ជំនួបកំពូល Brics បង្ហាញពីកំណើនឥទ្ធិពលនៅលើឆាកអន្តរជាតិ
ចុះផ្សាយនៅថ្ងៃ៖
ស្តាប់ - ០៧:៤៣
នៅថ្ងៃព្រហស្បតិ៍ ទី១៤ មេសា ឆ្នំា ២០១១ ក្រុមប្រទេសដែលកំពុងមានសេដ្ឋកិច្ចរីកលូតលាស់ ហៅថាកាត់ថា Brics ក្នុងនោះមានប្រេស៊ីល រុស្ស៊ី ឥណ្ឌា ចិន និងអាហ្វ្រិកខាងត្បូង បានបើកជំនួបកំពូលនៅក្នុងខេត្តហៃណាន ស្ថិតប៉ែកខាងត្បូងប្រទេសចិន។ ក៏ដូចជាជំនួបកំពូលកាលពី ២លើកមុនដែរ ជំនួបកំពូលលើកទី៣នេះ គឺជាការបង្ហាញនូវឥទ្ធិពលរបស់ខ្លួននៅលើឆាកអន្តរជាតិ និងចៀសវាងមិននិយាយពីសំណុំរឿងរសើបរវាងគ្នា។
ដំបូងឡើយ មានសមាជិកតែ ៤ប្រទេសប៉ុណ្ណោះដែលស្ថិតក្នុងក្រុមនេះ និងសរសេរកាត់ជាភាសាអង់គ្លេសថា Bric។ B គឺប្រេស៊ីល R គឺរុស្ស៊ី I គឺឥណ្ឌា និង C គឺចិន។ តាមការពិត ពាក្យ Bric មិនមែនបង្កើតឡើងដោយប្រទេសទំាង ៤នេះទេ តែបានបង្កើតឡើងដោយអ្នកសេដ្ឋកិច្ចនៅក្នុងធនាគារឯកជនអាមេរិកំាងមួយកាលពីឆ្នំា ២០០១។ ការបង្កើតឲ្យមានពាក្យ Bric នេះឡើង គឺគេចង់និយាយសំដៅទៅលើឥទ្ធិពលរបស់ប្រទេសទំាង ៤ គឺប្រេស៊ីល រុស្ស៊ី ឥណ្ឌា ចិនដែលកំពុងតែមានសេដ្ឋកិច្ចរីកលូតលាស់ខ្លំាង ពិសេសតំាងពីដើមសតវត្សទី ២១នេះមក។ ក្រោយមក ប្រទេសទំាង ៤នេះក៏បានប្រែក្លាយ Bric ទៅជាក្លឹបដូចករណី G៨ ឬមួយក៏ G២០ មានន័យថា គ្មានរចនាសម្ព័ន្ធ ឬមួយ ក៏សេនាធិការដ្ឋានអ្វីទេ តែវាជាវេទិកាមួយដែលអនុញ្ញាតឲ្យប្រទេសជាសមាជិកជួបប្រជុំគ្នា ដើម្បីជជែកអំពីបញ្ហាពិភពលោក និងការពង្រឹងកិច្ចសហប្រតិបត្តិការរវាងគ្នា ទំាងនៅលើវិស័យសេដ្ឋកិច្ច ក៏ដូចជានយោបាយ។ បន្ទាប់មកទៀត ប្រមុខដឹកនំានៃប្រទេសទំាង ៤នេះក៏បានផ្តើមរៀបចំឲ្យមានជំនួបកំពូលប្រចំាឆ្នំា ដោយផ្លាស់ប្តូរវេនគ្នា ធ្វើជាប្រធានម្នាក់ម្តង។ ជំនួបកំពូលលើកទី១ បានធ្វើឡើងក្នុងឆ្នំា ២០០៩ នៅប្រទេសរុស្ស៊ី និងលើកទី ២ ក្នុងឆ្នំា ២០១០ នៅប្រទេសប្រេស៊ីល។ ដូច្នេះជំនួបកំពូលក្នុងឆ្នំា ២០១១នេះ គឺជាជំនួបកំពូលលើកទី ៣ ដែលដល់វេនចិន ធ្វើជាប្រធាន។ ប៉ុន្តែនៅលើកនេះ Bric បានបន្ថែមសមាជិកថ្មីម្នាក់ទៀត គឺប្រទេសអាហ្រ្វិកខាងត្បូង។ ដូច្នេះ ពាក្យ Bric បានក្លាយជា Brics ពីព្រោះគេបន្ថែមអក្សរ s ដែលតំណាងឲ្យ South africa ជាភាសាអង់គ្លេស។
ឥទ្ធិពលរបស់ក្រុមប្រទេស Brics នៅលើឆាកអន្តរជាតិ
ឥទ្ធិពលរួមនៃក្រុមប្រទេស Brics នៅលើឆាកអន្តរជាតិ មានសក្តានុពល ៣សំខាន់ និងដែលកំពុងគ្របដំណ្តប់លើពិភពលោកនាពេលបច្ចុប្បន្ន សក្តានុពលទីមួយ៖ គឺចំនួនប្រជាជន ដែលបូកសរុបទំាង ៥ប្រទេសបញ្ចូលគ្នា មានរហូតដល់ទៅ ៤០% នៃចំនួនប្រជាជនសរុបនៅទូទំាងពិភពលោក។ សក្តានុពលទីពីរ៖ គឺទំហំផ្ទៃដី ដែលបូកសរុបទំាង ៥ប្រទេសបញ្ចូលគ្នា មានដល់ទៅ ២៥% នៃផ្ទៃក្នុងពិភពលោកទំាងមូល។ ចំណែកឯសក្តានុពលទីបី៖ គឺកំណើនសេដ្ឋកិច្ច ដែលក្រុមប្រទេស Brics បានស្រូបយកប្រមាណជា ៤០% នៃកំណើនសេដ្ឋកិច្ចពិភពលោក។ បើតាមការព្យាករណ៍របស់អង្គការមូលនិធិរូបីយវត្ថុអន្តរជាតិ កំណើននេះនឹងអាចកើនរហូតដល់ទៅជាង ៦០% នៅក្នុងឆ្នំា ២០១៤ ខាងមុខ។ ដូច្នេះឃើញថា នៅថ្ងៃខាងមុខ សក្តានុពលទំាង ៣នៃក្រុមប្រទេស Brics មានតែបន្តកំណើនទៅមុខ និងអាចក្លាយពីប្រទេសដែលកំពុងមានសេដ្ឋកិច្ចរីកលូតលាស់ថ្ងៃនេះ ទៅជាមហាអំណាចឧស្សហកម្មពិភពលោក ចូលខ្លួនទៅជំនួសប្រទេសមហាអំណាចឧស្សហកម្មបច្ចុប្បន្ន។ ដូចករណីប្រទេសចិនដែលបានក្លាយជាមហាអំណាចសេដ្ឋកិច្ច ២ ក្នុងលោក ចូលទៅជំនួសកន្លែងប្រទេសអាល្លឺម៉ង់ និងជប៉ុន។
Brics ទាមទារឲ្យមានកំណែទម្រង់លើអភិបាលកិច្ចពិភពលោក
ក៏ដូចជានៅក្នុងជំនួបកំពូលចំនួន ២ដងមុនដែរ ក្រុមប្រទេស Brics ចង់ឲ្យមានកំណែទម្រង់លើស្ថានប័នអន្តរជាតិមួយចំនួន ដូចយ៉ាង កំណែទម្រង់លើប្រព័ន្ធធនាគារពិភពលោក អង្គការមូលនិធិរូបីយវត្ថុអន្តរជាតិ ឬមួយក៏កំណែទម្រង់នៅផ្ទៃក្នុងអង្គការសហប្រជាជាតិ។ ការទាមទាររបៀបនេះ ដោយក្រុមប្រទេស Brics បានលើកយកហេតុផលថា គឺមិនអាចបន្តរក្សាទុករចនាសម្ព័ន្ធពិភពលោក ដូចកាលពី ៥០ឆ្នំាមុនទេ។ ម្យ៉ាងទៀត នាពេលនេះ ក្រុមប្រទេស Brics កំពុងតែដើរតួនាទីយ៉ាងសំខាន់ ក្នុងការជួយស្រោចស្រង់សេដ្ឋកិច្ចពិភពលោក នៅក្រោយវិបត្តិ។ ទន្ទឹមគ្នានេះ ក្រុមប្រទេស Brics បានស្នើឲ្យមានកំណែទម្រង់លើប្រព័ន្ធហិរញ្ញវត្ថុអន្តរជាតិ ដោយចេញមុខប្រឆំាងនឹងការយកប្រាក់ដុល្លារតែមួយ ធ្វើជារូបិយវត្ថុគោល នៅក្នុងការដោះដូរពាណិជ្ជកម្មអន្តរជាតិ។ សម្រាប់ក្រុមប្រទេស Brics គេគួរតែកំណត់យកប្រាក់នៃប្រទេសផ្សេងទៀត មកធ្វើជារូបិយវត្ថុគោល ក្រៅពីប្រាក់ដុល្លារ។ ជារួមទៅ ក្រុមប្រទេស Brics បាននិងកំពុងទាមទារឲ្យមានវត្តមានរបស់ខ្លួននៅដំណោះស្រាយបញ្ហាសំខាន់ៗនៅក្នុងលោក។
ជំនួបកំពូល Brics ព្យាយាមមិននិយាយពីសំណុំរឿងរសើប
ការដណ្តើមផលប្រយោជន៍គ្នា ទំាងនៅលើវិស័យសេដ្ឋកិច្ច និងនយោបាយកំពុងបន្តមាននៅក្នុងចំណោមក្រុមប្រទេស Brics។ ប្រទេសចិន ក្នុងនាមជាមហាអំណាចសេដ្ឋកិច្ចទី ២ ក្នុងលោក បានព្យាយាមពង្រឹងតួនាទីរបស់ខ្លួនក្នុងនាមជាប្រទេសគំរូ នៅក្នុងចំណោមប្រទេសដែលកំពុងមានសេដ្ឋកិច្ចរីកលូតលាស់។ ដូច្នេះ ទីក្រុងប៉េកំាងពិតជាមិនបណ្តោយឲ្យជំនួបកំពូលនៃក្រុមប្រទេស Brics ពេលនេះ លើកយកប្រធានរឿងរសើបណា ដែលនំាឲ្យប៉ះពាល់ដល់ផលប្រយោជន៍ខ្លួនទេ រួមមាន ប្រាក់យ័នចិនដែលមានតម្លៃទាប ធៀបនឹងប្រាក់ដុល្លារ ឬមួយក៏កំណែទម្រង់នៅផ្ទៃក្នុងក្រុមប្រឹក្សាសន្តិសុខអង្គការសហប្រជាជាតិជាដើម។ ចិនដែលជាសមាជិកអចិន្ត្រៃយ៍នៅក្នុងក្រុមប្រឹក្សាសន្តិសុខអង្គការសហប្រជាជាតិ មិនចង់បានវត្តមានប្រទេសឥណ្ឌា និងប្រេស៊ីលដែលកំពុងបន្តទាមទារយ៉ាងទទូចនោះទេ។ ម្យ៉ាងទៀត បើនិយាយពីទម្ងន់សេដ្ឋកិច្ចនៅក្នុងចំណោមក្រុមប្រទេស Brics វិញ ចិនមានទម្ងន់ ៣ដង ច្រើនជាងប្រទេសប្រេស៊ីល ៤ដង ច្រើនជាង ឥណ្ឌា ឬមួយក៏រុស្ស៊ី និងមានរហូតដល់ទៅ ១៦ដង ច្រើនជាងប្រទេសអាហ្រ្វិកខាងត្បូង៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ