ប៊ែលហ្សិក៖ នគរបាលក្រុងអង់វែរ ចាប់បានបុរសម្នាក់ ដែលប៉ុនប៉ងបើកឡានបុកមនុស្សតាមផ្លូវ
កាលពីរសៀលថ្ងៃព្រហស្បតិ៍ ទី២៣មីនា នគរបាលក្រុងអង់វែរ ភាគខាងជើងប្រទេសបែលហ្ស៊ិកបានចាប់ឃាត់ជនម្នាក់ ទាន់ពេលវេលា ក្នុងពេលដែលជននេះ បានបើករថយន្តក្នុងល្បឿនលឿនបំផុត នៅលើដងផ្លូវកណ្តាលទីក្រុង។ ជនដែលស្លៀកពាក់បិទមុខ ត្រូវគេសង្ស័យថា មានបំណងប្រព្រឹត្តិអំពើភេរវកម្ម ដោយបើករថយន្តបុកសម្លាប់មនុស្ស។ ហេតុការណ៍នេះ បានកើតឡើងមួយថ្ងៃប៉ុណ្ណោះ ក្រោយហេតុការណ៍ភេរវកម្ម នៅទីក្រុងឡុងដ៍ ដោយជនជីហាត បានបើករថយន្តបុកមនុស្សស្លាប់ ៣នាក់ មុននឹងទៅបុករបងមន្ទីរដ្ឋសភាអង់គ្លេស។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៨
ជនម្នាក់មានបិទមុខជិត បានបើករថយន្តក្នុងល្បឿនលឿនខ្លាំងខុសប្រក្រតី នៅលើដងវិថីធំបំផុត ដែលសំបូរទៅដោយហាងទំនិញ នៅកណ្តាលក្រុងអង់វែរ ភាគខាងជើងប្រទេសបែលហ្ស៊ិក។ ភ្លាមៗនោះ នរគបាល និងកងកម្លាំងពិសេសរបស់ប៊ែលហ្សិក បានចេញធ្វើអន្តរាគមន៍ ដេញតាមរថយន្តបង្កហេតុ រហូតទាល់តែស្ទាក់ចាប់បាន។ ជនល្មើស ត្រូវបានឃាត់ខ្លួន។
ក្រោយហេតុការណ៍នេះ ព្រះរាជអាជ្ញាសហព័ន្ធបែលហ្ស៊ិក បានធ្វើសន្និសិទកាសែត ដោយបានបញ្ជាក់ថា ជនបង្កហេតុដែលបើករថយន្ត មានអាយុ៤០ឆ្នាំ ជាជនជាតិបារាំង ដើមកំណើតអារ៉ាប់ មានទីលំនៅក្នុងប្រទេសបារាំង។ ចំណែករថយន្តដែលជននេះ បានប្រើប្រាស់ ក៏មានស្លាកលេខចុះបញ្ជីនៅបារាំងដែរ។ នៅក្នុងរថយន្ត សមត្ថកិច្ច បានរកឃើញអាវុធជាច្រើន មានដូចជាកាំបិត និងកាំភ្លើងហ្វុយហ្ស៊ីល មួយដើម ព្រមទាំងគ្រាប់ជាច្រើនបង់។
បើតាមការសន្និដ្ឋាន ជននេះអាចមានបំណង ប្រព្រឹត្តិអំពើមនុស្សឃាត ដោយការបើករថយន្តបុករះមនុស្សនៅតាមដងផ្លូវ រឺក៏អាចប្រើប្រាស់កាំភ្លើងដើម្បីបាញ់រះសម្លាប់មនុស្ស។ យោងតាមព័ត៌មាន ផ្តល់ឲ្យដោយអាជ្ញាធរប៊ែលហ្សិក គឺពុំមាននរណារងគ្រោះទេ ក្នុងហេតុការណ៍នេះ។ សមត្ថកិច្ចគ្រាន់តែបានលើកឡើងអំពី ករណីដែលអ្នកដំណើរថ្មើរជើង បានភ័យស្លន់ស្លោររត់ឡើងទៅលើចិញ្ចើមផ្លូវ នៅពេលឃើញរថយន្តនេះ បើកសំដៅក្នុងល្បឿនលឿន។
ទីក្រុងអង់វែរ ត្រូវស្ថិតនៅក្នុងស្ថានភាពអាសន្ន និងការប្រយ័ត្នប្រយែងសន្តិសុខ ក្នុងកំរិតខ្ពស់បំផុត។ លោកចៅហ្វាយក្រុងអង់វែរ ក៏ដូចជាលោកនាយករដ្ឋមន្ត្រីប៊ែកហ្ស៊ិក បានចេញមកអបអរសរសើរ ដល់ភាពរហ័សរហួន របស់កងកម្លាំងសន្តិសុខក្រុងអង់វែរ ដែលបានចាប់ស្ទាក់ជននេះ ទាន់ពេលវេលា មុនពេលដែលជននេះ ឈានទៅបង្កសោកនាដកម្ម។
យ៉ាងណាក៏ដោយ សមត្ថកិច្ចបែលហ្ស៊ិក នៅមិនទាន់សន្និដ្ឋានច្បាស់ប្រាកដថា ជននេះមានបំណងធ្វើភេរវកម្ម តាមការបង្គាប់របស់ក្រុមភេរវកម្មអ៊ីស្លាមណាមួយទេ។ គួរកត់សម្គាល់ថា ហេតុការណ៍នេះ កើតឡើងក្រោយភេរវកម្មនៅទីក្រុងឡុងដ៍ តែមួយថ្ងៃប៉ុណ្ណោះ ដែលជនជីហាតបានប្រើរថយន្តបុកសម្លាប់មនុស្ស៣នាក់នៅតាមផ្លូវ។ គេមិនទាន់ដឹងថា ជនបង្កហេតុនៅក្រុងអង់វែរ និងជនបង្កហេតុ នៅក្រុងឡុងដ៍ ជាបក្សពួកតែមួយរឺយ៉ាងណាទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ