ការបោះឆ្នោតនៅគៀកហ្ស៊ីស្តង់ដើម្បីលទ្ធិប្រជាធិបតេយ្យ
ចុះផ្សាយនៅថ្ងៃ៖
ស្តាប់ - ០៤:៥២
នៅថ្ងៃអាទិត្យនេះ ប្រទេសគៀកហ្ស៊ីស្តង់រៀបចំធ្វើការបោះឆ្នោតសភាដើម្បីខិតខំរៀបចំឲ្យមានលទ្ធិប្រជាធិបតេយ្យមួយនៅតំបន់អាស៊ីកណ្តាល។ ការបោះឆ្នោតសភានេះ រៀបចំធ្វើឡើង៦ខែក្រោយពីមានការផ្តួលរំលំលោកប្រធានាធិបតីគៀកហ្ស៊ីស្តង់Kourmanbek Bakiev។ ចំណែកឯសហរដ្ឋអាមេរិកវិញ គេគាំទ្រនិងធ្វើយ៉ាងណាឲ្យប្រទេសគៀកហ្ស៊ីស្តង់ចេះធ្វើដំណើរឆ្ពោះ ទៅរកលទ្ធិប្រជាធិបតេយ្យ។
អ្នកដឹកនាំបណ្តោះអាសន្ននៃប្រទេសគៀកហ្ស៊ីស្តង់សង្ឃឹមថា ការបោះឆ្នោតសភានៅថ្ងៃអាទិត្យទី១០តុលានេះ អាចជួយរំងាប់ភាពតានតឹងពាក់ព័ន្ធនឹងបញ្ហាពូជសាសន៍នៅប្រទេសគៀកហ្ស៊ីស្តង់ ក្រោយពីមានការវាយប្រយុទ្ធគ្នារវាងប្រជាជនគៀកហ្ស៊ីស្តង់និងប្រជាជនអ៊ូស្បេគីស្តង់ដែលបានបណ្តាលឲ្យមានមនុស្សស្លាប់ប្រមាណ៤០០នាក់កាលពីខែមិថុនាកន្លងទៅ។ ដូច្នេះ ការបោះឆ្នោតសភានេះប្រហែលជា អាចជួយបញ្ចៀសប្រទេសគៀកហ្ស៊ីស្តង់ឲ្យចេញផុតពីវិបត្តិនយោបាយ។
ការបោះឆ្នោតសភានៅប្រទេសគៀកហ្ស៊ីស្តង់នៅថ្ងៃអាទិត្យទី១០តុលានេះ នៅមានកម្មវត្ថុមួយទៀតគឺរៀបចំតែងតាំងឲ្យមាននាយករដ្ឋមន្ត្រីគៀកហ្ស៊ីស្តង់ដែលមានអំណាចធំទូលំទូលាយជាងអំណាចរបស់ប្រធានាធិបតី។ ដូចបានថ្លែងបញ្ជាក់ដោយលោកស្រីRoza Otounbaïeva ដែលដឹកនាំរដ្ឋាភិបាលបណ្តោះអាសន្នគៀកហ្ស៊ីស្តង់ថា “ ការបោះឆ្នោតនៅថ្ងៃអាទិត្យនេះ ពុំមែនគ្រាន់តែជាការបោះឆ្នោតសភាប៉ុណ្ណោះឡើយ វាក៏ជាការបោះឆ្នោតមួយសម្រាប់ប្តូរប្រែឲ្យមានប្រព័ន្ធរដ្ឋាភិបាលថ្មីមួយនៅប្រទេសគៀកហ្ស៊ីស្តង់ផងដែរ”។
ប្រទេសគៀកហ្ស៊ីស្តង់ឋិតនៅលើចំណុចភូមិសាស្ត្រនយោបាយមួយដ៏សំខាន់សម្រាប់សហរដ្ឋអាមេរិកនិងប្រទេសរុស្ស៊ី ហេតុដូច្នេះហើយបានជាសហរដ្ឋអាមេរិកនិងប្រទេសរុស្ស៊ីសុទ្ធតែមានមូលដ្ឋានយោធានៃកងកម្លាំងជើងអាកាសរបស់ខ្លួននៅប្រទេសគៀកហ្ស៊ីស្តង់។ សូមបញ្ជាក់ថា ប្រទេសគៀកហ្ស៊ីស្តង់មានប្រជាជនប្រមាណ៥លាន៣សែននាក់ មានព្រំដែនជាប់ជាមួយប្រទេសចិន ហើយឋិតនៅមិនឆ្ងាយប៉ុន្មានពីប្រទេសអាហ្វហ្កានិស្តង់ ប្រទេសអៀរ៉ង់ និងប្រទេសរុស្ស៊ី។
ប្រជាជនគៀកហ្ស៊ីស្តង់ប្រមាណ២លាន៨សែននាក់ត្រូវមកចូលរួមធ្វើការបោះឆ្នោតនៅថ្ងៃអាទិត្យនេះដើម្បីជ្រើសតែងតាំងសមាជិកសភា១២០រូប។ ហើយបើយោងតាមអ្នកឯកទេស មានគណបក្សនយោបាយគៀកហ្ស៊ីស្តង់ចំនួន៦ដែលអាចមានភ័ព្វវាសនាចូលមកធ្វើជាអ្នកតំណាងនៅក្នុងសភាគៀកហ្ស៊ីស្តង់។
ដោយហេតុតែមានគណបក្សនយោបាយច្រើនពេក មើលទៅប្រហែលជាគ្មានគណបក្សនយោបាយណាមួយអាចទទួលបានអាសនៈភាគច្រើនគ្រប់គ្រាន់ ពោលគឺបាន៦១អាសនៈសម្រាប់គ្រប់គ្រងប្រទេសឡើយ។ នៅក្នុងករណីនេះ គណបក្សនយោបាយណាដែលទទួលបានសំឡេងឆ្នោតយ៉ាងតិច៥%នឹងមានសិទ្ធិបញ្ជូនអ្នកតំណាងរបស់ខ្លូនឲ្យចូលធ្វើជាសមាជិកសភា។
គួរកត់សម្គាល់ថា មានគណបក្សនយោបាយដែលជាគូប្រជែងជាច្រើនដែលដឹកនាំដោយអ្នកទទួលខុសត្រូវជាន់ខ្ពស់នៃរដ្ឋាភិបាលបណ្តោះអាសន្នគៀកហ្ស៊ីស្តង់។ ក្នុងចំណោមនោះ មានលោកOmourbek Tekebaïevដែលជាអ្នកកំណែទម្រង់រដ្ឋធម្មនុញ្ញម្នាក់ដ៏សំខាន់។ ហើយនៅក្នុងចំណោមអ្នកប្រជែងនឹងលោក Omourbek Tekebaïev គេកត់សម្គាល់ឃើញមានលោកAlmazbek Atambaïevដែលជាភូឈួយរបស់លោកស្រី Roza Otounbaïevaនាសម័យកាលក្រោយការបះបោរនៅខែមេសា។ លោក Omourbek Tekebaïevបានមានជំនួបជាមួយលោកនាយករដ្ឋមន្ត្រីVladimir Poutine កាលពីខែមុន។
ក៏ប៉ុន្តែប្រទេសរុស្ស៊ីមានបេក្ខជនដ៏គាប់ចិត្តរបស់គេគឺលោកFelix Koulov ដែលជាអតីតនាយករដ្ឋមន្ត្រីរបស់លោកBakiev។ លោកFelix Koulovធ្លាប់បានជួបលោកប្រធានាធិបតីរុស្ស៊ីDmitri Medvedev កាលពីចុងខែកញ្ញាកន្លងទៅ។
ចំណែកឯសហរដ្ឋអាមេរិកវិញ គេគាំទ្រនិងធ្វើយ៉ាងណាឲ្យប្រទេសគៀកហ្ស៊ីស្តង់ចេះធ្វើដំណើរឆ្ពោះទៅរកលទ្ធិប្រជាធិបតេយ្យ។ ជាសរុប ទីក្រុងវ៉ាស៊ីតោនចង់ឲ្យមានប្រជាធិបតេយ្យូបនីយកម្មនៅទូទាំងតំបន់អាស៊ីកណ្តាលដែលឋិតនៅក្រោមការគ្រប់គ្រងរបស់ជនល្មោភអំណាចអត្តាធិបតីនៃប្រទេសទួកមេនីស្តង់ ប្រទេសអ៊ូស្បេគីស្តង់ ឬប្រទេសកាហ្សាក់ស្តង់៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ