ស៊ីរី៖ក្រុមហ្វាតិ អាល់-ឆាំ អតីតក្រុមអាល់កៃដា ប្រកាសទទួលខុសត្រូវភេរវកម្មទ្វេដង នៅដាម៉ាស
ចំនួនអ្នកស្លាប់ក្នុងភេរវកម្មចំនួន២ កាលពីថ្ងៃសៅរ៍ នៅក្រុងដាម៉ាស ប្រទេសស៊ីរី បានកើនឡើងដល់៧៤នាក់។ ភេរវកម្មទាំង២ ជាស្នាដៃរបស់ក្រុមហ្វាតិ អាល់-ឆាំ អតីតក្រុមអាល់កៃដា។ ថ្ងៃអាទិត្យ ១២មីនានេះ ក្រុមភេរវជនហ្វាតិ អាល់-ឆាំ បានប្រកាសថា សកម្មជនខ្លួន២រូប បានបង្កភេរវកម្មទាំង២នេះឡើង។
ចុះផ្សាយនៅថ្ងៃ៖ កែប្រែថ្ងៃទី៖
ភេរវកម្មចំនួន២ សម្លាប់មនុស្សជាង៧០នាក់ កាលពីថ្ងៃសៅរ៍ នៅក្រុងដាម៉ាស ប្រទេសស៊ីរី។ ជនរងគ្រោះជាង៤០នាក់ ជាជនជាតិអ៊ីរ៉ាក់ កាន់សាសនានិកាយស្ហ៊ីអ៊ីត ដែលបាននាំគ្នាមកស្មឹងស្មាធ នៅតាមចេតិយ ក្នុងក្រុងដាម៉ាស។ ភេរវកម្មគ្រាប់បែក បានសម្លាប់ជនស៊ីវិល កុមារ និងសកម្មជនប្រយុទ្ធគាំទ្ររដ្ឋាភិបាលលោកអាសាដផងដែរ។
យោងតាមក្រុមសិទ្ធិមនុស្សស៊ីរី ចំនួនមនុស្សស្លាប់ដោយភេរវកម្ម បានកើនឡើង ដោយសារតែជនរងគ្រោះរងរបួសធ្ងន់ធ្ងរពេក។ ភេរវកម្មកើតឡើងតាំងពីថ្ងៃសៅរ៍ តែទាល់តែថ្ងៃអាទិត្យ ទើបក្រុមភេរវជនហ្វាតិ អាល់ ឆាំ ជាអតីតក្រុមអាល់ កៃដា ចេញមុខប្រកាសទទួលខុសត្រូវ ដោយលើកឡើងថា ភេរវកម្មបង្កឡើងដោយវីរជនអ៊ីស្លាមរបស់ខ្លួនចំនួន២រូប។ ក្រុមហ្វាតិ អាល់ ឆាំ ប្រាប់ថា ការវាយប្រហារនេះ ជាសារផ្ញើទៅអោយអ៊ីរ៉ង់ និងក្រុមប្រយុទ្ធដែលគាំទ្ររដ្ឋាភិបាលក្រុងដាម៉ាស។ ក្រុមភេរវជនចង់សំដៅទៅលើក្រុមប្រយុទ្ធអេស្បូឡាលីបង់នោះឯង។
មុនការប្រកាសទទួលខុសត្រូវនេះ អ៊ីរ៉ាក់ដែលមានពលរដ្ឋខ្លួនស្លាប់ច្រើន ក្នុងភេរវកម្មនៅដាម៉ាស បានទំលាក់កំហុសភេរវកម្មទៅលើក្រុមឈ្មោះថា តាក់ហ្វ៊ីរី ជាប់ទាក់ទងក្រុមជ្រុលនិយមស៊ុននីត។ កាលពីថ្ងៃសៅរ៍ដែរ រដ្ឋាភិបាលស៊ីរីបានថ្កោលទោសភេរវកម្ម ដោយលើកឡើងថា ជាអំពើកំសាក ដើម្បីសងសឹកជ័យជំនះរបស់កងកម្លាំងអារ៉ាប់ ដែលបានប្រយុទ្ធកំចាត់ក្រុមភេរវជនរដ្ឋអ៊ីស្លាម និងក្រុមអាល់ ណូស្រា ដែលជាអតីតក្រុមអាល់ កៃដា។ ក្រុមអាល់ ណូស្រានេះ គឺក្រុមហ្វាតិ អាល់-ឆាំ ដែលបានប្រកាសទទួលខុសត្រូវភេរវកម្មទ្វេដង នៅក្រុងដាម៉ាស កាលពីថ្ងៃសៅរ៍ នេះឯង។
ក្រុមហ្វាតិ អាល់ ឆាំ នេះក៏ធ្លាប់ប្រកាសទទួលខុសត្រូវភេរវកម្មថ្ងៃ២៥កុម្ភៈ ប្រឆាំងក្រុមចារកិច្ចនៅតំបន់ហូម ភាគកណ្តាលដែរ។ ជាភេរវកម្មសម្លាប់មនុស្សជាង១០នាក់ ក្នុងនោះមានអ្នកជំនិតប្រធានាធិបតីអាសាដមួយរូប។ រុស្ស៊ី និងអាមេរិកចាត់ទុកក្រុមហ្វាតិ អាល់ឆាំ ថាជាក្រុមភេរវជន។ ក្រុមហ្វាតិ អាល់ ឆាំ គ្មានសិទ្ធិចូលរួមចរចាដោះស្រាយវិបត្តិសង្គ្រាមស៊ីរីឡើយ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ