បញ្ហាប្រាក់បំណុលអាមេរិកាំងដ៏ច្រើនមហិមាធ្វើឲ្យទីផ្សារហិរញ្ញវត្ថុភ័យបារម្ភ
ចុះផ្សាយនៅថ្ងៃ៖
ស្តាប់ - ០៥:៣០
ការគំរាមបញ្ចុះចំណាត់ថ្នាក់របស់សហរដ្ឋអាមេរិកដោយទីភ្នាក់ងារវិភាគ ហិរញ្ញវត្ថុS&P ហើយនិងវិបត្តិប្រាក់បំណុលដ៏ច្រើនសន្ធឹកសន្ធាប់នៅក្នុងតំបន់ប្រាក់ អឺរ៉ូបានធ្វើឲ្យទីផ្សារភាគហ៊ុនភ័យបារម្ភនិងស្គាល់ការធ្លាក់ ស្រុតចុះយ៉ាងខ្លាំង។ នៅចំពោះមុខសម្ពាធរបស់ទីភ្នាក់ងារវិភាគហិរញ្ញវត្ថុS&P នេះ រដ្ឋាភិបាលអាមេរិកបានបញ្ចេញប្រតិកម្មយ៉ាងឆាប់រហ័សដោយបានប្រកាសឲ្យ ដឹងថា សហរដ្ឋអាមេរិកនឹងចាត់វិធានការសម្រាប់ធ្វើការកាត់បន្ថយឧនភាពសាធារណៈ របស់ខ្លួន ។
បញ្ហាឧនភាពថវិកាអាមេរិកាំងដ៏សែនធ្ងន់ធ្ងរបានក្លាយទៅជាបញ្ហាមួយដែលបានធ្វើឲ្យទីផ្សារហិរញ្ញវត្ថុនៅទូទាំងពិភពលោកភ័យបារម្ភយ៉ាងខ្លាំង។ ហេតុដូច្នេះហើយ បានជាទីភ្នាក់ងារវិភាគហិរញ្ញវត្ថុStandard & Poor’sបានគំរាមបញ្ចុះចំណាត់ថ្នាក់របស់សហរដ្ឋអាមេរិកពីថ្នាក់ “AAA”មកចំណាត់ថ្នាក់ “AAA”ចងភ្ជាប់មកជាមួយនូវទស្សនវិស័យអវិជ្ជមាន។ ហើយការបារម្ភពីវិបត្តិប្រាក់បំណុលនៃប្រទេសមួយចំនួននៅតំបន់ប្រាក់អឺរ៉ូដូចជាប្រទេសក្រិក ប្រទេសព័រទុយហ្កាល់ និងប្រទេសអៀរឡង់ក៏បានធ្វើឲ្យទីផ្សារភាគហ៊ុននៅទូទាំងពិភពលោកកើតមានក្តីបារម្ភពុំតិចឡើយ។
ការកើនឡើងខ្លាំងនៃក្តីបារម្ភពាក់ព័ន្ធនឹងប្រាប់បំណុលដ៏ច្រើនមហិមារបស់សហរដ្ឋអាមេរិកនេះហើយដែលបានបណ្តាលឲ្យទីផ្សារភាគហ៊ុននៅប្រទេសលោកខាងលិចដួលធ្លាក់ស្រុតចុះយ៉ាងខ្លាំង កាលពីម្សិលមិញ ទីផ្សារភាគហ៊ុននៅទីក្រុងប៉ារីស តួលេខCAC 40 បានធ្លាក់បាត់បង់អស់ប្រមាណ២,៣៥%។ រីឯតួលេខDow Jones របស់ទីផ្សារភាគហ៊ុនអាមេរិកាំងវិញបានស្រុតធ្លាក់ចុះអស់១,១៤%។
ហើយការធ្លាក់ស្រុតចុះនៃទីផ្សារភាគហ៊ុនមានលក្ខណៈកាន់តែធ្ងន់ធ្ងរខ្លាំងទៅទៀតក្រោយពីមានការព្រមានបញ្ចុះចំណាត់ថ្នាក់របស់សហរដ្ឋអាមេរិកដោយទីភ្នាក់ងារវិភាគហិរញ្ញវត្ថុStandard & Poor’sពីថ្នាក់ “AAA”មកចំណាត់ថ្នាក់ “AAA”ចងភ្ជាប់មកជាមួយនូវទស្សនវិស័យអវិជ្ជមាននៅថ្ងៃរសៀលម្សិលមិញ។ ទាំងនេះក៏ហេតុតែ ទីភ្នាក់ងារវិភាគហិរញ្ញវត្ថុStandard & Poor’sមើលឃើញទំហំដ៏ធំធេងនៃប្រាក់បំណុលសាធារណៈអាមេរិកាំងដែលកំពុងវិវឌ្ឍទៅដោយគ្មាននយោបាយសេដ្ឋកិច្ចនិងនយោបាយហិរញ្ញវត្ថុអ្វីជាក់លាក់សម្រាប់ធ្វើការទប់ទល់នឹងវិបត្តិប្រាក់បំណុលដ៏សែនធ្ងន់ធ្ងរនេះ។ បន្ថែមពីលើនេះ នៅមានបញ្ហាឧនភាពថវិកាអាមេរិកាំងដែលមានរហូតដល់ទៅជិត១០%នៃផលិតផលដុលក្នុងប្រទេសដែលជាភស្តុតាងបង្ហាញឲ្យឃើញពីសភាពយ៉ាប់យ៉ឺននៃស្ថានភាពហិរញ្ញវត្ថុរបស់សហរដ្ឋអាមេរិក។ ចំណែកឯ ប្រាក់បំណុលសាធារណៈអាមេរិកាំងវិញមានដល់ទៅ៩៩,៥២%នៃផលិតផលដុលក្នុងប្រទេស។
បរិមាណនៃប្រាក់បំណុលសាធារណៈអាមេរិកាំងដែលមានដល់ទៅ៩៩,៥២%នៃផលិតផលដុលសរុប ហើយនិងឧនភាពថវិកាអាមេរិកាំងដែលខិតជិតដល់១០%នៃផលិតផលដុលក្នុងប្រទេស គឺពិតជាសម្ពាធមួយដែលអ្នកដឹកនាំអាមេរិកាំងមានការលំបាកនឹងធ្វើការទប់ទល់។ កត្តាទាំងនេះហើយដែលបានបណ្តាលឲ្យតម្លៃប្រាក់ដុល្លារអាមេរិកធ្លាក់មកស្មើនឹង០,៨៩ហ្វ្រង់ស្វីសសម្រាប់១ដុលា្លរ។ រីឯតម្លៃមាសនៅទីក្រុងឡុងដ្រឹ៍វិញក៏បានស្ទុះកើនឡើងដល់១ ៤៩៥ដុល្លារសម្រាប់មាសមួយOnceដែលជាកម្រិតឯតទគ្គកម្មពុំដែលកើតមាន។
សូមបញ្ជាក់ថា បច្ចុប្បន្ននេះ សហរដ្ឋអាមេរិកគ្រាន់តែឋិតនៅក្រោមការគំរាម ហើយនៅពុំទាន់បាត់បង់ចំណាត់ថ្នាក់ “AAA”នៅឡើយ។ ក៏ប៉ុន្តែការគំរាមរបស់ទីភ្នាក់ងារវិភាគហិរញ្ញវត្ថុStandard & Poor’sនេះគឺធ្វើឡើងដើម្បីដាក់សម្ពាធទៅលើគណបក្សនយោបាយអាមេរិកាំង ទាំងបក្សសាធារណរដ្ឋ ទាំងបក្សប្រជាធិបតេយ្យឲ្យចេះយល់ព្រមព្រៀងគ្នាក្នុងការរិះរកដំណោះស្រាយសម្រាប់ធ្វើការកាត់បន្ថយឧនភាពសាធារណៈរបស់សហរដ្ឋអាមេរិក។
នៅចំពោះមុខសម្ពាធរបស់ទីភ្នាក់ងារវិភាគហិរញ្ញវត្ថុS&P នេះ រដ្ឋាភិបាលអាមេរិកបានបញ្ចេញប្រតិកម្មយ៉ាងឆាប់រហ័សដោយបានប្រកាសឲ្យដឹងថា សហរដ្ឋអាមេរិកនឹងចាត់វិធានការសម្រាប់ធ្វើការកាត់បន្ថយឧនភាពសាធារណៈរបស់ខ្លួន ហើយគណបក្សនយោបាយអាមេរិកាំង ទាំងបក្សសាធារណរដ្ឋ ទាំងបក្សប្រជាធិបតេយ្យបានយល់ព្រមព្រៀងគ្នាពីការចាំបាច់ក្នុងការរិះរកដំណោះស្រាយឲ្យបានឆាប់រហ័សដើម្បីធ្វើការប្រយុទ្ធទប់ទល់នឹងវិបត្តិហិរញ្ញវត្ថុដ៏ធ្ងន់ធ្ងរនេះ។
ហើយអនុរដ្ឋមន្ត្រីក្រសួងហិរញ្ញវត្ថុអាមេរិកាំងលោកស្រីMary Miller ឆ្លើយតបទៅនឹងការគំរាមរបស់ទីភ្នាក់ងារវិភាគហិរញ្ញវត្ថុStandard & Poor’sថា "ការយល់ឃើញដ៏អវិជ្ជមានរបស់ទីភ្នាក់ងារវិភាគហិរញ្ញវត្ថុStandard & Poor’sគឺពិតជាមើលស្រាលដល់សមត្ថភាពរបស់អ្នកដឹកនាំអាមេរិកាំងក្នុងការប្រយុទ្ធទប់ទល់នឹងបញ្ហាឧនភាពសាធារណៈរបស់សហរដ្ឋអាមេរិកពេកហើយ”៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ