សន្និសីទកាសែតដ៍ទើសទាល់សម្រាប់លោកពូទីន ខណៈលោកម៉ាក្រុង បង្ហាញជំហរម៉ឹងម៉ាត់ លើគ្រប់បញ្ហា
កាលពីថ្ងៃចន្ទទី២៩ ឧសភាលោកម៉ាក្រុង ប្រធានាធិបតីបារាំង បានទទួលជួបលោកពូទីន ប្រធានាធិបតីរុស្ស៊ី នៅព្រះរាជវាំងវ៉ែកសៃ ដ៏ស្កឹមស្កៃ ក្បែរក្រុងប៉ារីស។ ថ្នាក់ដឹកនាំទាំងពីរ បានឆ្លើយសំណួររបស់អ្នកយកព័ត៌មាន បន្ទាប់ពីបានជួបនិយាយគ្នា តែពីរនាក់ លើសំណុំរឿងជាច្រើន។ សន្និសីទកាសែត ដែលតាមការសង្កេតជាទូទៅ គេឃើញលោកពូទីន បានសំដែងអាកប្បកិរិយាទើសទាល់ ក្នុងទឹកមុខយ៉ាងមាំ ខណៈដែលលោកម៉ាក្រុង ប្រធានាធិបតីបារាំង បានបង្ហាញគោលជំហរ យ៉ាងម៉ឹងម៉ាត់ ជុំវិញឆន្ទៈ ក្នុងការដោះស្រាយវិបត្តិអន្តរជាតិ ជាមួយនឹងរុស្ស៊ី។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:៥១
សម្រាប់ជំនួបលើកទីមួយ ជាមួយនឹងលោកវ្លាឌីមៀរ ពូទីន ប្រធានាធិបតីថ្មីបារាំង បានជ្រើសយកប្រាសាទ Le Grand Trianon ដ៏ស្កឹមស្កៃ ដើម្បីទទួលលោកពូទីន ឲ្យសមនឹងកិត្តិយស។ តែយ៉ាងណាគេមិនអាចប្រើពាក្យថា ជាជំនួបដ៏ល្អូកល្អឺនបានទេ ព្រោះបើសង្កេតមើលអាកប្បកិរិយា របស់មេដឹកនាំទាំងពីរ គឺវាមានលក្ខណៈឆ្ងាយគ្នា និងខ្លាចគ្នាទៅវិញទៅមកនៅឡើយ។
ក្នុងខណៈដែល លោកអេម៉ានុយអែល ម៉ាក្រុង ធ្វើសន្ទរកថាសង្ខេប ប្រាប់ទៅអ្នកកាសែត ស្តីពីលទ្ធផលនៃការជជែកគ្នា គេសង្កេតឃើញ លោកពូទីន មានអាកប្បកិរិយារសេសរសោះ បែបធុញទ្រាន់ ព្រមទាំងដកដង្ហើមធំម្តងម្កាល ក្នុងទឹកមុខយ៉ាងមាំ។ ចំណែកលោកប្រធានាធិបតីបារាំងវិញ បានបង្ហាញកាយវិការស្វាហាប់ និយាយពន្យល់យ៉ាងម៉ឹងម៉ាត់ ច្បាស់ៗ ជុំវិញគោលជំហរលោក ក្នុងការដោះស្រាយបញ្ហាជាមួយរុស្ស៊ី ជាពិសេស ទាក់ទងនឹងសំណុំរឿងស៊ីរី និងអ៊ុយក្រែន។
លោកពូទីន ថែមទាំងកាន់តែបញ្ចេញអាការៈទើសទាល់ទៅទៀតនោះ នៅពេលអ្នកកាសែត បានចោទសួរ អំពីការដែលលោក បានទទួលជួបអ្នកស្រី ម៉ារីន ឡឺប៉ែន នៅមូស្គូ និងបញ្ហាដែលចោទថា រដ្ឋាភិបាលរុស្ស៊ី ជាអ្នកនៅពីក្រោយ ការចូលលូកដៃកកូកកាយ កិច្ចការបោះឆ្នោតបារាំង។ រីឯលោកម៉ាក្រុងវិញ បានឆ្លើយ យ៉ាងច្បាស់ទៅកាន់អ្នកកាសែតរុស្ស៊ីម្នាក់ ថាលោកចាត់ទុក បណ្តាញព័ត៌មានរុស្ស៊ី ពីរ គឺ Sputnik និង Russia Today គឺជាបណ្តាញព័ត៌មានដែលគ្មានវិជ្ជាជីវៈ ប្រឌិតបំភ្លៃព័ត៌មាន ដើម្បីបំរើការឃោសនានយោបាយ។ លោកពូទីន ដែលនៅឈរក្បែនោះ បានរក្សាទឹកមុខយ៉ាងមាំ មិនកំរើកអ្វីទាំងអស់។
ភាពក្លាហាន មិនចុះញ៉ម និងនិយាយដោយត្រង់ របស់លោកម៉ាក្រុង បានធ្វើឲ្យលោកពូទីន មិននឹកស្មានដល់ឡើយ។ លោកម៉ាក្រុង បានបញ្ជាក់ថា លោកបានលើកឡើងដោយត្រង់ ពីបញ្ហាគោរពសិទ្ធិមនុស្ស នៅរុស្ស៊ី ព្រមទាំងការធ្វើទុក្ខបុកម្នេញទៅលើក្រុមអ្នកស្រលាញ់ភេទដូចគ្នា នៅតំបន់ឆេឆិននី។ លោកពូទីន បានសន្យាថានឹងពិនិត្យមើល ហើយផ្តល់ដំណឹងមកឲ្យក្រុមការងារបារាំង ឲ្យបានទៀងទាត់។
ទាក់ទិននឹងសំណុំរឿងធំៗ ទីមួយសំណុំរឿងស៊ីរី ប្រធានាធិបតីទាំងពីរ បានសន្យានឹងគ្នាថា ចាប់ដៃគ្នាធ្វើការ ដើម្បីបោសសម្អាតបណ្តាញជីហាតភេរវកម្ម។ ប្រទេសទាំងពីរនឹងបង្កើតក្រុមការងារពិសេសមួយរួមគ្នា។ ក្នុងន័យនេះ បារាំងនិងរុស្ស៊ី យល់ស្របគ្នា ថាមិនត្រូវឲ្យស៊ីរី បែកខ្ញែកទេ ហើយត្រូវមានរដ្ឋាភិបាលរួមមួយ គ្រប់គ្រង ឲ្យរឹងមាំជាបង្អែក។ ត្រង់នេះ គឺគេចង់សំដៅទៅលើការបន្តរក្សារដ្ឋាភិបាលបាស្ឆា អាល់អាសាដ។ តែលោកម៉ាក្រុង បានទៀមទារលក្ខខណ្ឌពីរធំៗ គឺទីមួយហាមប្រើប្រាស់អាវុធគីមី។ បារាំងនឹងចេញមុខ វាយប្រហារវិញ បើកងទ័ពណា ហ៊ានប្រើអាវុធគីមី ទៅលើប្រជាជនស៊ីរី។ ឯលក្ខខណ្ឌទីពីរ គឺបារាំងទាមទារ ឲ្យមានការបើកផ្លូវនិងធានាសន្តិសុខ ដល់ក្រុមការងារនៃអង្គការមនុស្សធម៌នៅស៊ីរី។
ចំណែកសំណុំរឿងអ៊ុយក្រែនវិញ បារាំងនិងរុស្ស៊ីបានសន្យារក្សាភាគី៤ ក្នុងការដោះស្រាយ ដើម្បីឈានទៅអនុវត្តកិច្ចព្រមព្រាងទីក្រុងមីនស្គ៍ ឲ្យបានទាំងស្រុង។ លោក ពូទីន ក៏បានឆ្លៀតឆ្លើយបន្ថែមថា ទណ្ឌកម្មសេដ្ឋកិច្ច ដែលបារាំង និងសហគមន៍អន្តរជាតិ បានដាក់លើរុស្ស៊ីនោះ គឺវាមិនបានជួយអ្វីដល់អ៊ុយក្រែនទេ ផ្ទុយទៅវិញ គឺវាបានបង្ករការលំបាកដល់សេដ្ឋកិច្ចទាំងអស់គ្នា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ