កូដកម្មរបស់កម្មកររោងចក្រសាប្រ៊ីណាឈានចូលដល់ថ្ងៃទី ១០
ក្រុមកម្មកររោងចក្រសាប្រ៊ីណាប្រមាណជិត១០០០នាក់ នៅព្រឹកថ្ងៃចន្ទនេះបានបន្តប្រមូលផ្តុំគ្នា នៅមុខតុលាការខេត្តកំពង់ស្ពឺ ដើម្បីទាមទារឲ្យតុលាការធ្វើការដោះលែងថ្នាក់ដឹកនាំសហជីពរបស់ពួកគេ ៨នាក់ ដែលត្រូវបានតុលាការឃុំខ្លួនបណ្តោះអាសន្ន ក្នុងពន្ធនាគារខេត្ត ដោយចោទពីបទ បង្កឲ្យមានអំពើហិង្សា និងបំផ្លិចបំផ្លាញទ្រព្យសម្បតិ្តរោងចក្រ កាលពីថ្ងៃ៣ មិថុនាកន្លងទៅនេះ។ ទោះយ៉ាងណា មេធាវីការពារក្តីកម្មករដែលកំពុងជាប់ឃុំបណ្តោះអាសន្នបានថ្លែងបញ្ជាក់ថា ខ្លួននឹងធ្វើការប្តឹងឧទ្ធរណ៍ នៅថ្ងៃអង្គារទី ១១មិថុនា ២០១៣ ប្រសិនបើ តុលាការ នៅតែមិនដោះលែងតាមការស្នើសុំរបស់ខ្លួន។
ចុះផ្សាយនៅថ្ងៃ៖
ស្តាប់ - ០២:៤០
ឈានចូលមួយសប្តាហ៍ហើយ គិតត្រឹមថ្ងៃចន្ទ ទី ១០ មិថុនានេះ ដែលក្រុមកម្មករនៃរោងចក្រសាប្រ៊ីណា ប្រមាណជិត ១០០០នាក់បានបន្តធ្វើការទាមទារ នៅមុខតុលាការខេត្តកំពង់ស្ពឺ ដើម្បីសុំឲ្យតុលាការដោះលែងថ្នាក់ដឹកនាំសហជីពរបស់ពួកគេ ៨រូប ដែលត្រូវបានតុលាការឃុំខ្លួនបណ្តោះអាសន្ន ក្នុងពន្ធនាគារខេត្ត។
ការស្នើសុំរបស់ក្រុមកម្មករ ក៏បានធ្វើឡើង ក្រោយពេលដែលតំណាងមេធាវីការពារក្តីឲ្យកម្មករ ទាំង ៨រូប ដែលកំពុងជាប់ឃុំ បានដាក់សំណើ កាលពីថ្ងៃទី ៦មិថុនា កន្លងទៅ នៅតុលាការខេត្តកំពង់ស្ពឺ សុំឲ្យកូនក្តីរបស់ខ្លួន នៅក្រៅឃុំជាបណ្តោះអាសន្ន។ ប៉ុន្តែ សំណើនេះ ត្រូវបានតុលាការខេត្តកំពង់ស្ពឺធ្វើការបដិសេធ ដោយសំអាងហេតុផលថា ជារឿងធ្ងន់ធ្ងរ ធ្វើឲ្យប៉ះពាល់ដល់សន្តិសុខសណ្តាប់ធ្នាប់ និងភាពចលាចល ដល់រោងចក្រ ខណៈដែលការស៊ើបអង្កេតរបស់តុលាការ នៅមិនទាន់បានចាប់ផ្តើម នៅឡើយនោះ។ នេះបើតាមការអះអាងរបស់លោក ជា មុន្នី ប្រធានសហជីពសេរីកម្មករកម្ពុជា ដែលបានចុះទៅមើលការតវ៉ារបស់កម្មករ នៅពីមុខតុលាការខេត្តកំពង់ស្ពឺ នៅថ្ងៃចន្ទ ទី ១០ មិថុនា។
គួរបញ្ជាក់ថា មន្ត្រីសហជីព ៨នាក់ត្រូវបានសមត្ថកិច្ចចាប់ និងឃុំខ្លួនជុំវិញការបង្កអំពើហិង្សាក្នុងការប៉ះទង្គិច ពេលធ្វើកូដកម្មទាមទារដំឡើងប្រាក់ខែបន្ថែម កាលពីថ្ងៃ៣ មិថុនាកន្លងទៅ នៅក្នុងខេត្តកំពង់ស្ពឺ ក្នុងរោងចក្រសាប្រ៊ីណា ដែលជារោងចក្រស៊ីឈ្នួលផលិតសម្លៀកបំពាក់កីឡាល្បីរបស់ក្រុមហ៊ុន ណៃគី (Nike) នៅសហរដ្ឋអាមេរិក ។
ទោះយ៉ាងណា មេធាវីការពារក្តីកម្មករដែលកំពុងជាប់ឃុំបណ្តោះអាសន្នបានថ្លែងបញ្ជាក់ថា ខ្លួននឹងធ្វើការប្តឹងឧទ្ធរណ៏ នៅថ្ងៃស្អែក ប្រសិនបើ តុលាការ នៅតែមិនដោះលែងតាមការស្នើសុំរបស់ខ្លួន ដើម្បីឲ្យតុលាការសាលាឧទ្ធរណ៍សម្រចលើរឿងនេះ។ នេះបើតាមមេធាវីប្រចាំសហជីពសេរីកម្មករ លោក គុជ រដ្ឋា ដែលបានថ្លែងប្រាប់វិទ្យុបារាំង នៅថ្ងៃចន្ទនេះ។
ចំណែកលោក ឆឹម ឫទ្ធី ចៅក្រមស៊ើបអង្កេតសាលាដំបូងខេត្តកំពង់ស្ពឺ ដែលកាន់សំណុំរឿងនេះបានថ្លែងបញ្ជាក់ថា នៅថ្ងៃចន្ទនេះថា មូលហេតុដែលតុលាការច្រានចោលការសុំនៅក្រៅឃុំបណ្តោះអាសន្នរបស់កម្មករសង្ស័យទាំង៨នាក់ ដោយសារនីតិវិធីនៃការស៊ើបអង្កេតរបស់តុលាការនៅមិនទាន់ចាប់ផ្តើម ហើយវាជាការខុសនីតិវិធីរបស់ច្បាប់ផងដែរ ខណៈដែលដើមបណ្តឹងដែលមានខាងរោងចក្រ និងកម្មករផងនោះបានជំទាស់នឹងការស្នើសុំ នៅក្រៅឃុំនេះ។
រោងចក្រកាត់ដេរ សាប្រ៊ីណាដែលជារោងចក្រស៊ីឈ្នួលផលិតសម្លៀកបំពាក់កីឡាល្បីរបស់ក្រុមហ៊ុន ណៃគី (Nike) បានដាក់ពាក្យប្ដឹងទៅសមត្ថកិច្ចទារថ្លៃខូចខាតទ្រព្យសម្បត្តិ និងប្រាក់ជំងឺចិត្តចំនួន១៥ម៉ឺនដុល្លារ ពីមន្ត្រីសហជីព ៨នាក់ ដោយចោទថាបានបង្កកូដកម្ម រហូតឈានទៅផ្ទុះហិង្សាកើតឡើង កាលពីថ្ងៃទី៣ខែមិថុនា និងធ្វើឲ្យខូចខាតអគារ និងទ្រព្យសម្បត្តិសម្ភារៈរោងចក្រយ៉ាងធ្ងន់ធ្ងរ។ ប៉ុន្តែលោក ជា មុន្នីនៅតែបដិសេធ ថាកម្មករទាំង ៨នាក់នោះ មិនជាប់ពាក់ព័ន្ធនឹងអំពើហឹង្សានោះទេ ដោយអះអាងថា លោកសុខចិត្តជាប់ពន្ធនាគារជំនួសកម្មករទាំងអស់នោះ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ