បារាំងរកឃើញវិធីដែលអាចឲ្យគេរកឃើញមេរោគអេបូឡារយៈពេល ១៥នាទី
ជាមួយនឹងការរកឃើញរបស់អ្នកស្រាវជ្រាវបារាំង គេអាចដឹងក្នុងរយៈពេល១៥នាទីថា អ្នកណាម្នាក់មានឆ្លងមេរោគអេបូឡា។ កាលពីថ្ងៃអង្គារ ទី ២១តុលា វិទ្យាស្ថានស្រាវជ្រាវវិទ្យាសាស្រ្តផ្នែកថាមពលអាតូមិក របស់បារាំងបានបង្ហាញថា គេបានស្រាវជ្រាវរកឃើញវិធីធ្វើតេស្តដែលអាចគេរកឃើញ បានលឿន មេរោគអេបូឡា។
ចុះផ្សាយនៅថ្ងៃ៖ កែប្រែថ្ងៃទី៖
ស្តាប់ - ០១:៥១
របៀបធ្វើតេស្តរកមេរោគអេបូឡា ដែលក្រុមស្រាវជ្រាវបារាំងរកឃើញ មានលក្ខណៈស្រដៀងគ្នានឹងការធ្វើតេស្ត ដើម្បីចង់ដឹងថា តើស្រី្តមានផ្ទៃពោះ ឬក៏គ្មាន។ តាមសេចក្តីប្រកាសព័ត៌មានរបស់ស្នងការថាមពលអាតូមិក ដែលជាវិទ្យាស្ថានជាតិស្រាវជ្រាវផ្នែកវិទ្យាសាស្រ្ត ការធ្វើតេស្តក្រោមឈ្មោះថា Ezyscreenនឹងអាចត្រូវគេប្រើបាននៅគ្រប់កន្លែង ដោយមិនចាំបាច់ត្រូវការឧបករណ៍វិទ្យាសាស្រ្ត ឬមន្ទីរពិសោធន៍។ ជារួម គេគ្រាន់តែត្រូវការតំណក់ឈាម ទឹកមូត្រ ឬលោហិតម្ពុ (plasma) ដើម្បីបន្តក់ទៅលើបន្ទះសនៃឧបករណ៍ធ្វើតេស្ត។ ១៥នាទីក្រោយ បើសិន បន្ទះប្រែពណ៌ នោះមានន័យថា លទ្ធផលវិជ្ជមាន គឺគេកំពុងផ្ទុកមេរោគអេបូឡា។
ការធ្វើតេស្តលឿន ដើម្បីរកមេរោគអេបូឡានឹងជួយឲ្យគេចំណេញពេល នៅក្នុងយុទ្ធនាការស្វែងរកអ្នកជម្ងឺមេរោគអេបូឡា នៅតាមតំបន់ជនបទ នៅអាហ្រ្វិកខាងលិច។ បច្ចុប្បន្ន គេត្រូវការពេល២ម៉ោង ដើម្បីធ្វើតេស្តរកមេរោគអេបូឡា របស់មនុស្សម្នាក់។ ការពិនិត្យវិនិច្ឆ័យរកមេរោគអេបូឡាទៀតសោត ត្រូវតែធ្វើនៅមន្ទីរពិសោធន៍។
យ៉ាងណាក៏ដោយ វិទ្យាស្ថានជាតិស្រាវជ្រាវ វិទ្យាសាស្រ្តផ្នែកថាមពលអាតូមិក បានបញ្ជាក់ហើយថា ការធ្វើតេស្តលឿននឹងមិនអាចជំនួសផ្តាច់មុខ ការធ្វើតេស្តបែបបុរាណទេ។ មានន័យថា ជនសង្ស័យឆ្លងមេរោគអេបូឡាម្នាក់ ត្រូវប្រឈមនឹងការធ្វើតេស្តបែបបុរាណ សាជាថ្មី ក្នុងករណីដែលតេស្តលឿន ផ្តល់លទ្ធផលអវិជ្ជមាន ឬគ្មានមេរោគអេបូឡានោះ។
តាមវិទ្យាស្ថានខាងលើដដែល នៅចុងខែតុលា គេនឹងបញ្ចេញគំរូតេស្តឲ្យប្រើប្រាស់សាកល្បង នៅតាមកន្លែងឆ្លងមេរោគអេបូឡាផ្ទាល់ ពោលគឺដើម្បីចង់ដឹងថា តើវាពិតជាមានប្រសិទ្ធិភាពដែរឬទេ។ រហូតមកដល់ពេលនេះ ក្រៅពីបារាំង មានជប៉ុន និងអាមេរិកដែលកំពុងស្រាវជ្រាវរកវិធីធ្វើតេស្តលឿនដើម្បីកំណត់រោគសញ្ញាអេបូឡា។ អ្នកវិទ្យាសាស្រ្តជប៉ុនបានរកឃើញតេស្តមួយដែលគេអាចរកឃើញមេរោគអេបូឡាក្នុងពេល៣០នាទី ចំណែកអាមេរិកវិញ ក៏កំពុងស្រាវជ្រាវរកវិធីធ្វើតេស្តដែលត្រូវការពេលតែ១០នាទី។
មេរោគអេបូឡាដែលរាតត្បាតខ្លាំងនៅប្រទេសលីបេរីយ៉ា ហ្គីណេ និងសៀរ៉ាឡេអូន បានសម្លាប់មនុស្សជាង ៤៥០០នាក់។ កាលពីល្ងាចថ្ងៃចន្ទ ក្រុមហ៊ុនជប៉ុន ហ្វីជីហ្វីមដែលរកឃើញថ្នាំ អាចព្យាបាលមេរោគអេបូឡា បានប្រកាសថា ក្រុមហ៊ុនមាន ថ្នាំ Avigan បម្រុងសម្រាប់អ្នកជម្ងឺ អេបូឡា២ម៉ឺននាក់។ អ្នកស្រាវជ្រាវជប៉ុនបានសាកល្បង ថ្នាំ Avigan ដើម្បីព្យាបាលយ៉ាងមានប្រសិទ្ធិភាពទៅលើសត្វកណ្តុរដែលមានឆ្លងមេរោគអេបូឡា។ នៅខែវិច្ឆិកាខាងមុខ គេនឹងសាកល្បងប្រើថ្នាំរបស់ជប៉ុន នៅក្នុងប្រទេសហ្គីណេ ដើម្បីចង់ដឹងប្រសិទ្ធិភាពរបស់វាទៅលើមនុស្សដែលឆ្លងមេរោគអេបូឡា៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ