ប.ស.ស៖កម្មករ-ការនី៣៩ម៉ឺននាក់នឹងទទួលបានរបបធានារ៉ាប់រងសុខភាពនៅខែឧសភា
កម្មករ កម្មការនី ៣៩ម៉ឺននាក់ នៅក្នុងតំបន់ចំនួន ៣ រួមមានរាជធានីភ្នំពេញ ខេត្តកណ្តាល និងកំពង់ស្ពឺ នឹងទទួលបានរបបសន្តិសុខសង្គមផ្នែកថែទាំសុខភាព ឬអាចហៅបានថា ការធានារ៉ាប់រងសុខភាព ចាប់ពីថ្ងៃទី ១ខែឧសភា ឆ្នាំ២០១៦ខាងមុខនេះ។ ធានារ៉ាបរង ដែលតម្រូវឲ្យទាំងនិយោជក និងនិយោជិតបង់ប្រាក់ ៥០ភាគរយម្នាក់។ បេឡាជាតិរបបសន្តិសុខសង្គម ហៅកាត់ថាប.ស.ស បញ្ជាក់ថា នេះគឺជាផែនការដំបូងប៉ុណ្ណោះ ហើយផែនការបន្ទាប់គេនឹងពង្រីកសេវានេះ ឲ្យបានដល់កម្មករ-ការនីទាំងអស់ ក្នុងខេត្ត រាជធានីទាំង២៥ ទូទាំងប្រទេសកម្ពុជា។
ចុះផ្សាយនៅថ្ងៃ៖
ស្តាប់ - ០២:០៩
កម្មករ កម្មការនីខ្មែរ នឹងទទួលបាននូវការធានារ៉ាប់រងផ្នែកសុខភាព ចាប់ពីថ្ងៃទី ១ខែឧសភា ឆ្នាំ ២០១៦តទៅ ដោយពួកគេ គ្រាន់តែចំណាយប្រាក់តិចតួចបំផុត ដើម្បីទទួលបានការពិនិត្យសុខភាពពេលមានជំងឺនានា។ លើសនេះ និយោជក ក៏តម្រូវឲ្យចេញវិភាគទាន ៥០ភាគរយ សម្រាប់ផ្តល់នូវធានារ៉ាប់រងនេះ ដល់និយោជិតផងដែរ។ នេះបើតាមការឲ្យដឹងពីលោកជាវ ប៊ុនរិទ្ធ អ្នកនាំពាក្យបេឡាជាតិរបបសន្តិសុខសង្គម ហៅកាត់ថាប.ស.ស។
ក្នុងសិក្ខាសាលាស្តីពីដំណើរការអនុវត្តរបបសន្តិសុខសង្គមផ្នែកសុខភាព នាយកប.ស.ស បានលើកឡើងថា កម្មករ កម្មការិនី អាចចំណាយប្រាក់ប្រមាណតែ ២៥០រៀលក្នុងមួយថ្ងៃ ឬស្មើនឹង ៧៥០០រៀលក្នុងមួយខែ សម្រាប់បង់ចូលជាវិភាគទានប.ស.ស ដើម្បីទទួលបានធានារ៉ាប់រងថែទាំសុខភាព ២៤ម៉ោង លើ២៤ម៉ោង។
បើតាមលោកជាវ ប៊ុនរិទ្ធ ផែនការដំបូង អាចដំណើរការដល់កម្មករ កម្មការនី ប្រមាណ ៣៩ម៉ឺននាក់ ក្នុងតំបន់ ៣ រួមមានរាជធានីភ្នំពេញ ខេត្តកណ្តាល និងខេត្តកំពង់ស្ពឺ។ ហើយប.ស.ស នឹងចុះទៅផ្ទាល់ដល់តាមបណ្តារោងចក្រ សហគ្រាសនីមួយៗ ដើម្បីពន្យល់ពីសេវាកម្មនេះ។ យ៉ាងណាក៏ដោយ គម្រោងនេះ នឹងត្រូវអនុវត្តសម្រាប់តែរោងចក្រ ឬសហគ្រាសណា ដែលមានចុះបញ្ជីការ ស្ថិតនៅក្រោមច្បាប់ការងារត្រឹមត្រូវតែប៉ុណ្ណោះ។ បច្ចុប្បន្ន រោងចក្រ សហគ្រាសដែលបានចុះបញ្ជីការត្រឹមត្រូវ មានជាង៧០០០ និងមានកម្មករជាង ១លាននាក់។
ក្រោយផែនការ ៣តំបន់នេះ ប.ស.ស ក៏នឹងចាប់ផ្តើមពង្រីងម្តង ៥ខេត្តទៀត រហូតដល់បានពេញទូទាំង ២៥រាជធានីខេត្ត ក្នុងប្រទេសកម្ពុជា។ ប.ស.ស ជឿជាក់ថា ការធានារ៉ាប់រងនេះ នឹងអាចធ្វើឲ្យនិយោជក និងនិយោជិត ទទួលបានការគោរពលក្ខខណ្ឌការងារ ហើយផលិតភាព និងការបញ្ជាទិញនឹងកើនឡើង ព្រោះនិយោជិតមានសុខភាពល្អ។ ជាពិសេស គឺអាចទប់ស្កាត់ចំណាកស្រុកទៅធ្វើការនៅក្រៅប្រទេស ព្រោះថាប្រសិនបើនិយោជិតទទួលបានការថែទាំល្អ គេក៏គ្មានហេតុផល រត់ចោលកន្លែងដើមនោះដែរ។
សូមបញ្ជាក់ថា របបសន្តិសុខសង្គមផ្នែកថែទាំសុខភាព បានធ្វើឡើងដោយយោងតាមអនុក្រឹត្យលេខ ០១របស់រាជរដ្ឋាភិបាល ចុះថ្ងៃទី ០៦ខែមករា ឆ្នាំ ២០១៦។ របបនេះ ក៏លេចឡើងក្រោយពេលប.ស.ស បានបង្កើតរបបសន្តិសុខផ្នែកគ្រោះថ្នាក់ការងារ ដែលបានតម្រូវឲ្យនិយោជក បង់ថ្លៃវិភាគទានទាំងអស់ដល់ប.ស.ស ដើម្បីធានាសុវត្ថិភាពនិយោជិត ពេលមានហានិភ័យ ឬគ្រោះថ្នាក់ណាមួយកើតឡើង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ