ភេរវកម្មនៅមហាវិថីស្ហង់ស៍អេលីហ្សេក្រុងប៉ារីស
ទីក្រុងប៉ារីសត្រូវទទួលរងការវាយប្រហារភេរវកម្មសាជាថ្មី កាលពីយប់ថ្ងៃព្រហស្បតិ៍ម្សិលមិញ។ ភេរវជន ដែលក្រុមជីហាតរដ្ឋអ៊ីស្លាមបានប្រកាសអះអាងថាជាកូនចៅរបស់ខ្លួន បានបើកការបាញ់ប្រហារ នៅលើដងវិថីដ៏ល្បីល្បាញក្នុងក្រុងប៉ារីស គឺមហាវិថីស្ហង់ស៍អេលីហ្សេ។ ការបាញ់ប្រហារនេះបានបណ្តាលឲ្យស្លាប់ប៉ូលិសម្នាក់ និងមនុស្ស ៣នាក់ផ្សេងទៀតត្រូវរងរបួស។ ចំណែកឯភេរវជនវិញក៏ត្រូវប៉ូលិសបាញ់ស្លាប់ក្នុងពេលនោះដែរ។
ចុះផ្សាយនៅថ្ងៃ៖ កែប្រែថ្ងៃទី៖
ហេតុការណ៍បានកើតឡើងនៅម៉ោង ៨ និង៥០នាទី (ត្រូវនឹងម៉ោង ១និង៥០នាទីរំលងអធ្រាតចូលថ្ងៃសុក្រ ម៉ោងនៅកម្ពុជា)។ ប្រភពពីមន្រ្តីប៉ូលិសបានប្រាប់ទីភ្នាក់ងារព័ត៌មានអាអែហ្វប៉េថា ខ្មាន់កាំភ្លើងប្រដាប់ដោយកាំភ្លើងវែងស្វ័យប្រវត្តិ បានធ្វើដំណើរតាមរថយន្ត មកឈប់លើមហាវិថីស្ហង់សេលីហ្សេ រួចហើយចុះពីឡាន ក៏បានបើកការបាញ់ប្រហារភ្លាមៗទៅលើប៉ូលិស ដែលកំពុងឈរជើងល្បាត នៅត្រង់ចំណុចមុខហាង Mark & Spencer ។
ការបាញ់ប្រហារនេះបានបណ្តាលឲ្យប៉ូលិសម្នាក់ត្រូវស្លាប់ និង ២នាក់ផ្សេងទៀតរងរបួស ក្នុងនោះមានម្នាក់របួសធ្ងន់ធ្ងរ។ អ្នកដំណើរម្នាក់ ដែលជាពលរដ្ឋបរទេស ហើយដែលកំពុងស្ថិតនៅកន្លែងកើតហេតុ ក៏ត្រូវរងរបួសស្រាលផងដែរ។ ចំណែកឯខ្មាន់កាំភ្លើងខ្លួនឯងក៏ត្រូវស្លាប់ដែរ នៅក្នុងការបាញ់តដៃគ្នាជាមួយប៉ូលិស។
ខ្ញុំមិនបង្ហាញពីអត្តសញ្ញាណខ្មាន់កាំភ្លើងទេ ព្រោះការស៊ើបអង្កេតកំពុងដំណើរការ ដើម្បីស្វែងរកមើលថាតើខ្មាន់កាំភ្លើងនេះធ្វើសកម្មភាពតែម្នាក់ឯង ឬក៏មានគូកន ឬអ្នកសមគំនិតផ្សេងទៀត។
លោកហ្វ្រង់ស័រ ម៉ូឡាំង រដ្ឋអាជ្ញាទទួលបន្ទុកប្រឆាំងភេរវកម្ម
លោកហ្វ្រង់ស័រ ម៉ូឡាំង រដ្ឋអាជ្ញាទទួលបន្ទុកខាងប្រឆាំងភេរវកម្មបានឲ្យដឹងថា ប៉ូលិសកំណត់បានយ៉ាងច្បាស់លាស់នូវអត្តសញ្ញាណរបស់ខ្មាន់កាំភ្លើង ក៏ប៉ុន្តែ លោកបានបដិសេធមិនបង្ហាញជាសាធារណៈនូវអត្តសញ្ញាណនេះទេ ដោយលើកហេតុផលថា នៅពេលនេះ ការស៊ើបអង្កេតកំពុងដំណើរការ មានទាំងការឆែកឆេរលើទីតាំងមួយចំនួនផង ដើម្បីស្វែងរកមើលថាតើខ្មាន់កាំភ្លើងនេះធ្វើសកម្មភាពតែម្នាក់ឯង ឬក៏មានគូកន ឬអ្នកសមគំនិតផ្សេងទៀត។
គួរបញ្ជាក់ថា មហាវិថីស្ហង់ស៍អេលីហ្សេ ដែលត្រូវបានគេចាត់ទុកថាជាមហាវិថីដ៏ស្រស់ស្អាតបំផុតមួយនៅលើពិភពលោក គឺជាទីតាំងដែលជាទូទៅតែងតែមានមនុស្សដើរលេងអ៊ូរអរ ជាពិសេស គឺអ្នកទេសចរ។ សាក្សីដែលស្ថិតនៅកន្លែងកើតហេតុបានរៀបរាប់ប្រាប់វិទ្យុបារាំងអន្តរជាតិ អំពីភាពតក់ស្លុត ព្រមទាំងចលនារត់ពពាក់ពពូនរបស់ហ្វូងមនុស្សនៅពេលមានហេតុការណ៍បាញ់ប្រហារកាលពីយប់មិញ។
ពេលនោះខ្ញុំកំពុងស្ថិតក្នុងភោជនីយដ្ឋាន ហើយទើបនឹងឲ្យគេគិតលុយ រួចដើរចេញមកក្រៅ ក៏ស្រាប់តែឃើញហ្វូងមនុស្សនាំគ្នារត់ពពាក់ពពូនដោយភាពតក់ស្លុត ហើយខ្ញុំក៏រត់ជាមួយគេជាមួយឯង។
សាក្សីដែលមានវត្តមាននៅស្ហង់ស៍អេលីហ្សេ
តែប៉ុន្មានម៉ោងក្រោយការវាយប្រហារនេះ ក្រុមជីហាតរដ្ឋអ៊ីស្លាមបានប្រកាសចេញមុខទទួលខុសត្រូវ ដោយអះអាងថា ខ្មាន់កាំភ្លើងគឺជាសមាជិកក្រុមជីហាត។ ក៏ប៉ុន្តែ រហូតមកទល់នឹងពេលនេះ មន្ទិលសង្ស័យនៅតែកើតមានឡើង ដោយឈ្មោះខ្មាន់កាំភ្លើង ដែលលើកឡើង ក្នុងសេចក្តីថ្លែងការណ៍របស់ក្រុមជីហាតរដ្ឋអ៊ីស្លាមហាក់ដូចជាមិនស្របនឹងអត្តសញ្ញាណរបស់ខ្មាន់កាំភ្លើងដែលត្រូវប៉ូលិសបាញ់ស្លាប់នៅកន្លែងកើតហេតុ។
លោកហ្វ្រង់ស័រ ហូឡង់ ប្រធានាធិបតីបារាំងបានកោះប្រជុំបន្ទាន់មន្រ្តីទទួលបន្ទុកសន្តិសុខជាតិ នៅព្រឹកព្រលឹមថ្ងៃសុក្រនេះ ហើយនៅក្រោយកិច្ចប្រជុំនេះ លោកប្រធានាធិបតីបារាំងបានមានប្រសាសន័ថា សម្រាប់អាជ្ញាធរ ហេតុការណ៍បាញ់ប្រហារកាលពីយប់មិញនេះ គឺជាការវាយប្រហារភេរវកម្ម ហើយថា រដ្ឋាភិបាលកំពុងស្ថិតក្នុងការប្រុងប្រយ័ត្នខ្ពស់បំផុត នៅក្នុងការរក្សាសន្តិសុខនៅទូទាំងប្រទេស នៅក្នុងពេលដែលការបោះឆ្នោតប្រធានាធិបតីជុំទីមួយ នឹងត្រូវប្រព្រឹត្តទៅ នៅថ្ងៃអាទិត្យខាងមុខនេះ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ