អេស្ប៉ាញកំពុងស៊ើបអង្កេតលើករណីឆ្លងអេបូឡាលើកទីមួយ ក្នុងទឹកដីខ្លួន
គិលានុបដ្ឋាយិកាអេស្ប៉ាញដែលគេរកឃើញមានផ្ទុកមេរោគអេបូឡាត្រូវបានដឹក បញ្ជូនចូលជាបន្ទាន់ទៅមន្ទីរពេទ្យក្នុងទីក្រុងម៉ាឌ្រីដ។ គិលានុបដ្ឋាយិកា ធ្លាប់បានចូលរួមព្យាបាលបុព្វជិតពីររូប ដែលបានឆ្លងមេរោគអេបូឡា នៅក្នុងប្រទេសសៀរ៉ាឡេអូន។ នេះជាលើកទីមួយ ដែលករណីឆ្លងមេរោគអេបូឡាផ្ទុះឡើងក្នុងទឹកដីអឺរ៉ុប។ កាលពីចុងខែកញ្ញា មេរោគអេបូឡាបានឆ្លងចេញក្រៅទឹកដី អាហ្វ្រិក ដោយឆ្លងចូលដំបូងគេទៅក្នុងទឹកដីអាមេរិក។ លោកប្រធានាធិបតី បារ៉ាក់ អូបាម៉ាទើបបានចេញបញ្ជា កាលពីថ្ងៃម្សិលមិញ ឲ្យគេបង្កើនការត្រួតពិនិត្យបន្ថែមនៅតាមច្រកចូលនៅព្រលានយន្តហោះអាមេរិក។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០២:០៧
គិលានុបដ្ឋាយិកាជាតិអេស្ប៉ាញមានអាយុ៤០ឆ្នាំ។ គាត់ និងក្រុមបុគ្គលិកពេទ្យពិសេសផ្សេងទៀតធ្លាប់បានចូលព្យាបាលបុព្វជិតសាសនាគ្រឹស្តពីរ។ បុព្វជិតទាំងពីរដែលបានឆ្លងមេរោគអេបូឡានៅប្រទេសលីបេរីយ៉ា និងសៀរ៉ាឡេអូន ត្រូវបានគេបញ្ជូនឲ្យចូលមកព្យាបាលពិសេស នៅក្នុងមន្ទីរពេទ្យក្នុងទីក្រុងម៉ាឌ្រីដ។ បុព្វជិតទីមួយបានស្លាប់កាលពីខែសីហា ចំណែកបុព្វជិតទីពីរបានស្លាប់នៅថ្ងៃទី ២៥កញ្ញាកន្លងទៅ។
រហូតមកដល់ពេលនេះ គេនៅមិនទាន់ដឹងថា តើគិលានុបដ្ឋាយិកាឆ្លងមេរោគអេបូឡាបានយ៉ាងម៉េចទេ ប៉ុន្តែ គេគ្រាន់តែដឹងថា គិលានុបដ្ឋាយិកាខាងលើបានចូលទៅក្នុងបន្ទប់ អ្នកជម្ងឺទីពីរ ដល់ទៅពីរដង គឺនៅពេលត្រួតពិនិត្យរោគសញ្ញាលើកដំបូង នៅក្រោយពេលដែលបុព្វជិតបានស្លាប់។ គេសង្ស័យថា គិលានុបដ្ឋាយិកាអាចឆ្លងមេរោគអេបូឡា នៅក្នុងពេលដែលគាត់ចូលជាលើកទីពីរទៅក្នុងបន្ទប់ព្យាបាល ក្រោយអ្នកជម្ងឺស្លាប់។
នៅក្រោយបុព្វជិតទីពីរស្លាប់ដោយមេរោគអេបូឡា គិលានុបដ្ឋាយិកាបានដាក់ពាក្យសុំសម្រាកកាយ។ នៅថ្ងៃទី៣០ កញ្ញា គាត់ចាប់ផ្តើមមិនស្រួលខ្លួន ប៉ុន្តែ ទាល់តែ៥ថ្ងៃក្រោយ គឺពេលគាត់ត្រលប់មកពីវិស្សមកាលវិញ ទើបគាត់សម្រេចចូលទៅព្យាបាលនៅមន្ទីរពេទ្យ ជាទីដែលគេធ្វើតេស្តពីរដង បង្ហាញថា គាត់មានមេរោគអេបូឡា។ អាជ្ញាធរអេស្ប៉ាញ បានចាប់ដាក់បង្ឃាំងឲ្យនៅដាច់ដោយឡែក ក្រុមមនុស្ស និងបុគ្គលិកពេទ្យ៣០នាក់ផ្សេងទៀត ដែលធ្លាប់ប៉ះពាល់ មានទំនាក់ទំនងជាមួយស្រ្តី គិលានុបដ្ឋាយិកា។
រដ្ឋមន្រ្តីសុខាភិបាលអេស្ប៉ាញបាននិយាយធានាដល់ប្រជាជនក្នុងរដ្ឋធានីម៉ាឌ្រីដដែលកំពុងបារម្ភខ្លាចឆ្លងមេរោគអេបូឡា។ ថ្នាក់ដឹកនាំក្រសួងសុខាភិបាលបានបញ្ជាផងដែរឲ្យគេសើរើពិនិត្យឡើងវិញ ដើម្បីចង់ដឹងថា តើមន្ទីរពេទ្យមានបានគោរពក្រិតក្រម ម៉ត់ចត់ ដើម្បីការពារកុំឲ្យមានការឆ្លងរាតត្បាតមេរោគអេបូឡាដែរឬទេ។
អ្នកទទួលខុសត្រូវរបស់មន្ទីរពេទ្យក្នុងទីក្រុងម៉ាឌ្រីដ បាននិយាយថា គេបានចាត់វិធានការរក្សាអនាម័យយ៉ាងម៉ត់ចត់ នៅពេលទទួលព្យាបាលបុព្វជិត ទាំងពីរ ដែលឆ្លងមេរោគអេបូឡា។
តាមធម្មតា ដើម្បីចូលទៅព្យាបាលអ្នកជម្ងឺអេបូឡា គេតម្រូវឲ្យបុគ្គលិកពេទ្យប្រើប្រាស់សម្ភារៈ កម្រិតថ្នាក់ទី៤ ពោលគឺខោអាវបិទជិតដែលមិនអាចជ្រាបទឹក និងបំពង់ដកដង្ហើមដាច់ដោយឡែកមួយ។ ប៉ុន្តែ ផ្ទុយទៅវិញ តាមរូបភាពដែលបង្ហាញដោយបុគ្គលិកពេទ្យ និងត្រូវចុះផ្សាយដោយកាសែតក្នុងស្រុក ក្រុមគ្រូពេទ្យអេស្ប៉ាញបានប្រើកម្រិតសុវត្ថិភាពទីពីរ។ តាមបុគ្គលិកពេទ្យអេស្ប៉ាញ គេមិនបានពាក់ឯកសណ្ឋានបិទគ្របជិតទាំងស្រុងទេ ដើម្បីកុំឲ្យថប់ដង្ហើម ចំណែកស្រោមដៃ គ្រាន់តែត្រូវបិទភ្ជាប់រុំស្កុត ទៅនឹងដៃអាវតែប៉ុណ្ណោះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ