ក្រសួងការពារជាតិបារាំងនឹងពង្រឹងសន្តិសុខទល់នឹងការវាយប្រហារតាមអ៊ីនធ័រនែត
ករណីរុស្ស៊ីលូកដៃជ្រៀតជ្រែកចូលក្នុងការបោះឆ្នោតប្រធានាធិបតីអាមេរិក តាមរយៈការវាយប្រហារតាមអ៊ីនធ័រនែត កំពុងតែជាបញ្ហាដ៏សែនចម្រូងចម្រាសមួយនៅសហរដ្ឋអាមេរិក។ ក៏ប៉ុន្តែ ការគំរាមកំហែងតាមប្រព័ន្ធអ៊ីនធ័រនែតនេះមិនមែនកើតមានតែចំពោះសហរដ្ឋអាមេរិកមួយនោះទេ។ រដ្ឋមន្រ្តីក្រសួងការពារជាតិបារាំងបានឲ្យដឹងនៅថ្ងៃអាទិត្យនេះថា បារាំងក៏ជាគោលដៅនៃការវាយប្រហារតាមប្រព័ន្ធអ៊ីនធ័រនែតយ៉ាងច្រើនសន្ធឹកសន្ធាប់ផងដែរ ហើយថា បារាំងនឹងធ្វើការពង្រឹងរចនាសម្ព័ន្ធក្នុងការការពារទល់នឹងការវាយប្រហារតាមប្រព័ន្ធអ៊ីនធ័រនែត។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
បារាំងកំពុងតែប្រឈមមុខនឹងការគំរាមកំហែងដោយការវាយប្រហារតាមប្រព័ន្ធអ៊ីនធ័រនែត ទាំងទៅលើហេដ្ឋារចនាសម្ព័ន្ធស៊ីវិល រួមមានដូចជា ប្រព័ន្ធផ្គត់ផ្គង់ទឹកស្អាត អគ្គិសនី ទូរគមនាគមន៍ និងដឹកជញ្ជូន ក៏ដូចជា ទៅលើដំណើរការប្រជាធិបតេយ្យ និងទៅលើប្រព័ន្ធផ្សព្វផ្សាយ។ នេះគឺជាការអះអាងរបស់លោក ហ្សង់អ៊ីវ ឡឺឌ្រីយ៉ង់ រដ្ឋមន្រ្តីក្រសួងការពារជាតិបារាំង នៅក្នុងបទសម្ភាសន៍ជាមួយទស្សនាវដ្តីបារាំង (Journal du Dimanche) ចេញផ្សាយនៅថ្ងៃអាទិត្យនេះ។
បើតាមលោកឡឺឌ្រីយ៉ង់ ការវាយប្រហារតាមប្រព័ន្ធអ៊ីនធ័រនែតមកលើបារាំងបានកើនឡើងទ្វេដងជារៀងរាល់ឆ្នាំ ហើយ គ្រាន់តែក្រសួងការពារជាតិមួយត្រូវរងការវាយប្រហាររហូតដល់ទៅ ២ម៉ឺន៤ពាន់ដង កាលពីឆ្នាំ២០១៦កន្លងទៅ ក៏ប៉ុន្តែ ការវាយប្រហារនេះត្រូវបានទប់ស្កាត់ជាប់។ លោកក៏បានលើកឡើងផងដែរថា ការវាយប្រហារតាមប្រព័ន្ធអ៊ីនធ័រនែត ដើម្បីលូកដៃចូលជ្រៀតជ្រែកក្នុងការបោះឆ្នោត ដូចអ្វីដែលបានកើតឡើងនៅសហរដ្ឋអាមេរិក ក៏អាចកើតឡើងដែរ នៅបារាំង។
គួរបញ្ជាក់ថា បារាំងនឹងបោះឆ្នោតប្រធានាធិបតី នៅខែមេសា និងឧសភាខាងមុខ ហើយនៅក្នុងចំណោមបេក្ខជនប្រធានាធិបតី គេឃើញមាន បេក្ខជនមកពីគណបក្សស្តាំនិយម និងគណបក្សស្តាំនិយមជ្រុល សុទ្ធតែបានបង្ហាញពីជំហរដែលមានទំនោរទៅខាងរុស្ស៊ី ផ្ទុយស្រឡះពីគណបក្សឆ្វេងនិយមរបស់លោកហ្វ្រង់ស័រហូឡង់ ដែលប្រកាន់ជំហរតឹងរ៉ឹង ចាប់តាំងពីរុស្ស៊ីកាត់យកតំបន់គ្រីមេ ពីអ៊ុយក្រែន។
សម្រាប់លោករដ្ឋមន្រ្តីការពារជាតិបារាំង ការណ៍ដែលរដ្ឋមួយលូកដៃចូលជ្រៀតជ្រែកវាយប្រហារទៅលើមូលដ្ឋានគ្រឹះនៃប្រជាធិបតេយ្យរបស់រដ្ឋមួយទៀត គឺជារឿងដែលមិនអាចទទួលយកបាន ហើយលោកក៏បានព្រមានផងដែរថា ក្នុងករណីទទួលរងការវាយប្រហារតាមប្រព័ន្ធអ៊ីនធ័រនែត បារាំងនឹងធ្វើការតបទៅទៅវិញ ដោយប្រើទាំងការវាយប្រហារតាមប្រព័ន្ធអ៊ីនធ័រនែត និងអាវុធយុទ្ធភ័ណ្ឌធម្មតា។
ដើម្បីពង្រឹងសមត្ថភាពក្នុងវិស័យសន្តិសុខតាមប្រព័ន្ធអ៊ីនធ័រនែត ក្រសួងការពារជាតិបារាំងគ្រោងនឹងបង្កើតសេនាធិការពិសេសមួយ ដែលមានទាហានជំនាញខាងអ៊ីនធ័រនែតចំនួន ២៦០០នាក់ ហើយមានសមត្ថភាពទាំងខាងការពារ និងការវាយប្រហារតាមប្រព័ន្ធអ៊ីនធ័រនែត៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ