ស្ថានភាពសេដ្ឋកិច្ចនិងហិរញ្ញវត្ថុធ្វើឲ្យវិនិយោគិនកើតមានក្តីបារម្ភ
ចុះផ្សាយនៅថ្ងៃ៖
ស្តាប់ - ០៦:២០
សហរដ្ឋអាមេរិកទើបនឹងដោះស្រាយបាននូវបញ្ហាកម្រិតអតិបរមានៃប្រាក់បំណុលរបស់ខ្លួន ក្រោយពីសភាអ្នកតំណាងនិងព្រឹទ្ធសភាបានបោះឆ្នោតគាំទ្រតាមសំណើរបស់លោកប្រធានាធិបតីអូបាម៉ា។ ក៏ប៉ុន្តែ នៅលើទីផ្សារមូលប័ត្រអន្តរជាតិទាំងនៅអឺរ៉ុបទាំងនៅអាស៊ី គេឃើញតម្លៃភាគហ៊ុននៅតែធ្លាក់ស្រុតចុះយ៉ាងខ្លាំង ដោយហេតុតែវិនិយោគិនខ្វះទំនុកចិត្តកក់ក្តៅ។
មូលហេតុដែលបានបណ្តាលឲ្យទីផ្សារមូលប័ត្រអន្តរជាតិនិងវិនិយោគិនកើតមានក្តីបារម្ភមានច្រើន៖
ទី១- ការបារម្ភពីប្រាក់បំណុលដ៏ច្រើនមហិមារបស់អាមេរិក
បរិមាណនៃប្រាក់បំណុលដ៏ច្រើនសន្ធឹកសន្ធាប់របស់សហរដ្ឋអាមេរិកគឺពិតជាមូលហេតុចម្បងនៃក្តីបារម្ភរបស់ទីផ្សារមូលប័ត្រអន្តរជាតិនិងវិនិយោគិន។ហេតុដូច្នេះហើយបានជាគេឃើញទីផ្សារមូលប័ត្រអន្តរជាតិទាំងនៅអឺរ៉ុបទាំងនៅអាស៊ីបានស្គាល់ការធ្លាក់ស្រុតចុះយ៉ាងខ្លាំងនៅប៉ុន្មានថ្ងៃចុងក្រោយនេះ។ ទោះបីជា សភាអ្នកតំណាងនិងព្រឹទ្ធសភាអាមេរិកបានបោះឆ្នោតគាំទ្រនៅពេលថ្មីៗនេះតាមសំណើរបស់លោកប្រធានាធិបតីអូបាម៉ាក្នុងការលើកកម្រិតអតិបរមានៃប្រាក់បំណុលអាមេរិកដែលមានដល់ទៅជាង១៤ ៣០០ពាន់លានដុល្លារក៏ដោយ។ ក៏ទាំងនេះ ពុំមែនបានសេចក្តីថា សហរដ្ឋអាមេរិករកដំណោះស្រាយឲ្យបញ្ហាហិរញ្ញវត្ថុនិងបញ្ហាសេដ្ឋកិច្ចរបស់ខ្លួនបានរួចរាល់ឡើយ។ វាគ្រាន់តែជាការដោះទាល់បានមួយគ្រាសិនតែប៉ុណ្ណោះ។
ទី២- ការបារម្ភទៅលើស្ថានភាពហិរញ្ញវត្ថុនៃប្រទេសអ៊ីតាលីនិងអេស្ប៉ាញ
វិនិយោគិនអន្តរជាតិក៏បានចាប់បែរចក្ខុក្រឡេកទៅមើលបញ្ហាប្រាក់បំណុលនៅអឺរ៉ុបផងដែរ ជាពិសេស ស្ថានភាពហិរញ្ញវត្ថុនៃប្រទេសអ៊ីតាលីនិងអេស្ប៉ាញ ។ នាឱកាសជំនួបកំពូលអឺរ៉ុបនៅពេលថ្មីៗកន្លងទៅនេះ អឺរ៉ុបរិះរកដំណោះស្រាយឲ្យប្រទេសអឺរ៉ុបតូចៗដូចជាប្រទេសក្រិកឬប្រទេសព័រទុយហ្កាល់បាន ក៏ប៉ុន្តែគេបារម្ភខ្លាចក្រែងសហភាពអឺរ៉ុបគ្មានសមត្ថភាពនឹងជួយដោះស្រាយវិបត្តិប្រាក់បំណុលរបស់ប្រទេសអឺរ៉ុបគ្រាក់ៗដូចជាប្រទេសអ៊ីតាលីឬប្រទេសអេស្ប៉ាញដែលអត្រាការប្រាក់បានកើនឡើងលើសពី៦%។ ទាំងនេះពិតជាធ្វើឲ្យស្ថានភាពហិរញ្ញវត្ថុនៃប្រទេសអឺរ៉ុបទាំងពីរខាងលើនេះធ្លាក់ចុះដុនដាបបន្ថែមទៀត។
ទី៣- ការចុះថយនៃល្បឿនកំណើនសេដ្ឋកិច្ចអាមេរិកាំងនិងពិភពលោក
សកម្មភាពនៃសេដ្ឋកិច្ចអាមេរិកាំងបច្ចុប្បន្នពុំទាន់មានលក្ខណៈខ្លាំងក្លាដូចកាលពីពេលមុនមានវិបត្តិសេដ្ឋកិច្ចពិភពលោកឡើយ។ ផលិតផលដុលសរុបរបស់អាមេរិកនៅត្រីមាសទីពីរឆ្នាំ២០១១នេះបានកើនឡើងត្រឹមតែ+១,៣%ប៉ុណ្ណោះ ហើយអត្រានៃអ្នកឥតការងារធ្វើនៅសហរដ្ឋអាមេរិកក៏នៅមានកម្រិតខ្ពស់ពោលគឺឋិតនៅ៩,២%។
នៅទ្វីបអាស៊ីឯណោះ គ្រោះមហន្តរាយបង្កឡើងដោយមហារលកយក្សស៊ូណាមីនិងការរញ្ជួយដីនៅប្រទេសជប៉ុនដែលបានធ្វើឲ្យប៉ះពាល់យ៉ាងខ្លាំងក្លាដល់មហាអំណាចសេដ្ឋកិច្ចទីបីពិភពលោកក៏ជាកត្តាដ៏អវិជ្ជមានសម្រាប់សន្ទុះកំណើនសេដ្ឋកិច្ចពិភពលោកផងដែរ។
ទី៤- អវសាននៃការចាក់បញ្ចូលសាច់ប្រាក់យ៉ាងច្រើនមហិមាទៅក្នុងទីផ្សារដោយធនាគារកណ្តាលអាមេរិក
ចាប់តាំងពីមានវិបត្តិសេដ្ឋកិច្ចនិងវិត្តិហិរញ្ញវត្ថុពិភពលោករហូតដល់និទាឃរដូវឆ្នាំ២០០៩ Federal Reserve ធនាគារកណ្តាលអាមេរិកបានចាក់បញ្ចូលសាច់ប្រាក់យ៉ាងច្រើនទៅក្នុងប្រព័ន្ធសេដ្ឋកិច្ចនិងហិរញ្ញវត្ថុអាមេរិកាំង។ នយោបាយរូបិយវត្ថុអាមេរិកាំងដែលបានចាក់បញ្ចូលសាច់ប្រាក់រាប់រយពាន់លានដុល្លារបានត្រូវបិទបញ្ចប់នៅចុងខែមិថុនាកន្លងទៅ។ សាច់ប្រាក់រាប់រយពាន់លានដុល្លារដែលបានមកជួយគាំទ្រតម្លៃភាគហ៊ុនអាមេរិកាំងកុំឲ្យធ្លាក់ស្រុតចុះ។
ដើម្បីដោះស្រាយបញ្ហាឧនភាពសាធារណៈនិងបញ្ហាប្រាក់បំណុលអាមេរិកាំងដ៏ច្រើនមហិមា ប៉ុន្មានម៉ោងក្រោយពីសភាទាំងពីរបោះឆ្នោតគាំទ្រអត្ថបទសម្រាប់បញ្ចៀសកុំឲ្យសហរដ្ឋអាមេរិកជួបនឹងសភាពធនក្ស័យរួចមក លោកប្រធានាធិបតីបារ៉ាក់អូបាម៉ាបានថ្លែងជំរុញនៅថ្ងៃអង្គារម្សិលមិញ ឲ្យសភាអាមេរិកងាកមកដោះស្រាយបញ្ហាសេដ្ឋកិច្ចនិងបញ្ហាបង្កើតការងារជូនប្រជាជនអាមេរិក ដែលជាប្រភពមួយដ៏សំខាន់សម្រាប់ជួយដោះស្រាយបញ្ហាហិរញ្ញវត្ថុ សេដ្ឋកិច្ច និងការងារ។ ដូច្នេះការគំរាមនៃសភាពធនក្ស័យរបស់អាមេរិកបានត្រូវបញ្ចៀសបណ្តោះអាសន្នបានមួយរយៈពេលរហូតដល់ឆ្នាំ២០១៣។
លោកអូបាម៉ាបានប្រកាសឲ្យដឹងថា សហរដ្ឋអាមេរិកត្រូវតែខិតខំឲ្យអស់ពីកម្លាំងកាយនិងកម្លាំងចិត្តដើម្បីបង្កើតការងារជូនប្រជាជនអាមេរិក ហើយនិងត្រូវធ្វើយ៉ាងណាឲ្យសេដ្ឋកិច្ចអាមេរិកាំងងើបស្ទុះលឿនទៅមុខ ដែលជាអាវុធដ៏ស័ក្តិសិទ្ធិសម្រាប់ជួយកាត់បន្ថយឧនភាពសាធារណៈ។
គួរកត់សម្គាល់ថា ទីភ្នាក់ងារវិភាគហានិភ័យប្រាក់បំណុលឈ្មោះFitch បានរក្សាទុកចំណាត់ថ្នាក់ “AAA”របស់សហរដ្ឋអាមេរិកឲ្យនៅដដែល។ រីឯ ទីភ្នាក់ងារវិភាគហានិភ័យប្រាក់បំណុលឈ្មោះMoody’s វិញ នៅថ្ងៃអង្គារម្សិលមិញបានទម្លាក់ចំណាត់ថ្នាក់ “AAA”របស់សហរដ្ឋអាមេរិកឲ្យធ្លាក់មួយកម្រិត ឲ្យមកនៅត្រឹមចំណាត់ថ្នាក់ “AAA” ភ្ជាប់មកជាមួយនូវ “ទស្សនវិស័យអវិជ្ជមាន”។
ពាក់ព័ន្ធនឹងបញ្ហាលើកកម្រិតអតិបរមានៃប្រាប់បំណុលអាមេរិក លោកស្រី Christine Lagarde អគ្គនាយកនៃមូលនិធិរូបិយវត្ថុអន្តរជាតិ FMI បានសរសើរថា ការយល់ព្រមគាំទ្រដោយសភាអាមេរិកទាំងពីរក្នុងការលើកកម្រិតអតិបរមានៃប្រាប់បំណុលអាមេរិកពិតជាដំណឹងមួយដ៏ល្អសម្រាប់ “សេដ្ឋកិច្ចអាមេរិកាំងនិងសេដ្ឋកិច្ចពិភពលោក”។ ក៏ប៉ុន្តែ ទីក្រុងវ៉ាស៊ីនតោនត្រូវខិតខំធ្វើការបន្ថែមទៀតដើម្បីសម្រេចឲ្យបានជោគជ័យក្នុងការកាត់បន្ថយឧនភាពសាធារណៈ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ