អតីតប្រធានាធិបតីបារាំង នីកូឡា សាកូហ្ស៊ី ត្រូវតុលាការចោទប្រកាន់ពីបទពុករលួយ
ចុះផ្សាយនៅថ្ងៃ៖
ស្តាប់ - ០៥:២៤
ក្រោយពីត្រូវបានប៉ូលិសឃាត់ខ្លួន និងសួរចម្លើយអស់រយៈពេលជិត ១៦ម៉ោង កាលពីថ្ងៃអង្គារម្សិលមិញ លោកនីកូឡា សាកូហ្ស៊ី អតីតប្រធានាធិបតីបារាំង ត្រូវបានតុលាការសម្រេចចោទប្រកាន់ពីបទពុករលួយ, បទជំនួញឥទ្ធិពល (ការយកតំណែង ឬឥទ្ធិពលនៃឋានៈរបស់ខ្លួនទៅប្រើ ដើម្បីជាថ្នូរនឹងការទទួលលាភសក្ការៈអ្វីមួយពីអ្នកដទៃ) និងបទទទួលផលពីការរំលោភបំពានលើអាថ៌កំបាំងវិជ្ជាជីវៈ។ ខាងក្រោមនេះ គឺជាសំណួរ-ចម្លើយ ជុំវិញសំណុំរឿងលោកសាកូហ្ស៊ី។
សំណួរ-តើលោកនីកូឡា សាកូហ្ស៊ី ត្រូវជាប់ចោទជុំវិញអង្គហេតុអ្វី?
ការចោទប្រកាន់លើលោកនីកូឡា សាកូហ្ស៊ី នៅពេលនេះ កើតចេញពីការស៊ើបអង្កេតលើសំណុំរឿងផ្សេងមួយទៀត គឺការសង្ស័យពីរឿងលោកសាកូហ្ស៊ីទទួលលុយពីកាដាហ្វ៊ី អតីតមេដឹកនាំលីប៊ី ដើម្បីយកមកប្រើ នៅក្នុងយុទ្ធនាការឃោសនាបោះឆ្នោត កាលពីឆ្នាំ២០០៧។ នៅក្នុងការស៊ើបអង្កេតនេះ ចៅក្រមស៊ើបអង្កេតបានសម្រេចឲ្យប៉ូលិសលួចស្តាប់ការសន្ទនាតាមទូរស័ព្ទរបស់អ្នកដែលពាក់ព័ន្ធក្នុងសំណុំរឿងនេះទាំងអស់ ក្នុងនោះ ក៏មានទាំងលោកសាកូហ្ស៊ីផងដែរ។
នៅក្នុងការលួចស្តាប់ទូរស័ព្ទនេះ គេឮលោកសាកូហ្ស៊ីជជែកជាមួយមេធាវីរបស់លោក អំពីការទាក់ទងទៅរដ្ឋអាជ្ញាម្នាក់ នៅតុលាការកំពូលបារាំង ដើម្បីចង់បានព័ត៌មានសម្ងាត់ទាក់ទងនឹងសំណុំរឿង ដែលតុលាការកំពុងចាត់ការ ទាក់ទងនឹងលោកសាកូហ្ស៊ី។ ជាថ្នូរមកវិញ លោកសាកូហ្ស៊ីសន្យាថានឹងជួយអន្តរាគមន៍ ដើម្បីឲ្យរដ្ឋអាជ្ញានេះទទួលបានតំណែងដែលគាត់ចង់បាន។
ចេញពីការសន្ទនាតាមទូរស័ព្ទនេះហើយ ដែលតុលាការបើកការស៊ើបអង្កេតថ្មីមួយទៀត ដោយបានឃាត់ខ្លួនលោកសាកូហ្ស៊ី ព្រមទាំងអ្នកពាក់ព័ន្ធផ្សេងទៀត ដើម្បីសួរចម្លើយ កាលពីថ្ងៃអង្គារម្សិលមិញ។ ក្រោយពីបានសួរចម្លើយអស់រយៈពេលជិត ១៦ម៉ោង តុលាការក៏បានធ្វើការចោទប្រកាន់ជាផ្លូវការលើលោកសាកូហ្ស៊ី និងមេធាវី ព្រមទាំងរដ្ឋអាជ្ញាតុលាការកំពូល ដែលពាក់ព័ន្ធនឹងសំណុំរឿងនេះ។
សំណួរ-តើលោកសាកូហ្ស៊ីមិនមានអភ័យឯកសិទ្ធិ ដែលត្រូវរួចផុតពីការចោទប្រកាន់របស់តុលាការទេឬ?
តាមច្បាប់បារាំង ប្រធានាធិបតីមានអភ័យឯកសិទ្ធិតែនៅក្នុងពេលកាន់តំណែង ឬចំពោះសកម្មភាពដែលប្រព្រឹត្តនៅក្នុងពេលកំពុងកាន់តំណែងតែប៉ុណ្ណោះ។ នៅក្រោយពេលឈប់កាន់តំណែង អតីតប្រធានាធិបតីត្រូវក្លាយជាពលរដ្ឋធម្មតា ហើយមិនអាចលើកយកអភ័យឯកសិទ្ធិជាប្រមុខរដ្ឋមកការពារខ្លួន ចំពោះការចោទប្រកាន់ ដែលទាក់ទងនឹងអង្គហេតុ ដែលកើតឡើង នៅមុន និងក្រោយពេលកាន់តំណែងជាប្រធានាធិបតីបានទេ។
ដូច្នេះ នៅក្នុងសំណុំរឿងពុករលួយពេលនេះ លោកសាកូហ្ស៊ីមិនអាចទទួលបានការការពារពីអភ័យឯកសិទ្ធិប្រមុខរដ្ឋបានទេ ពីព្រោះថា អង្គហេតុបានកើតមានឡើង នៅក្រោយពេលដែលលោកឈប់ធ្វើជាប្រធានាធិបតីទៅហើយ។
សំណួរ-តើបទល្មើសដែលតុលាការធ្វើការចោទប្រកាន់ទៅលើលោកសាកូហ្ស៊ី នៅពេលនេះ អាចត្រូវមានទោសទណ្ឌកម្រិតណា?
ប្រសិនបើតុលាការរកឃើញថាមានទោសមែន លោកសាកូហ្ស៊ីអាចនឹងត្រូវប្រឈមមុខនឹងទោសជាប់ពន្ធនាគាររហូតដល់ទៅ ១០ឆ្នាំ និងពិន័យជាប្រាក់រហូតដល់ទៅ១៥ម៉ឺនអឺរ៉ូ។ បន្ថែមពីលើនេះទៀត តុលាការក៏អាចប្រកាសទោសបន្ថែមផងដែរ គឺការហាមមិនឲ្យកាន់តំណែងក្នុងមុខងារសាធារណៈ ឬឈរឈ្មោះបោះឆ្នោត នៅក្នុងរយៈពេលកំណត់ណាមួយ។
ក៏ប៉ុន្តែ បច្ចុប្បន្ននេះ លោកនីកូឡា សាកូហ្ស៊ី គ្រាន់តែត្រូវទទួលការចោទប្រកាន់ប៉ុណ្ណោះ មិនទាន់ឈានដល់ការជំនុំជម្រះនៅឡើយទេ។ តាមនីតិវិធីព្រហ្មទណ្ឌបារាំង (ក៏ដូចជានៅខ្មែរដែរ) ដំណាក់កាលចោទប្រកាន់ ដែលធ្វើឡើង នៅក្នុងករណីលោកនីកូឡា សាកូហ្ស៊ី នៅពេលនេះ គ្រាន់តែជាការចោទប្រកាន់ក្រោយការស៊ើបអង្កេតបឋមតែប៉ុណ្ណោះ។ ដំណាក់កាលបន្ទាប់ រដ្ឋអាជ្ញាត្រូវបញ្ជូនសំណុំរឿងលោកសាកូហ្ស៊ី ទៅឲ្យចៅក្រមស៊ើបអង្កេត ដែលជាអ្នកទទួលបន្ទុកស៊ើបអង្កេតស៊ីជម្រៅ។ ពេលបិទបញ្ចប់ការស៊ើបអង្កេតនេះ ទើបចៅក្រមស៊ើបអង្កេតចេញសេចក្តីសម្រេចមួយទៀតថា តើត្រូវបញ្ជូនលោកសាកូហ្ស៊ីទៅឲ្យចៅក្រមជំនុំជម្រះ ឬក៏ត្រូវលើកលែងការចោទប្រកាន់ ហើយបិទបញ្ចប់សំណុំរឿងនេះចោល។
ដូច្នេះ សរុបសេចក្តីមកវិញ ការណ៍ដែលតុលាការធ្វើការចោទប្រកាន់ជាផ្លូវការនៅពេលនេះ មិនមែនមានន័យថា លោកសាកូហ្ស៊ីប្រាកដជានឹងត្រូវតុលាការនាំខ្លួនយកទៅជំនុំជម្រះនោះទេ។
សំណួរ-តើកន្លងមក ធ្លាប់មានអតីតប្រធានាធិបតីបារាំងណា ដែលត្រូវបានតុលាការយកទៅកាត់ទោសដែរឬទេ?
លោក Jacques Chirac ធ្លាប់ត្រូវបានតុលាការយកទៅកាត់ទោស កាលពីឆ្នាំ២០១១ ជុំវិញអង្គហេតុ ដែលកើតឡើង តាំងពីពេលលោកនៅធ្វើជាអភិបាលក្រុងប៉ារីស ហើយមិនទាន់ជាប់ឆ្នោតជាប្រធានាធិបតី។ នៅពេលនោះ លោក Jacques Chirac ត្រូវបានតុលាការកាត់ទោសឲ្យជាប់ពន្ធនាគារ ២ឆ្នាំ ប៉ុន្តែត្រូវព្យួរទោស។
ដូច្នេះ ករណីលោកសាកូហ្ស៊ីមិនមែនជាលើកទីមួយទេ។ តាមពិតលោកសាកូហ្ស៊ីខ្លួនឯងផ្ទាល់ក៏ធ្លាប់ត្រូវបានតុលាការចោទប្រកាន់ពីបទល្មើសផ្សេងម្តងរួចមកហើយដែរ គឺសំណុំរឿងសង្ស័យពីការកេងចំណេញលើមហាសេដ្ឋីចំណាស់ម្នាក់របស់បារាំង ដែលជាម្ចាស់ក្រុមហ៊ុនលក់ផលិតផលសម្អាងកាយ L'Oréal។ ក៏ប៉ុន្តែ ក្រោយមកត្រូវបានតុលាការលើកលែងការចោទប្រកាន់ទៅវិញ។
អ្វីដែលជារឿងមិនធ្លាប់មាន នៅក្នុងប្រវត្តិរបបនយោបាយនៃសាធារណរដ្ឋបារាំងសម័យទំនើប គឺការឃាត់ខ្លួនលោកសាកូហ្ស៊ី ដើម្បីសួរចម្លើយរហូតដល់ទៅជិត ១៦ម៉ោង កាលពីម្សិលមិញ។ កន្លងមក ទាំងនៅក្នុងសំណុំរឿងលោក Jacques Chirac និងក្នុងសំណុំរឿងមុនៗរបស់លោកសាកូហ្ស៊ី ចៅក្រមបានត្រឹមតែអញ្ជើញអតីតប្រធានាធិបតី ដើម្បីយកទៅសាកសួរ ក៏ប៉ុន្តែ មិនដែលធ្វើការឃាត់ខ្លួន ដើម្បីសួរចម្លើយបែបនេះទេ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ