សមាជិកព្រឹទ្ធសភាស្នើផែនការថ្មីដើម្បីកាត់បន្ថយឧនភាព
ចុះផ្សាយនៅថ្ងៃ៖
ស្តាប់ - ០៤:៤១
សភាអ្នកតំណាងអាមេរិកបានអនុម័តនៅល្ងាចថ្ងៃអង្គារទី១៩កក្កដាឆ្នាំ២០១១ផែនការសម្រាប់ធ្វើការកាត់បន្ថយឧនភាពថវិកា។ ក៏ប៉ុន្តែ ផែនការថ្មីមួយទៀត ដែលរៀបចំឡើងដោយក្រុមសមាជិកព្រឹទ្ធសភាអាមេរិកមួយក្រុម ដែលក្នុងនោះមានអ្នកមកពីបក្សសាធារណរដ្ឋផង និងអ្នកមកពីបក្សប្រជាធិបតេយ្យផង ប្រហែលជាអាចនឹងត្រូវគេយកមកអនុវត្ត។
នៅថ្ងៃអង្គារម្សិលមិញ សមាជិកព្រឹទ្ធសភាអាមេរិកមួយក្រុម ដែលក្នុងនោះមានសមាជិកព្រឹទ្ធសភាបីរូបមកពីបក្សប្រជាធិបតេយ្យ និងបីរូបទៀតមកពីបក្សសាធារណរដ្ឋបានស្នើផែនការថ្មីមួយសម្រាប់ធ្វើការកាត់បន្ថយឧនភាពថវិកាប្រមាណពី៣ ៦០០ពាន់លានដុល្លារទៅ៣ ៧០០ពាន់លានដុល្លារសម្រាប់រយៈពេល១០ឆ្នាំ ដែលពុំខុសឆ្ងាយប៉ុន្មានឡើយពី៤ ០០០ពាន់លានដុល្លារចង់បានរបស់លោកប្រធានាធិបតីបារ៉ាក់អូបាម៉ា។
ផែនការនោះ បន្ថែមពីលើការកែតម្រូវទៅលើកម្មវិធីសង្គមកិច្ចអាមេរិកាំងសំខាន់ៗ នៅមានការស្នើឲ្យរិះរកដំឡើងប្រាក់ចំណូលដោយពុំធ្វើការដំឡើងពន្ធដារ។ ការដំឡើងពន្ធដារដែលបក្សសាធារណរដ្ឋពុំចង់ឮសោះឡើយ។ ក៏ប៉ុន្តែ គេស្នើឲ្យបង្កើនប្រាក់ចំណូលរដ្ឋដោយធ្វើការកែទម្រង់ទៅលើប្រព័ន្ធពន្ធដារទៅវិញ។
នាឱកាសអន្តរាគមន៍នៅក្នុងសន្និសីទកាសែតនៅសេតវិមាន លោកប្រធានាធិបតីបារ៉ាក់អូបាម៉ាបានថ្លែងថា “ជាសរុប សំណើផែនការថ្មីរបស់សមាជិកព្រឹទ្ធសភាមានលក្ខណៈសមស្របនឹងការទាមទារចង់បានរបស់លោក។ យើងពុំត្រូវខាតបង់ពេលវេលាមកឈ្លោះប្រកែកគ្នាពីបញ្ហានិមិត្តរូបបន្តិចបន្តួចទៀតឡើយ។ ដល់ពេលយើងត្រូវដោះស្រាយបញ្ហាដ៏សំខាន់ហើយ។ ហើយជាមួយនឹងផែនការថ្មីរបស់ក្រុមសមាជិកព្រឹទ្ធសភានេះ យើងអាចនឹងឈានទៅដល់ការស្រុះស្រួលយល់ព្រមព្រៀងរវាងបក្សសាធារណរដ្ឋនិងបក្សប្រជាធិបតេយ្យ”។
គួរកត់សម្គាល់ថា នៅសល់តែ១៣ថ្ងៃទៀត ថ្ងៃទី២សីហានឹងឈានមកដល់។ ក្រោយថ្ងៃទី២សីហា បើគ្មានការយល់ព្រមពីសភាឲ្យដំឡើងកម្រិតអតិបរមានៃប្រាក់បំណុលទេ នោះសហរដ្ឋអាមេរិកនឹងឋិតនៅក្នុងស្ថានភាពធនក្ស័យ ហើយសហរដ្ឋអាមេរិកនិងពិភពលោកច្បាស់ជាជួបនឹងផលវិបាកសេដ្ឋកិច្ចយ៉ាងសែនធ្ងន់ធ្ងរជាពុំខាន។
ផែនការដ៏តឹងរ៉ឹងដែលបក្សសាធារណរដ្ឋបានឲ្យឈ្មោះថា “កាត់បន្ថយ ដាក់កម្រិត តុល្យភាព"ដែលគ្រោងកាត់បន្ថយឧនភាពថវិកាអាមេរិកប្រមាណ១១១ពាន់លានដុល្លារសម្រាប់ឆ្នាំ២០១១-២០១២ ហើយដែលបានទទួលការអនុម័តដោយសភាអ្នកតំណាងអាមេរិកកាលពីថ្ងៃអង្គារម្សិលមិញ នឹងគ្មានភ័ព្វសំណាងទទួលបានការអនុម័តពីព្រឹទ្ធសភាឡើយ។ ដោយហេតុថា នៅក្នុងព្រឹទ្ធសភាអាមេរិកបច្ចុប្បន្ន សមាជិកព្រឹទ្ធសភាភាគច្រើនជាអ្នកមកពីបក្សប្រជាធិបតេយ្យនឹងធ្វើការប្រឆាំង។ ហើយលោកប្រធានាធិបតីបារ៉ាក់អូបាម៉ាក៏នឹងប្រើសិទ្ធិវេតូរបស់ខ្លួនដើម្បីប្រឆាំងនឹងផែនការដ៏តឹងរ៉ឹងនេះដែរ។
ចំណែកឯកិច្ចចរចានៅតែមានបន្ត ដើម្បីឲ្យសភាយល់ព្រមអនុម័តផែនការថ្មីដែលរៀបចំឡើងដោយសមាជិកព្រឹទ្ធសភាមួយក្រុម។ ដោយបារម្ភខ្លាចពុំទទួលបានការយល់ព្រមពីសភា បានជាបក្សប្រជាធិបតេយ្យងាកមកមើល “ផែនការស្ទួន”ដែលរៀបចំឡើងដោយសមាជិកព្រឹទ្ធសភាMcConnell ដែលអាចអនុញ្ញាតឲ្យប្រធានាធិបតីអាមេរិកមានសិទ្ធិធ្វើការដំឡើងកម្រិតអតិបរមានៃប្រាក់បំណុលបានបីលើក ក្នុងកម្រិត២ ៥០០ពាន់លានដុល្លារចាប់ពីពេលនេះទៅទល់ចុងឆ្នាំ២០១២ ដោយពុំចាំបាច់សុំការគាំទ្រពីសភា។
គោលជំហររបស់សមាជិកព្រឹទ្ធសភានៃបក្សសាធារណរដ្ឋ និងសមាជិកព្រឹទ្ធសភានៃបក្សប្រជាធិបតេយ្យខុសគ្នាត្រង់ថា៖
- បក្សប្រជាធិបតេយ្យចង់បាននយោបាយកាត់បន្ថយឧនភាពថវិកាដោយពឹងផ្អែកលើការបង្កើនប្រាក់ចំណូលបានមកពីការដំឡើងពន្ធដារ។
- ផ្ទុយទៅវិញ បក្សសាធារណរដ្ឋពុំចង់ឮសោះឡើយ ការដំឡើងពន្ធដារ។ គេចង់ឲ្យមាននយោបាយកាត់បន្ថយឧនភាពថវិកាដោយពឹងផ្អែកលើកំណែទម្រង់ប្រព័ន្ធពន្ធដារទៅវិញ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ