តើពាណិជ្ជករលក់គ្រឿងសង្ហារឹមនឹងអាចក្លាយជាប្រធានាធិបតីឥណ្ឌូណេស៊ី?
ចុះផ្សាយនៅថ្ងៃ៖
ស្តាប់ - ០៦:៥១
ឥណ្ឌូណេស៊ីប្រទេសមានសេដ្ឋកិច្ចនាំមុខគេនៅអាស៊ីអាគ្នេយ៍បានរៀបចំការបោះឆ្នោតប្រធានាធិបតីនៅថ្ងៃពុធ ទី ៩កក្កដា។ ប្រជាជនឥណ្ឌូណេស៊ីប្រមាណ១៨៥លានត្រូវទៅបោះឆ្នោត ដើម្បីជ្រើសរើសប្រធានាធិបតីថ្មី បន្តពីលោកស៊ុយស៊ីឡូ បំបង យូដូយ៉ូណូ ដែលគ្រប់គ្រងឥណ្ឌូណេស៊ីពីរអាណត្តិ និងមិនអាចឈរឈ្មោះសម្រាប់អាណត្តិទីបី។ បេក្ខជនប្រធានាធិបតីទាំងពីរមានប្រវត្តិរូប និងបទពិសោធន៍ខុសគ្នាដាច់ស្រឡះ។ លោកហ្សូកូ វីដូដូ ជាពាណិជ្ជករ និងចៅហ្វាយក្រុង ហ្សាកាតា មិនដែលជាប់ឈ្មោះធ្វើនយោបាយពីមុនមក ចំណែកលោក ប្រាបូវូ ស៊ូបៀនតូជាអតីតមេទាហាន និងជាកូនប្រសាររបស់អតីតមេដឹកនាំផ្តាច់ការស៊ូហាតូ។
បេក្ខជនទាំងពីរសុទ្ធតែទទួលបានប្រជាប្រិយភាព គាំទ្រពីប្រជាជនឥណ្ឌូណេស៊ី។ បេក្ខជនទីមួយ គឺលោក ហ្សូកូ វីដូដូ ដែលមានរហស្សនាម ហ្សូកូវី មកពីគណបក្សប្រជាធិបតេយ្យឥណ្ឌូណេស៊ីនៃការប្រយុទ្ធ។ លោកហ្សូកូវីជាអតីត ពាណិជ្ជករ ខាងនាំចេញគ្រឿងសង្ហារឹម មកពីត្រកូលគ្រួសារសាមញ្ញ ដែលគ្មានប្រវត្តិធ្វើនយោបាយពីមុនមកទាល់តែសោះ។ មុននឹងប្រកាសឈរឈ្មោះជាបេក្ខជនប្រធានាធិបតី លោកហ្សូកូវី ធ្លាប់ជាប់ឆ្នោតជាចៅហ្វាយក្រុង ហ្សាកាតា នៅឆ្នាំ ២០១២ ប៉ុន្តែ មិនដែលចូលរួមនៅក្នុងសកម្មភាពនយោបាយរបស់បក្សណាទេ។
ប្រជាប្រិយភាពខ្ពស់របស់លោកហ្សូកូវី បានទាក់ទាញគណបក្សប្រជាធិបតេយ្យឥណ្ឌូណេស៊ី ដើម្បីការប្រយុទ្ធ របស់លោកស្រី មេហ្គាវ៉ាទី ឲ្យសហការ ជ្រើសរើសលោកហ្សូកូវី ឲ្យធ្វើជាបេក្ខជនប្រធានាធិបតី។ គេប្រហែលចាំលោកស្រី មេហ្គាវ៉ាទីដែលធ្លាប់កាន់តំណែងជាប្រធានាធិបតីឥណ្ឌូណេស៊ី ម្តង នៅឆ្នាំ ២០១០។ លោកស្រីម៉េហ្គាវ៉ាទេ ជាកូនស្រីច្បងរបស់លោកស៊ូកាណូ បិតាប្រជាធិបតេយ្យ ស្ថាបនិកប្រទេសឥណ្ឌូណេស៊ី។
ដោយសហការជាមួយគណបក្សដ៏ធំជាងគេនៅឥណ្ឌូណេស៊ី កូដប្រជាប្រិយភាពរបស់លោកហ្សូកូវីកាន់តែឡើងខ្ពស់។ លោកហ្សូកូវី ត្រូវគេមើលឃើញ ជាបេក្ខជនប្រធានាធិបតីដ៏សក្តិសម ព្រោះលោកជាមនុស្សស្អាតស្អំ គ្មានប្រឡាក់ប្រឡូសនឹងស្ថាប័ននយោបាយរបស់រដ្ឋាភិបាលបច្ចុប្បន្ន ដែលកំពុងស្អុយឈ្មោះដោយសារអំពើពុករលួយ ស៊ីរូងផ្ទៃក្នុង។
ការស្ទង់មតិមុនការបោះឆ្នោតបានបង្ហាញថា លោកហ្សូកូវីទទួលបានការគំាទ្រច្រើនពីប្រជាជនឥណ្ឌូណេស៊ីវ័យក្មេង ប្រជាជនក្រីក្រ ទាំងនៅក្នុងក្រុង និងនៅជនបទ។
លោក ប្រាបូវូ ស៊ូបៀនតូ មកពីគណបក្សហ្សឺរីនដា។ ខុសពីលោកហ្សូកូវី ដែលគ្មានប្រវត្តិធ្វើនយោបាយ លោក ប្រាបូវូ ជាបេក្ខជនមកពីគ្រួសារអ្នកធ្វើនយោបាយ។ លោកជាកូនប្រសាររបស់ លោកស៊ូហាតូ អតីតមេដឹកនាំផ្តាច់ការដែលទើបដួលរលំ នៅឥណ្ឌូណេស៊ី នៅឆ្នាំ ១៩៩៨។ នៅសម័យគ្រប់គ្រងរបស់ស៊ូហាតូ លោក ប្រាបូវូធ្លាប់បញ្ជាទ័ព និងជាប់ឈ្មោះជាមេដឹកនាំការបង្រ្កាបទៅលើចលនានិស្សិតទាមទារប្រជាធិបតេយ្យ នៅឆ្នាំ ១៩៩៨។ នៅក្រោយហេតុការណ៍នោះ លោកត្រូវបានគេដកចេញពីតំណែងរហូត និងទើបតែលេចមុខជាថ្មីដើម្បីប្រជែងយកតំណែងប្រធានាធិបតីនៅពេលនេះ។ លោក ប្រាបូវូបានទទួលការគាំទ្រពីគណបក្សកាន់អំណាចបច្ចុប្បន្នរបស់លោកប្រធានាធិបតីអស់អាណត្តិ លោក ស៊ុយស៊ីឡូ បំបង យូដូយ៉ូណូ។ ចំណុចមួយដែលធ្វើឲ្យគេបារម្ភគឺនយោបាយសេដ្ឋកិច្ចជាតិនិយមរបស់បេក្ខជននយោបាយ ជាពិសេស លោកប្រាវូបូ ដែលបានផ្តោតខ្លាំងទៅលើនយោបាយការពារផលិតផលក្នុងស្រុក។ លោកប្រាវូបូបានសន្យាដកការវិនិយោគ ទៅលើប្រេង និងឧស្ម័នឥណ្ឌូនេស៊ី ពីក្រុមហ៊ុនបរទេស។ លោកសន្យាផងដែរនឹងកាត់បន្ថយការហូរចេញមូលធនទុន ដែលរហូតមកដល់ពេលនេះធ្វើឲ្យឥណ្ឌូណេស៊ីខាតបង់ជាង ៨៤ពាន់លានដុល្លារក្នុងមួយឆ្នាំៗ។
បេក្ខជនទាំងពីរនិយាយតែពីរឿងជំរុញកំណើនសេដ្ឋកិច្ច ប៉ុន្តែ មិនបានបង្ហាញលំអិត ពីនយោបាយបង្កើតការងារធ្វើ ឬប្រយុទ្ធប្រឆាំងអំពើពុករលួយ។ អំពើពុករលួយដែលជាកង្វល់របស់ប្រជាជន ព្រោះវាជាមេរោគមហារីកដែលពន្យឺតកំណើនសេដ្ឋកិច្ច និងបង្កើនភាពក្រីក្រនៅឥណ្ឌូណេស៊ី។
សំឡេងឆ្នោតប្រផិតប្រផើយគ្នា
តាំងពីយុទ្ធនាការឃោសនាបោះឆ្នោត គេឃើញថា បេក្ខជនទាំងពីរទទួលបានសំឡេងគាំទ្រប្រផិតប្រផើយគ្នា។ បេក្ខជនទាំងពីរមានកម្មវិធីនយោបាយស្រដៀងគ្នា សម្រាប់ប្រជាជនឥណ្ដូណេស៊ី តាំងពីការអភិវឌ្ឍសេដ្ឋកិច្ច បង្កើតការងារធ្វើ និងប្រយុទ្ធប្រឆាំងនឹងអំពើពុករលួយ។ ដូច្នេះ គេមានតែពិនិត្យមើលលើបុគ្គលិកលក្ខណៈរបស់បេក្ខជនទាំងពីរ ដើម្បីសម្រេចចិត្តក្នុងពេលបោះឆ្នោត។
លោកហ្សូកូវី ឬអូបាម៉ាឥណ្ឌូណេស៊ី ត្រូវបានគណបក្សរបស់លោក និងប្រព័ន្ធផ្សព្វផ្សាយក្នុងស្រុកសរសេរថា ជាមេដឹកនាំសាមញ្ញ ព្រោះនៅក្នុងពេលកាន់តំណែងជាចៅហ្វាយក្រុង លោកធ្លាប់ដាក់ខ្លួនចុះជាប់ប្រជាជន និងដោះស្រាយគ្រប់បញ្ហាដែលប្រជាជនជួប តាំងពីសុខភាព អប់រំ និងការជាប់គាំងផ្នែករដ្ឋបាលជាដើម។ ការដោះស្រាយរាល់បញ្ហារបស់ប្រជាជន ធ្វើឲ្យប្រជាជនសាមញ្ញជាច្រើន យល់ថាលោកហ្សូកូវី នឹងអាចប្រយុទ្ធប្រឆាំងនឹងអំពើពុករលួយ យ៉ាងមានប្រសិទ្ធិភាពជាងរដ្ឋាភិបាលមុន។
ប៉ុន្តែ គណបក្សប្រឆាំងវិញបានវាយប្រហារទៅលើលោកហ្សូកូវី ដោយថា លោកគ្មានបទពិសោធន៍ក្នុងការដឹកនាំដោះស្រាយបញ្ហាជាតិ ឬអន្តរជាតិ។ មួយវិញទៀតគេថា លោកហ្សូកូវី ជាកូនចៅចិន ឬអ្នកកាន់សាសនាគ្រិស្ត។ ចំណុចនេះសំខាន់ណាស់ ព្រោះនៅឥណ្ឌូណេស៊ី ដែលមានប្រជាជនជាង៩០ភាគរយ កាន់សាសនាអ៊ីស្លាម គេមិនចង់បានអ្នកដឹកនាំ ដែលមិនមែនជាជាតិឥណ្ឌូណេស៊ីសុទ្ធ ឬអ្នកដែលមិនកាន់សាសនាអ៊ីស្លាមនោះទេ។ លោកហ្សូកូវី ធ្លាប់បានបដិសេធថា មិនពិត ប៉ុន្តែ ចង់ ឬមិនចង់ ការចោទប្រកាន់ បានធ្វើឲ្យប៉ះពាល់ដល់ប្រជាប្រិយភាពមួយចំណែករបស់លោកហ្សូកូវីដែរ។
នៅឥណ្ឌូណេស៊ីប្រជាជនមកពីគ្រួសារអ្នកមាន បញ្ញាវន្ត គំាទ្របេក្ខជន លោក ប្រាបូវូ។ ប្រជាជនឥណ្ឌូណេស៊ីស្រមៃចង់បានមេដឹកនាំម៉ត់ចត់ និងរឹងមាំ ដូចជាលោកប្រាបូវូ ដែលធ្លាប់មានប្រវត្តិជាមេដឹកនាំ ទាហាន។ ប្រធានាធិបតីឥណ្ឌូណេស៊ីបច្ចុប្បន្នដែលត្រូវអស់អាណត្តិត្រូវបានគេសរសើរចំពោះនយោបាយរបស់លោកដើម្បីជំរុញកំណើនសេដ្ឋកិច្ចឥណ្ឌូណេស៊ី ប៉ុន្តែ គេក៏បានបន្ទោសលោកផងដែរ ថា ស្ពឹក អសកម្មមិនហ៊ានសម្រេចកិច្ចការធំដំ និង មិនអាចលុបបំបាត់ចោលអំពើពុករលួយដូចដែលលោកបានសន្យា។ លោកប្រាវូបូវិញ អាចជាប្រធានាធិបតីរឹងមាំដែលប្រជាជនឥណ្ឌូណេស៊ីចង់បាន ប៉ុន្តែ បញ្ហានៅត្រង់ថា បើអតីតមេបញ្ជាការទ័ព អាចឈ្នះឆ្នោត ឡើងគ្រប់គ្រងឥណ្ឌូណេស៊ី នោះក៏មិនខុសអី ពីឥណ្ឌូណេស៊ីអាចត្រលប់ទៅស្ថិតនៅក្រោមអំណាចគ្រប់គ្រងផ្តាច់ការដូច្នេះដែរ។ ប្រជាធិបតេយ្យក្មេងខ្ចីដែលឥណ្ឌូណេស៊ីទើបស្គាល់បាន១៦ឆ្នាំ នឹងអាចរលាយសាបសូន្យទៅវិញ បើសិនបេក្ខជន លោក ប្រាបូវូឈ្នះឆ្នោតប្រធានាធិបតី។
លោកប្រាវូបូ មានប្រវត្តិរូបដិតដាមដោយអំពើហិង្សា ការចាប់ជំរិត បង្រ្កាប ធ្វើទារុណកម្មក្រុមនិស្សិតដែលទាមទារលទ្ធិប្រជាធិបតេយ្យឆ្នាំ ១៩៩៨។ ដោយសារជាប់ជំពាក់នឹងរឿងរំលោភសិទ្ធិមនុស្ស លោកប្រាវូបូត្រូវបានសហរដ្ឋអាមេរិកហាមមិនឲ្យចូលក្នុងទឹកដីអាមេរិក។ ហ្សូកូវី ជាបេក្ខជនជាប់ឈ្មោះជាមនុស្សគ្មានបទពិសោធន៍ ជាប់សែស្រឡាយចិន និងកាន់សាសនាគ្រិស្ត ចំណែកបេក្ខជនម្នាក់ជាប់ឈ្មោះខាងរំលោភសិទ្ធិមនុស្ស។ តើបេក្ខជនណានឹងឈ្នះឆ្នោត។ ប្រជាជនឥណ្ឌូណេស៊ី ១៥ភាគរយដែលកំពុងរារែក មិនទាន់គាំទ្របេក្ខជនណាសោះនោះ ជាអ្នកសម្រេចជោគវាសនា នៅក្នុងការបោះឆ្នោតលើកនេះ។
នៅមួយម៉ោងក្រោយបិទការិយាល័យបោះឆ្នោត បេក្ខជនប្រជែងទាំងពីរអះអាងថាខ្លួនឈ្នះរៀងខ្លួន ព្រោះគេមើលទៅលើលទ្ធផលបណ្តោះអាសន្ន ដែលរាប់ភ្លាមៗ នៅក្រោយបិទទ្វារការិយាល័យ។ ជាញឹកញយលទ្ធផលអាចឲ្យគេជឿទុកចិត្តបានដែរ។ ចំណែក លទ្ធផលជាផ្លូវការនឹងត្រូវគេប្រកាសឲ្យដឹង នៅថ្ងៃទី ២០ ឬទី ២១កក្កដាខាងមុខ។ បេក្ខជនដែលនឹងឈ្នះឆ្នោត នឹងស្បថចូលកាន់តំណែង ប្រធានាធិបតីថ្មី នៅខែតុលាខាងមុខ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ