សមាសភាពរដ្ឋាភិបាលថ្មីរបស់បារាំងមានពាក់កណ្តាលមកពីសង្គមស៊ីវិល
កាលពីថ្ងៃពុធ លោកអេម៉ានុយអែល ម៉ាក្រុង ប្រធានាធិបតីបារាំងដែលទើបនឹងជាប់ឆ្នោត បានប្រកាសតែងតាំងរដ្ឋាភិបាលថ្មីរបស់លោក ហើយស្របទៅតាមការសន្យារបស់លោក កាលពីក្នុងអំឡុងយុទ្ធនាការឃោសនាបោះឆ្នោត រដ្ឋាភិបាលថ្មីនេះមានសមាសភាពចម្រុះលាយឡំគ្នា រវាងអ្នកនយោបាយ និងឥស្សរជនមកពីសង្គមស៊ីវិល ព្រមទាំងមានសមាសភាពស្មើគ្នា រវាងបុរស និងស្រ្តី។
ចុះផ្សាយនៅថ្ងៃ៖ កែប្រែថ្ងៃទី៖
ទេសរដ្ឋមន្រ្តី ៣រូប រដ្ឋមន្រ្តី ១៥រូប និងរដ្ឋលេខាធិការ ៤រូប... នេះគឺជាសមាសភាពរដ្ឋាភិបាលថ្មីរបស់បារាំង ក្រោមការដឹកនាំរបស់លោកប្រធានាធិបតី អេម៉ានុយអែល ម៉ាក្រុង។ គិតជាសរុប រដ្ឋាភិបាលថ្មីនេះ មានសមាជិក ២២រូប ដោយបែងចែកគ្នាស្មើត្រឹម រវាងបុរស និងស្រ្តី (១១រូបជាស្រ្តី និង១១រូបជាបុរស) ហើយក៏បែងចែកគ្នាយ៉ាងស្មើត្រឹមដែរ រវាងអ្នកនយោបាយ និងសង្គមស៊ីវិល (១១រូបជាអ្នកនយោបាយ និង១១រូបជាឥស្សរជនមកពីសង្គមស៊ីវិល)។
នៅក្នុងចំណោមឥស្សរជនមកពីសង្គមស៊ីវិល គេសង្កេតឃើញមានជាអាទិ៍ ប្រធានមូលនិធិការពារបរិស្ថានត្រូវបានតែងតាំងជារដ្ឋមន្រ្តីក្រសួងបរិស្ថាន, សាស្ត្រាចារ្យវេជ្ជសាស្រ្តត្រូវបានតែងតាំងជារដ្ឋមន្រ្តីក្រសួងសុខាភិបាល, សកលវិទ្យាធិការ ត្រូវបានតែងតាំងជា រដ្ឋមន្រ្តីក្រសួងឧត្តមសិក្សានិងស្រាវជ្រាវ, អតីតប្រមុខដឹកនាំក្រុមហ៊ុន ត្រូវបានតែងតាំងជារដ្ឋមន្រ្តីក្រសួងការងារ, អ្នកនិពន្ធនិងជាប្រធានគ្រឹះស្ថានបោះពុម្ពផ្សាយសៀវភៅ ត្រូវបានតែងតាំងជារដ្ឋមន្រ្តីក្រសួងវប្បធម៌, កីឡាករជើងឯកអូឡាំពិចត្រូវបានតែងតាំងជារដ្ឋមន្រ្តីក្រសួងកីឡា ព្រមទាំងតំណាងសមាគម ឬអង្គការក្រៅរដ្ឋាភិបាលមួយចំនួនផ្សេងទៀត ត្រូវបានតែងតាំងជារដ្ឋលេខាធិការ ជាពិសេស ទទួលបន្ទុកខាងកិច្ចការនារី និងខាងជនពិកា។
នៅក្នុងចំណោមអ្នកនយោបាយវិញ ក៏គេសង្កេតឃើញមានសមាសភាពចម្រុះបក្សផងដែរ ដោយក្នុងនោះ មានរដ្ឋមន្រ្តីចំនួន ២រូប មកពីគណបក្សស្តាំនិយម ដែលជាបក្សប្រឆាំង។ ក្នុងចំណោមរដ្ឋមន្រ្តីមកពីបក្សស្តាំនិយមទាំងពីររូប មាន១រូប កាន់ក្រសួងដ៏សំខាន់មួយ គឺក្រសួងសេដ្ឋកិច្ច។
ការតែងតាំងរដ្ឋមន្រ្តីមកពីបក្សប្រឆាំងទាំងពីររូប បូករួមជាមួយនឹងនាយករដ្ឋមន្រ្តីផ្ទាល់ ដែលមកពីគណបក្សប្រឆាំងដូចគ្នា គឺជាយុទ្ធសាស្រ្តដ៏សំខាន់មួយរបស់លោកអេម៉ានុយអែល ម៉ាក្រុង ដើម្បីស្វះស្វែងរកសំឡេងភាគច្រើនក្នុងសភា នៅក្នុងការបោះឆ្នោតសភា ដែលនឹងប្រព្រឹត្តទៅ នៅពាក់កណ្តាលខែមិថុនាខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ