សារធាតុល្អិតឆ្មារបំពុលបរិយាកាសប្រទេសបារាំង ឡើងដល់កម្រិតកំពូល
នៅប្រទេសបារាំង ថ្ងៃសុក្រនេះ កម្រិតសារធាតុល្អិតឆ្មារ ដែលបំពុលបរិយាកាស ប៉ុន្មានថ្ងៃមកនេះ បានឡើងដល់បរិមាណកំពូល ហួសពីកម្រិតធម្មតា នៅតាមខេត្តជាង៣០ តំរូវអោយអាជ្ញាធរបារាំងចាត់វិធានការអោយប្រជាជននៅតាមទីក្រុងធំៗជាច្រើន មិនបាច់ចំណាយលុយក្នុងការជិះរថភ្លើង រឺរថយន្តក្រុង រយៈពេល៣ថ្ងៃចុងសប្តាហ៍នេះ។ គណបក្សការពារបរិស្ថានបារាំងបានស្វាគមន៍វិធានការរដ្ឋាភិបាល ប៉ុន្តែបានរិះគន់ថា រដ្ឋាភិបាលយឺតយ៉ាវក្នុងការចាត់វិធានការទប់ទល់បញ្ហាបំពុលបរិស្ថាននេះ។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៤៣
ចាប់ពីថ្ងៃសុក្រនេះ រហូតដល់ថ្ងៃអាទិត្យ ប្រជាជនបារាំងនៅតាមក្រុងធំៗ ជាច្រើននៅទូទាំងប្រទេស ពិសេសអ្នកនៅក្រុងប៉ារីស និងជាយក្រុងប៉ារីស មិនចាំបាច់ចំណាយប្រាក់កាសទិញសំបុត្រជិះរថយន្ត រឺរទេះភ្លើង នោះទេ។ នេះជាវិធានាការរបស់រដ្ឋាភិបាលបារាំង ទប់ទល់នឹងការបំពុលបរិយាកាសបង្កឡើងដោយសារធាតុល្អិតឆ្មារ ក្នុងរយៈពេលប៉ុន្មានថ្ងៃមកនេះ។
ប៉ុន្មានថ្ងៃមកនេះ ប្រទេសបារាំងបានរងការវាយប្រហារដោយសារធាតុល្អិតឆ្មារ ឈ្មោះថា PM១០ ជាសារធាតុល្អិតឆ្មារ បង្កឡើងដោយរថយន្តប្រើប្រេងឌីយេស៊ែល ម៉ាស៊ីនកំដៅប្រើក្នុងរដូវរងារ រឺក៏សកម្មភាពឧស្សាហកម្មផ្សេងៗ។ ប៉ុន្មានថ្ងៃនេះ លក្ខខណ្ឌសម្ពាធបរិយាកាស អាកាសធាតុត្រជាក់ពេលយប់ និងក្តៅនៅពេលថ្ងៃ បានកើតឡើងបន្តបន្ទាប់គ្នា ធ្វើអោយសារធាតុល្អិតឆ្មារទាំងនេះនៅតែបន្តវត្តមានក្នុងបរិយាកាស។ នៅតាមតំបន់ជាច្រើននៅភាគខាងជើង និងតំបន់Rhône-Alpes ស្ថិតនៅភាគអាគ្នេយ៍ សារធាតុល្អិតឆ្មារបានឡើងដល់៨០មីក្រូក្រាម ក្នុងមួយម៉ែត្រគូប គឺខ្ពស់ហួសពីកម្រិតកំណត់ដែលមានត្រឹម ៥០មីក្រូក្រាម ក្នុងមួយម៉ែត្រគូបទៅទៀត។ សារធាតុល្អិតឆ្មារនេះ ប៉ះពាល់សុខភាពមនុស្សយើង អាចបង្កជាជំងឺហឺត ជំងឺផ្លូវដង្ហើមផ្សេងៗ។ ប្រសិនបើវាជ្រាបចូលក្នុងផ្នែកផ្សេងៗនៃផ្លូវដង្ហើម និងឈាម វាអាចបង្កជំងឺមហារីកបាន។
ស្ថានភាពបរិយាកាសបារាំងនឹងចាប់ផ្តើមប្រសើរឡើងវិញ នៅចុងសប្តាហ៍នេះហើយ។ ប្រឈមនឹងការកើនឡើងនៃសារធាតុល្អិតឆ្មារបំពុលបរិយាកាសនៅពេលនេះ ក្រៅពីអនុញ្ញាតអោយប្រជាជនបានជិះរថយន្ត រឺរថភ្លើងដោយឥតបង់ថ្លៃ ក្រសួងការពារបរិស្ថានបារាំងក៏បានចាត់វិធានការដូចជា កាត់បន្ថយសកម្មភាពរោងចក្រ ហាមឃាត់មិនអោយដុតអុសធ្យូងបង្កជាផ្សែងភ្លើង រឺក៏កំណត់កម្រិតល្បឿនរថយន្តជាដើម។ អាជ្ញាធរផ្តល់ដំបូន្មាន ប្រជាជន ពិសេសមនុស្សចាស់ និងអ្នកមានបញ្ហាដង្ហើម អោយចៀសវាងធ្វើសកម្មភាពកីឡា នៅទីវាល៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ