ប៉ារីស-តូក្យូចង់សម្រេចកិច្ចព្រមព្រៀងដៃគូយុទ្ធសាស្ត្រពិសេសរវាងគ្នា
ចុះផ្សាយនៅថ្ងៃ៖
ស្តាប់ - ០៦:១៣
បន្ទាប់ពីអេស្ប៉ាញ ថ្ងៃនេះ ប្រតិភូជប៉ុនត្រូវងាកមកបារាំងម្តង។ កម្មវត្ថុគឺ ដើម្បីស្វែងរកគាំទ្រជប៉ុននៅលើឆាកអន្តរជាតិ និងម្យ៉ាងទៀតដើម្បីពង្រឹងភាពដៃគូយុទ្ធសាស្ត្រពិសេស។ ដៃគូយុទ្ធសាស្ត្រពិសេស ដែលប៉ារីសនិងតូក្យូ ចង់សម្រេចឱ្យបាននៅថ្ងៃព្រហស្បតិ៍នេះ នាឱកាសទស្សនកិច្ចរបស់រដ្ឋមន្ត្រីក្រសួងការបរទេសនិងការពារជាតិជប៉ុននៅប្រទេសបារាំង។ ពិសេស ព្រោះប្រភេទដៃគូយុទ្ធសាស្ត្របែបនេះ បារាំងមានតែជាមួយរុស្ស៊ីប៉ុណ្ណោះ។
ដៃគូយុទ្ធសាស្ត្រពិសេស ?
ដៃគូយុទ្ធសាស្ត្រពិសេសបារាំង-ជប៉ុន ត្រូវបានលើកឡើងតាំងពីខែមិថុនា ២០១៣ មកនាឱកាសទស្សនកិច្ចផ្លូវរដ្ឋរបស់លោកប្រធានាធិបតីបារាំង ហ្វ្រង់ស័រ ហូឡង់ និងលោករដ្ឋមន្ត្រីក្រសួងការបរទេស នៅជប៉ុន។ បារាំងនិងជប៉ុនចង់ចរចាបង្កើតភាពជាដៃគូឱ្យមានលក្ខណៈពិសេស ឱ្យស្របទៅនឹងលក្ខណៈពិសេសនៃទំនាក់ទំនងបារាំងជប៉ុន ដែលប្រកបដោយទំនុកចិត្ត ដោយឈរលើមូលដ្ឋានរួម និងបានទទួលផលប្រយោជន៍ដូចគ្នា។
នៅក្នុងសេចក្តីថ្លែងការណ៍រួមរវាងបារាំងនិងជប៉ុន ភាពជាដៃគូយុទ្ធសាស្ត្រពិសេស នឹងត្រូវបង្កើតឡើង ដើម្បីប្រយោជន៍សន្តិសុខ កំណើនសេដ្ឋកិច្ច ការជឿនលឿន និងវប្បធម៌។
វប្បធម៌ ៖ ភ្ជាប់ទំនាក់ទំនងសង្គមទាំងពីរឱ្យមួលរមិញចូលគ្នា ជាផលល្អណាស់សម្រាប់អនាគត។ ប្រជាជនបារាំងចូលចិត្តវប្បធម៌និងប្រពៃណីជប៉ុន ឯជប៉ុនវិញក៏មើលឃើញតម្លៃនៃវប្បធម៌បារាំង។ ការផ្តោះប្តូរវប្បធម៌គ្នា ភាសា បន្តធ្វើសហប្រតិបត្តិការស្អិតល្មួតដើម្បីរក្សាតម្លៃបេតិកភណ្ឌជាតិ។
សេដ្ឋកិច្ច ៖ ជំរុញឱ្យសេដ្ឋកិច្ចប្រទេសទាំងពីរខិតជិតចូលគ្នា ដើម្បីសម្រេចអាទិភាពកំណើនសេដ្ឋកិច្ច ការជឿនលឿន របកឃើញថ្មីៗ និងបង្កើតទីផ្សារការងារ ព្រមទាំងធ្វើឱ្យមានស្ថិរភាពហិរញ្ញវត្ថុ ពង្រឹងការធ្វើអធិការកិច្ចហិរញ្ញវត្ថុអន្តរជាតិ។ តាមរយៈភាពជាដៃគូយុទ្ធសាស្ត្រពិសេសនេះ ក៏មានការចរចារបង្កើតតំបន់ព្រមព្រៀងផ្តោះប្តូរពាណិជ្ជកម្មសេរីរវាងជប៉ុននិងអឺរ៉ុប។ តំបន់សេដ្ឋកិច្ចសំខាន់ពីររបស់ពិភពលោក។
ទំនាក់ទំនងពិសេសនេះមិនបញ្ចប់ត្រឹមសេដ្ឋកិច្ចហិរញ្ញវត្ថុទេ វិស័យកសិកម្ម ថាមពល
នុយក្លេអ៊ែរ បរិស្ថានសុទ្ធសឹងជាដណ្តើមថ្មីសម្រាប់ពេលអនាគតទាំងអស់។ បារាំង-ជប៉ុន បានថែមទាំងលើកទឹកចិត្តឱ្យក្រុមហ៊ុនរបស់ប្រទេសទាំងពីរអភិវឌ្ឍន៍ភាពជាដៃគូ ដើម្បីអនុគ្រោះទីផ្សារជាតិរៀងខ្លួនៗ។ ភាពល្អូនល្អើនមានកាន់តែច្រើន ថ្មីៗនេះជនជាតិបារាំងម្នាក់បានក្លាយជាអគ្គនាយកក្រុមហ៊ុនផលិតឱសថថ្នាក់អន្តរជាតិដ៏ធំរបស់ជប៉ុន។ តើនេះអាចចាត់ទុកថាជាចំណាយឥទ្ធិពលនៃការចាប់ផ្តើមភាពជាដៃគូយុទ្ធសាស្ត្រឬ ?!
សន្តិសុខ ៖ ជប៉ុនគាំទ្របារាំង បារាំងលើកទឹកចិត្តជប៉ុន ប្រទេសទាំងពីរផ្តល់តម្លៃដូចគ្នាដល់សន្តិនិយម គាំទ្រតម្លៃនៃសេរីភាព ប្រជាធិបតេយ្យ សិទ្ធិមនុស្ស និងអធិបតេយភាពជាតិ។ តម្លៃនៃសន្តិភាពដែលបារាំងនិងជប៉ុនចង់រួមចំណែករួមគ្នា ការពារសន្តិភាព សន្តិសុខអន្តរជាតិ នៅទូទាំងពិភពលោក ដោយត្រូវ ថាចាត់ទុកគ្នាជាដៃគូផ្តាច់មុខគាំទ្រ គ្នាទៅវិញទៅមកនៅក្នុងស្ថាប័នអន្តរជាតិនានា ឬនៅលើឆាកអន្តរជាតិ។
បារាំងនិងជប៉ុន បានគូសវាសគម្រោងចង្អុលផ្លូវ កំណត់លម្អិតនិងជាក់ស្តែង ទៅតាមករណីមួយ សម្រាប់សហប្រតិបត្តិការ ៥ឆ្នាំ ខាងមុខ មុន ក្នុងក្របខ័ណ្ឌជាដៃគូយុទ្ធសាស្ត្រពិសេស។
បារាំងមិនមែន គ្រូ
ការគាំទ្ររបស់អន្តរជាតិ ដែលមានប្រយោជន៍ខ្លាំងណាស់សម្រាប់ប្រឈមនឹងគូប្រជែងចិន។ ប៉ុន្តែជប៉ុនខ្លួនឯងក៏ចង់មានមុខមានមាត់ បញ្ចេញលើកឆាកអន្តរជាតិ ប្រលូកក្នុងវិស័យយោធាដែរ បើទោះបីជាច្បាប់រដ្ឋធម្មនុញ្ញប្រទេសប្រកាន់យកសន្តិនិយមយ៉ាងណាក៏ដោយ។ ជំនួបពិភាក្សា នៅព្រឹកថ្ងៃព្រហស្បតិ៍នេះ ត្រូវចំណាយមួយភាគធំទៅកិច្ចសហប្រតិបត្តិការដោះស្រាយវិបត្តិអន្តរជាតិ មានជាអាទិ៍វិបត្តិនៅទ្វីបអាហ្វ្រិក។ យើងដឹងហើយថា បារាំងដើរតួនាទីជួរមុខ ក្នុងសំណុំរឿងប្រទេសម៉ាលី ឯមិត្តជប៉ុនក៏បានសន្យាជួយម៉ាលី បើគិតជាទឹកប្រាក់មានទំហំប្រមាណជា ៤៧៥លានអឺរ៉ូ តាមរូបភាពផ្សេងៗ។ ហើយជាពិសេសនោះ គឺជប៉ុនបានសម្តែងការគាំទ្រនយោបាយបារាំងក្នុងវិបត្តិនៅអាហ្វ្រិកកណ្តាលទៀត។ បារាំងក៏សង្ឃឹមលើមិត្តវិញ ថានឹងអាចមានជំនួយបន្ថែមផ្នែកហិរញ្ញវត្ថុផង។
ដូច្នេះដើម្បីជាការតបស្នងជប៉ុនវិញ តើបារាំងធ្វើដូចម្តេច ? ជប៉ុនមានអារម្មណ៍ថាត្រូវគំរាមកំហែងវាតទឹកដី ជាក់ស្តែងជម្លោះដណ្តើមប្រជុំកោះសេនកាគូ។ ប៉ុន្តែជំហរជាតិនិយមជ្រុលហួសហេតុរបស់នាយករដ្ឋមន្ត្រីជប៉ុន ស៊ីនហ្សូ អាបេ ដែលបានទៅគោរពវិញ្ញាណក្ខន្ធយោធានៅទីសក្ការៈយ៉ាស៊ូគូនី បារាំងគ្មានហេតុផលអ្វីត្រូវបញ្ចេញមតិយោបល់ ឬធ្វើគ្រូចេះណែនាំ ឬត្រូវប្រកាន់យកជំហរណាមួយ ដោយត្រូវគាំទ្រចិន ឬជប៉ុនទេ។ ទាំងចិន ទាំងជប៉ុនសុទ្ធតែដៃគូមិនអាចខ្វះបានរបស់បារាំង។ ហើយបារាំងពេលនេះកំពុងសំឡឹងឃើញប្រយោជន៍ថ្មីមួយទៀតពីជប៉ុន គឺក្នុងវិស័យយោធា។ ជប៉ុនកំពុងមានទស្សនវិស័យនយោបាយថ្មីលើវិស័យការពារជាតិ។ ចេតនាចង់កែប្រែរដ្ឋធម្មនុញ្ញសន្តិនិយមរបស់នាយករដ្ឋមន្ត្រី ដើម្បីពង្រឹងឯករាជភាពយោធាជប៉ុន នោះមានន័យថាជប៉ុនអាចនឹងត្រូវការទិញសព្វាវុធ ទិញសម្ភារៈបិរក្ខារយោធា ហើយបារាំងមានវត្ថុទាំងអស់នោះដាក់លក់។ ចង់មិនចង់បារាំងត្រូវប្រយ័ត្នប្រយែងបន្តិចហើយ !
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ