IMFជំរុញចិនអោយចាត់វិធានការបន្ទាន់ប្រឆាំងនឹងកំនើនបំណុល
អង្គការមូលនិធិរូបិយវត្ថុអន្តរជាតិ IMF បានជំរុញចិនអោយចាត់វិធានការបន្ទាន់ ដើម្បីដោះស្រាយបញ្ហាបំណុលសហគ្រាសដែលចេះតែកើនឡើង។ IMFបារម្ភពីស្ថានភាពហិរញ្ញវត្ថុចិនដែលកំពុងផុយស្រួយ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:១៤
អង្គការមូលនិធិរូបិយវត្ថុអន្តរជាតិIMF មិនចង់ឃើញដំណើរការសេដ្ឋកិច្ចចិនបន្តពឹងផ្អែកលើកំចីទៀតទេ។ IMF ជំរុញចិនអោយចាត់វិធានការបន្ទាន់ប្រឈមបញ្ហានេះ មិនដូច្នោះទេ កំណើនសេដ្ឋកិច្ចនឹងចុះខ្សោយ។
បើមិនគិតពីវិស័យហិរញ្ញវត្ថុ បំណុលសហគ្រាសចិនឆ្នាំ២០១៥ មានអត្រា១២០ភាគរយនៃផលិតផលសរុបក្នុងស្រុកចិន ហើយអាចកើនឡើងដល់ជិត១៤០ភាគរយ នៅឆ្នាំ២០១៩។ បំណុលមិនច្បាស់លាស់វិញ មានប្រហែល៥,៥ភាគរយ នៃបំណុលសរុប ហើយអាចកើនជាង១៥ភាគរយ។
ចិនបានខិតខំធ្វើអោយមានតុល្យភាពសេដ្ឋកិច្ច ដោយបានជំរុញអោយការប្រើប្រាស់ក្នុងស្រុកឡើងខ្ពស់ តែវាបានប៉ះពាល់ដល់ឧស្សាហកម្មធុនធ្ងន់ បែបយ៉ាងឧស្សាហកម្មដែកថែប។ ចិនផលិតដែកថែប ក្នុងស្រុកហួសតំរូវការប្រើប្រាស់ ផលិតក្នុងតម្លៃថោក ហើយលក់ចេញក្នុងតម្លៃថោកដូចគ្នា។ ឧស្សាហកម្មដែកថែប នឹងអុសធ្យូងពេលនេះ កំពុងរងបញ្ហាបំណុល។
ទោះបីរដ្ឋាភិបាលសន្យាបន្ថយការផលិតដែកថែបហួសតំរូវការ ក៏អង្គការមូលនិធិរូបិយវត្ថុអន្តរជាតិ នៅតែបារម្ភ។ សហគ្រាសរដ្ឋចិនមានបំណុលខ្ពស់ជាងសហគ្រាសឯកជន ព្រោះរដ្ឋអាចខ្ចីលុយ ក្នុងអត្រាការប្រាក់កម្រិតទាប។ បើគ្មានវិធានការបន្ទាន់ ប្រឈមបំណុលសហគ្រាស ហើយរដ្ឋនៅតែបន្តខ្ចីលុយ នោះវាអាចធ្វើអោយចិនពិបាកដោះស្រាយបញ្ហាកំនើនទៅថ្ងៃមុខ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ