ប្រេងឆៅ ដែលធ្លាយពីឈូងសមុទ្រម៉ិចស៊ិកបានប៉ះពាល់តំបន់ឆ្នេរសមុទ្ររដ្ឋ Louisiane
ចុះផ្សាយនៅថ្ងៃ៖
ស្តាប់ - ០៤:៣១
ការផ្ទុះស្ថានីយ៍បូមប្រេងមួយ របស់ក្រុមហ៊ុនប្រេងឥន្ធនៈអង់គ្លេសឈ្មោះ BP នៅឈូងសមុទ្រ Mexique កាលពីសប្តាហ៍មុន បានធ្វើឲ្យប្រេងឆៅ ធ្លាយចេញ-អណ្តែត-រសាត់ពាសពេញទឹកសមុទ្រ។ ប្រេងឆៅបានអណ្តែតរសាត់ ទៅដល់ឆ្នេរសមុទ្រនៃរដ្ឋ Louisiane សហរដ្ឋអាមេរិក។ ជាព្រឹត្តិការណ៍មួយដែលបានជម្រុញឲ្យរដ្ឋាភិបាលប្រកាសចាត់ទុក ជាគ្រោះមហន្តរាយជាតិ។
បើយោងតាមអ្នកឯកទេសខាងបរិស្ថានប្រេងឆៅ ដែលបានធ្លាយចេញពីការផ្ទុះស្ថានីយ៍បូមប្រេងមួយរបស់ក្រុមហ៊ុន ប្រេងឥន្ធនៈអង់គ្លេសឈ្មោះBP នៅឈូងសមុទ្រMexique កាលពីសប្តាហ៍មុន គឺជាមហន្តរាយមួយដែលនឹងអាចផ្តល់ផលអាក្រក់ ជាងការផ្ទុះស្ថានីយ៍បូមប្រេងExxon Valdez នៅក្នុងរដ្ឋAlaska កាលពី២៥ឆ្នំាមុនទៅទៀត។កាលណោះប្រេងឆៅ ដែលធ្លាយចេញពីការផ្ទុះនោះ បានអណ្តែត-រសាត់តាមបណ្តោយឆ្នេរប្រវែងជាង២០០០គីឡូម៉ែត្រ។ ករណីផ្ទុះស្ថានីយ៍បូមប្រេងExxon Valdez កាលពី ២៥ឆ្នំាមុន គឺមានតែប្រេងឆៅស្តុក នៅក្នុងស្ថានីយ៍នោះប៉ុណ្ណោះ ដែលបានធ្លាយហូរចាក់លើផ្ទៃសមុទ្រ។
ចំណែកឯ ការផ្ទុះស្ថានីយ៍បូមប្រេងនៅឈូងសមុទ្រMexique នាពេលនេះ មាន ២ករណី ទីមួយ៖ គឺការធ្លាយប្រេងឆៅដែលស្ទុកនៅស្ថានីយ៍ប្រមាណជា ៤ម៉ឺនម៉ែត្រគូប និងទីពីរដែលជាក្តីបារម្ភខ្លំាងជាងគេនោះ គឺ មានបរិមាណប្រេងឆៅជាង៨០ម៉ឺនលីត្រកំពុងបន្តបាញ់ចេញ ជារៀងរាល់ថ្ងៃពីប្រភពនៅបាតសមុទ្រក្នុងជម្រៅ១គីឡូម៉ែត្រកន្លះ។
ខណៈនេះគេកំពុងគិតគូររកមធ្យោបាយដើម្បីបិទខ្ទប់ប្រភពប្រេងនោះ។ តាមធម្មតា គេត្រូវការពេលវេលា ជាច្រើនសប្តាហ៍ ឬច្រើនខែផង។ ឧប្បត្តិហេតុដូចគ្នានេះបានកើតមានម្តងហើយ នៅក្នុងប្រទេសអូស្រ្តាលី ក្នុងឆ្នំា២០០៩។ កាលណោះ គេបានចំណាយពេលរហូត ដល់ទៅ ៧០ថ្ងៃ ទើបអាចបិទបំពង់ប្រភពប្រេង កុំឲ្យបាញ់ចេញមកក្រៅ។
ផលវិបាកដែលជះលើរដ្ឋLouisiane គឺវិស័យបរិស្ថាន។ នៅរដ្ឋLouisiane បញ្ហាបរិស្ថានជារឿងមួយដែល គេមិនអាចធ្វើព្រងើយកន្តើយបានឡើយ ពីព្រោះជាតំបន់ពិសេសមួយដែលសម្បូរទៅដោយជីវចម្រុះមានទំាងសត្វ និងរុក្ខជាតិគ្រប់បែបយ៉ាង។ ដូច្នេះវាជារឿងមួយបន្ទាន់បំផុត ដែលរដ្ឋាភិបាលត្រូវចាត់វិធានការទប់ទល់ព្រោះថា ប្រេងឆៅដែលអណ្តែតលើផ្ទៃទឹកសមុទ្រ និងដែលទៅបៀមជាប់នឹងដីនោះ អាចសម្លាប់សត្វសមុទ្រ និងបំផ្លាញរុក្ខជាតិគ្រប់ប្រភេទ។
ក្រុមសង្រ្គោះបន្ទាន់បានប្រើពោងបណ្តែត ដើម្បីគៀង-ប្រមែលប្រមូលផ្តុំប្រេងឆៅកុំឲ្យរសាត់អណ្តែតពាសវាល ពាសកាលធំពេក។ប៉ុន្តែវិធានការនេះ ហាក់ដូចជាគ្មានប្រសិទ្ធិភាពប៉ុន្មានទេ ព្រោះថាពេលនេះប្រេងឆៅ កំពុងរសាត់អណ្តែតលើផ្ទៃទឹកសមុទ្រប្រមាណជា១៥០០គីឡូម៉ែត្រក្រឡា និងកំពុងតែបន្តលាតសន្ធឹងកាន់តែធំទៅៗ។ វិធានការបន្ទាប់មកទៀត គេបានដុតប្រេងឆៅនៅលើផ្ទៃទឹកសមុទ្រនោះតែម្តង។
វិធានការដុតនេះមិនត្រូវបានគ្រប់ប្រទេសយកទៅអនុវត្តន៍ទេ ហើយបើតាមការយល់ឃើញរបស់ក្រុមអ្នកការពារបរិស្ថាន គេមិនត្រូវយកទៅប្រើទេពីព្រោះថា ការដុតប្រេងឆៅបានបញ្ចេញជាផ្សែងយ៉ាងខ្មួលខ្មាញ់ ដែលបង្កប់ទៅដោយសារធាតុគីមីនំាឲ្យកើតជំងឺមហារីក ដូចគ្នានឹងផ្សែងបារី។មួយវិញទៀតសារធាតុគីមី ដែលនំាឲ្យកើតជំងឺមហារីកនេះ មិនមែនមានតែនៅក្នុងផ្សែងនោះប៉ុណ្ណោះទេ តែក៏មាននៅក្នុងកាកសំណល់ប្រេងឆៅដែលមិនឆេះ និងនៅក្នុងទឹកដែរ។
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ