ពិតជាទាក់ទងនឹងវិស័យពាណិជ្ជកម្ម-សេដ្ឋកិច្ចដែលអ្នកនាំពាក្យវិមានក្រេមឡាំងលោក Dmitri Peskov លំអិតថា កិច្ចចរចាអាចប៉ះលើបម្រាមរបស់រុស្ស៊ីដែលហាមមិនឲ្យនាំចូលនូវគ្រឿងបរិភោគពីប្រទេសណានៃបស្ចិមលោកបែបយ៉ាងសហភាពអឺរ៉ុបជាដើម ដែលបានដាក់ទណ្ឌកម្មប្រឆាំងរុស្ស៊ី។ លោក Peskov បំភ្លឺថា ក្រិក និងរុស្ស៊ីតែងសហការគ្នាយ៉ាងផុសផុលលើវិស័យកសិកម្ម ប៉ុន្តែ ដោយមកពីចម្លើយបកវិញពីខាងរុស្ស៊ី ឥឡូវទំហំផ្តោះប្តូរពាណិជ្ជកម្មវិស័យនេះធ្លាក់ចុះមែនទែន។ ដូច្នេះបញ្ហានេះ ចង់ ឬមិនចង់ គង់នឹងចោទឡើងនាកិច្ចចរចា។
រដ្ឋាភិបាលក្រិកមុនដល់ទស្សនកិច្ចនេះបានសំដែងសេចក្តីសង្ឃឹមថា ជុំវិញបម្រាមពីខាងរុស្ស៊ីចំពោះកសិផលក្រិកអាចនឹងរកឃើញដំណោះស្រាយជាវិជ្ជមាន ហើយលទ្ធផលវានឹងជួយទ្រទ្រង់ដោយឥតបង្អែរបង្អង់ឡើយដល់សេដ្ឋកិច្ចក្រិកដែលកំពុងស្ថិតក្នុងស្ថានភាពលំបាក។ មិនតែប៉ុណ្ណោះ នាកិច្ចចរចានៅម៉ូស្គូថ្ងៃនេះ សាច់រឿងក៏ប៉ះលើសំណូមពរក្រិកសុំឲ្យរុស្ស៊ីបញ្ចុះថ្លៃឧស្ម័នដែលរុស្ស៊ីលក់ទៅឲ្យក្រិក។ អំពីពាក្យចចាមអារ៉ាមដែលថា ក្រិកចង់ពឹងរុស្ស៊ីឲ្យផ្តល់ជំនួយហិរញ្ញវត្ថុ លោកនាយករដ្ឋមន្ត្រីក្រិក Alexis Tsipras មុននឹងចេញដំណើរមកធ្វើទស្សនកិច្ចបានថ្លែងថា ក្រិក និងដោះស្រាយដោយខ្លួនឯង បញ្ហាបំណុលរដ្ឋរបស់ខ្លួន គឺក្នុងក្របខ័ណ្ឌនៃតំបន់ចាយលុយអឺរ៉ូផ្ទាល់។
តើកិច្ចចរចានៅម៉ូស្គូថ្ងៃនេះនឹងចប់ទៅយ៉ាងណាៗ លោកប្រមុខរដ្ឋរុស្ស៊ីពូទីន និងលោកប្រមុខរដ្ឋាភិបាលក្រិក Alexis Tsipras នឹងប្រកាសឲ្យដឹងក្នុងសន្និសីទកាសែតរួមដែលគ្រោងប្រព្រឹត្តទៅបន្ទាប់ពីកិច្ចចរចា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ