អាល្លឺម៉ង់ចោទសួរពីការគ្រប់គ្រងអាវុធ ក្រោយហេតុការណ៍បាញ់រះ ដោយយុវជនរោគចិត្ត
ហេតុការណ៍បាញ់រះសម្លាប់មនុស្ស៩នាក់ ដែលបានកើតឡើងកាលពីថ្ងៃទី២២កក្កដា នៅទីក្រុងមុយនិច ប្រទេសអាល្លឺម៉ង់ គឺជាស្នាដៃរបស់យុវជនម្នាក់ ដែលមានជំងឺផ្លូវចិត្ត ហើយពុំមានជាប់ពាក់ព័ន្ធនឹងអំពើភេរវកម្ម របស់ក្រុមជីហាដអ៊ីស្លាមជ្រុលនិយមទេ។ មូលហេតុដែលជំរុញឲ្យឃាតករធ្វើអំពើនេះ ត្រូវបានគេដឹងហើយ តែអ្វីដែលជាចំងល់ធំនោះ គឺថាតើឃាតករអាយុ១៨ឆ្នាំនេះ បានអាវុធនិងគ្រាប់មកពីណា។ អាជ្ញាធរអាល្លឺម៉ង់ កំពុងតែចោទសួរ ពីប្រសិទ្ធិភាព នៃការគ្រប់គ្រងអាវុធជាតិផ្ទុះនៅអាល្លឺម៉ង់ ដើម្បីបង្ការហេតុការណ៍អកុសលបែបនេះ ទៅថ្ងៃមុខ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥៦
ពីរថ្ងៃក្រោយអំពើបាញ់រះសម្លាប់មនុស្ស ៩នាក់ នៅក្នុងផ្សារទំនើបមួយ ក្នុងទីក្រុងមុយនិច ប្រទេសអាល្លឺម៉ង់ អាជ្ញាធរស៊ើបអង្កេត បានកំណត់ជាផ្លូវការថា អំពើនេះ មិនមែនធ្វើឡើងដោយជនជីហាដអង្គការរដ្ឋអ៊ីស្លាមទេ។ យុវជនដែលជាឃាតករ មានឈ្មោះថា David Ali Sonboly អាយុ១៨ឆ្នាំ មានឪពុកម្តាយជាជនជាតិអ៊ីរ៉ង់ គឺជាក្មេងដែលមានបញ្ហាផ្លូវចិត្ត ហើយជាមនុស្សដែលនិយមចូលចិត្តអំពើហិង្សាបាញ់សម្លាប់។
ក្រុមស៊ើបអង្កេត បានរកឃើញភស្តុតាងជាច្រើន បញ្ជាក់ថាយុវជននេះ មានការចាប់អារម្មណ៍យ៉ាងខ្លាំងទៅលើឃាតករជនជាតិន័រវ៉េហ្ស ឈ្មោះAnders Behring Breivik ដែលបានបាញ់រះសម្លាប់មនុស្ស៧៧នាក់ នៅន័រវេហ្ស កាលពីថ្ងៃទី២២ កក្កដា ឆ្នាំ២០១១។ ជនដៃដល់ David Ali Sonboly មានបំណងធ្វើអំពើដូចគ្នានេះ ក្នុងថ្ងៃជាមួយគ្នា ដោយប្រើកាំភ្លើងប្រភេទដូចគ្នា ដើម្បីរំលឹកខួបប្រាំឆ្នាំនៃអំពើបាញ់ប្រហារនៅន័រវ៉េហ្ស។
យោងតាមសាក្សីជាអ្នកជិតខាង និងមិត្តរួមថ្នាក់របស់យុវជនជាឃាតករ បានបញ្ជាក់ថា យុវជននេះជាមនុស្សឈ្លក់វង្វេងតែនឹងល្បែងហ្គេមវីដេអូបាញ់គ្នា ហើយគ្មានមិត្តភ័ក្តទេ ដោយសាជននេះមិនមាត់មិនក ចូលចិត្តនៅតែម្នាក់ឯង។ បន្ថែមពីនេះ យុវជននេះ ធ្លាប់ត្រូវបានក្មេងសិស្សសាលាផ្សេងទៀត គម្រាមកំហែងធ្វើបាបទៀតផង។
សូមបញ្ជាក់ថា ក្នុងចំណោមជនរងគ្រោះស្លាប់ទាំង៩នាក់ គឺភាគច្រើនគឺជាយុវជនវ័យជំទង់។ នៅក្នុងកាបូបស្ពាយខ្នងរបស់យុវជនឃាតករ គេបានរកឃើញគ្រាប់កាំភ្លើងចំនួន៣០០គ្រាប់។ កាំភ្លើងដែលជននេះប្រើ គឺជាកាំភ្លើងប្រភេទ Glock 17 ក្បាលគ្រាប់៩មីលីម៉ែត្រ។ អាជ្ញាធរអាល្លឺម៉ង់ កំពុងតែតាមដានស្រាវជ្រាវ ពីប្រភពដើមនៃអាវុធដែលឃាតករបានប្រើប្រាស់។
លោករដ្ឋមន្ត្រីក្រសួងមហាផ្ទៃអាល្លឺម៉ង់ បានបញ្ជាក់ថា ច្បាប់គ្រប់គ្រងអាវុធជាតិផ្ទុះរបស់អាល្លឺម៉ង់ មានលក្ខណៈតឹងតែងណាស់។ ក៏ប៉ុន្តែប្រឈមមុខនឹងករណីនេះ គឺមានន័យថាច្បាប់នេះ នៅតែមានចំណុចខ្វះចន្លោះ។ លោកបន្ថែមថា វាជារឿងចាំបាច់បន្ទាន់នាពេលនេះ ដែលត្រូវស្វែងរកចំណុចខ្សោយ នៃការគ្រប់គ្រងអាវុធ ហើយត្រូវធ្វើការកែប្រែច្បាប់ជាថ្មី ដើម្បីបញ្ឈប់រាល់អំពើហិង្សាបែបនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ