បារាំងចាប់ផ្តើមបោះឆ្នោតប្រធានាធិបតីក្រោមភាពតានតឹងផ្នែកសន្តិសុខ
នៅថ្ងៃអាទិត្យ ទី២៣មេសានេះ ប្រជាពលរដ្ឋបារាំងចាប់ផ្តើមបោះឆ្នោត ដើម្បីជ្រើសរើសប្រធានាធិបតីថ្មី ជំនួសលោកហ្វ្រង់ស័រ ហូឡង់ ដែលផុតអាណត្តិ។ ការបោះឆ្នោតជុំទីមួយនៅថ្ងៃនេះត្រូវប្រព្រឹត្តទៅ នៅក្នុងភាពតានតឹងខាងផ្នែកសន្តិសុខ ដោយសារតែមានការគំរាមកំហែងភេរវកម្ម។ ចំណែកឯលទ្ធផលបោះឆ្នោតទៅជាយ៉ាងណាក៏គេពិបាកនឹងស្មានដឹង ដោយសារតែបេក្ខជនមានសន្ទុះគាំទ្រប្រកៀកប្រកិតគ្នាខ្លាំង ជាពិសេស ក្នុងចំណោមបេក្ខជន៤រូប ដែលមានសំឡេងនាំមុខគេ មាន ២រូបជាអ្នកមាននយោបាយប្រឆាំងនឹងសហភាពអឺរ៉ុប។
ចុះផ្សាយនៅថ្ងៃ៖ កែប្រែថ្ងៃទី៖
៣ថ្ងៃក្រោយភេរវកម្មនៅមហាវិថីស្ហង់ស៍អេលីហ្សេ ក្រុងប៉ារីស ដែលបណ្តាលឲ្យប៉ូលិសម្នាក់ត្រូវស្លាប់ ហើយដែលមានក្រុមជីហាតរដ្ឋអ៊ីស្លាមចេញមុខប្រកាសទទួលខុសត្រូវ ការបោះឆ្នោតប្រធានាធិបតីបារាំងជុំទីមួយ នៅថ្ងៃអាទិត្យនេះ ត្រូវប្រព្រឹត្តទៅក្រោមវិធានការសន្តិសុខយ៉ាងតឹងរ៉ឹង។ កងកម្លាំងប៉ូលិស អាវុធហត្ថ និងទាហាន គិតជាសរុបចំនួន ៥ម៉ឺននាក់ ត្រូវបានដាក់ពង្រាយការពារសុវត្ថិភាពនៅទូទាំងប្រទេស។
បើនិយាយពីភាពប្រកួតប្រជែងវិញ គេសង្កេតឃើញថា នៅក្នុងចំណោមបេក្ខជនសរុបទាំង ១១នាក់ មានបេក្ខជន ៤នាក់ ដែលមានសន្ទុះគាំទ្រខ្លាំងជាងគេ តែក្នុងកម្រិតប្រហាក់ប្រហែលគ្នា។ ការស្ទាបស្ទង់មតិនៅមុនពេលបិទបញ្ចប់យុទ្ធនាការឃោសនាបោះឆ្នោត កាលពីថ្ងៃសុក្របង្ហាញថា លោកអេម៉ានុយអែល ម៉ាក្រុង អ្នកនយោបាយវ័យក្មេងដែលមាននិន្នាការនយោបាយកណ្តាលនិយម ជាអ្នកមានសំឡេងនាំមុខគេ។ បន្តកន្ទុយពីក្រោយ មានលោកស្រីម៉ារីន ឡឺប៉ែន មកពីគណបក្សស្តាំនិយមជ្រុល, លោកហ្វ្រង់ស័រ ហ្វីយ៉ុង អតីតនាយករដ្ឋមន្រ្តី មកពីគណបក្សស្តាំនិយម និងលោកហ្សង់លុច មេឡង់ស្ហុង មកពីគណបក្សឆ្វេងនិយមជ្រុល។
យោងតាមការស្ទាបស្ទង់មតិ បេក្ខជនទាំង៤រូបនេះមានសំឡេងយ៉ាងប្រកៀកប្រកិតគ្នាបំផុត (ក្នុងចន្លោះពី ១% ទៅ ៥% តែប៉ុណ្ណោះ)។ លើសពីនេះទៅទៀត ចំនួនអ្នកបោះឆ្នោតដែលមកទល់នឹងថ្ងៃសុក្រ នៅតែអះអាងថាខ្លួននៅមិនទាន់សម្រេចចិត្តច្បាស់លាស់ជ្រើសរើសបេក្ខជនណាមួយនៅឡើយនោះ ក៏មានចំនួនយ៉ាងច្រើន រហូតដល់ទៅជិត ៣០%។ ហេតុដូច្នេះហើយបានជាមកដល់ថ្ងៃបោះឆ្នោតជុំទីមួយនេះទៅហើយ គេនៅតែពិបាកស្មានបានអំពីលទ្ធផលនៃការបោះឆ្នោត។
គួរបញ្ជាក់ថា ការបោះឆ្នោតជុំទីមួយនេះនឹងត្រូវចម្រាញ់យកបេក្ខជនតែ២រូបប៉ុណ្ណោះ ដើម្បីទៅប្រកួតប្រជែងគ្នានៅជុំទីពីរ ដែលនឹងប្រព្រឹត្តទៅនៅថ្ងៃអាទិត្យ ទី៧ឧសភាខាងមុខ។ លើកលែងតែមានបេក្ខជនណាមួយទទួលបានសំឡេងឆ្នោតច្រើនលើសលុបរហូតដល់លើស ៥០% ហើយត្រូវជាប់ឆ្នោតជាប្រធានាធិបតីដោយមិនចាំបាច់ឆ្លងកាត់ជុំទី២ (ជារឿងដែលមិនធ្លាប់មានក្នុងប្រវត្តិនយោបាយបារាំងចាប់តាំងពីក្រោយសង្រ្គាមលោកលើកទី២)។
សេណារីយ៉ូដ៏អាក្រក់មួយសម្រាប់សហភាពអឺរ៉ុបអាចកើតមានឡើង នៅពេលចេញលទ្ធផលបោះឆ្នោតជុំទីមួយ នៅយប់ថ្ងៃអាទិត្យនេះ គឺលោកស្រីម៉ារីន ឡឺប៉ែន និងលោកហ្សង់លុច មេឡង់ស្ហុង បានទទួលសំឡេងឆ្នោតលើសគេ ហើយត្រូវឈានទៅប្រកួតប្រជែងនៅជុំទីពីរ។ បេក្ខជនទាំង២រូបនេះសុទ្ធសឹងជាអ្នកមាននយោបាយប្រឆាំងសហភាពអឺរ៉ុប។ លោកស្រីម៉ារីន ឡឺប៉ែន ថែមទាំងចង់រៀបចំបោះឆ្នោតប្រជាមតិឲ្យបារាំងចេញពីសហភាពអឺរ៉ុបដូចអង់គ្លេសថែមទៀតផង។
ប្រសិនបើសេណារីយ៉ូនេះពិតជាកើតមានឡើងមែន មិនថាលទ្ធផលជុំទីពីរនៅថ្ងៃអាទិត្យ ទី៧ឧសភាខាងមុខ ចេញជាយ៉ាងណានោះទេ តែបារាំង ដែលជាប្រទេសដ៏សំខាន់បំផុតមួយក្នុងសហភាពអឺរ៉ុប (រួមជាមួយនឹងអាល្លឺម៉ង់) នឹងត្រូវមានប្រធានាធិបតី ដែលមាននយោបាយប្រឆាំងសហភាពអឺរ៉ុប។
ជាទូទៅ លទ្ធផលបណ្តោះអាសន្ននៃការបោះឆ្នោតជុំទីមួយនឹងត្រូវគេដឹង នៅម៉ោង ៨យប់។ ក៏ប៉ុន្តែ ឆ្នាំនេះការិយាល័យបោះឆ្នោតត្រូវបិទទ្វារយឺតយ៉ាងមុនមួយម៉ោង ដោយការិយាល័យបោះឆ្នោតនៅតាមក្រុងធំៗត្រូវបើកទ្វាររហូតដល់ម៉ោង ៨យប់ ហើយសំឡេងបេក្ខជនក៏ប្រកៀកប្រកិតគ្នាខ្លាំងទៅទៀត។ ដូច្នេះ នៅម៉ោង ៨យប់ គេអាចនឹងមិនទាន់ដឹងបានភ្លាមៗនូវឈ្មោះបេក្ខជនទាំងពីររូបដែលត្រូវជាប់ទៅជុំទីពីរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ