តើលោក បារ៉ាក់ អូបាម៉ា នឹងអាចប្រកបកិច្ចការអ្វីក្រោយបញ្ចប់អាណត្តិប្រធានាធិបតី?
ចុះផ្សាយនៅថ្ងៃ៖
ស្តាប់ - ០៤:១៨
ថ្ងៃសុក្រ ទី២០ មករានេះ លោក បារ៉ាក់ អូបាម៉ា នឹងចាកចេញពីសេតវិមានក្រោយពីបានកាន់កាប់តំណែងប្រធានាធិបតីអាមេរិករយៈពេល ២ អាណត្តិ។ ក្រោយពីបានរស់នៅរយៈពេល ៨ ឆ្នាំក្នុងឋានៈជាប្រមុខដឹកនាំកំពូលរបស់សហរដ្ឋអាមេរិក លោក បារ៉ាក់ អូបាម៉ា និងលោកស្រី មីស្សែល អូបាម៉ា ព្រមទាំងកូនស្រីទាំងពីរនាក់នឹងត្រលប់ទៅរស់នៅក្នុងជីវិតបែបប្រជាជនសាមញ្ញវិញ។ គិតមកដល់ពេលនេះ លោក អូបាម៉ា មិនទាន់ប្រកាសជាផ្លូវការនៅឡើយទេ អំពីអាជីពអ្វីដែលលោកត្រូវប្រកបនាពេលអានាគត។ ប៉ុន្តែ អ្នកវិភាគនយោបាយអាមេរិកបានសន្និដ្ឋានលើមុខរបរមួយចំនួន ដែលលោកប្រធានាធិបតីស្បែកខ្មៅតំបូងនេះអាចចាប់យក។
លោក អូបាម៉ា តែងចៀសវាងឆ្លើយនឹងសំណួរអ្នកសារព័ត៌មានជុំវិញអាជីពមុខរបរដែលលោកអាចនឹងចាប់យកពេលក្លាយជាប្រជាជនស៊ីវិល។ លោកធ្លាប់បានមានប្រសាសន៍ហើយថា ក្រោយថ្ងៃទី២០ មករា កិច្ចការតំបូងគេបំផុត គឺលោកនឹងចេញទៅវិស្សមកាលចំនួន ២ សប្តាហ៍។ ក្នុងកំឡុងពេលនោះ លោកគ្រោងលំហែកាយសំរាន្តលង់លក់តាមចិត្តចង់ក្រោយពីនឿយហត់នឹងកិច្ចការប្រទេសជាតិ។
នៅក្នុងខ្សែវីដេអូមួយដែលផ្សព្វផ្សាយដោយសេតវិមានលើបណ្តាញសង្គមយូធូបកាលពីខែឧសភា ឆ្នាំ២០១៦ លោក អូបាម៉ា បាននិយាយបែបកំប្លែងថា លោកចាប់អារម្មណ៍លើអាជីពជាច្រើនក្នុងនោះមានដូចជា ធ្វើជាគ្រូបង្វឹកបាល់បោះ ឬធ្វើជាអ្នកដើរឃោសនាពាណិជ្ជកម្ម។ ហើយលោកក៏ត្រូវទៅប្រឡងយកប័ណ្ណបើកបរឡើងវិញផងដែរ។ ប៉ុន្តែ បើតាមការវិភាគទូទៅពីសំណាក់អ្នកជំនាញនយោបាយអាមេរិក លោក បារ៉ាក់ អូបាម៉ា មានជំរើសច្រើនក្នុងការចាប់យកអាជីពថ្មីក្នុងឋានៈពេលជាពលរដ្ឋសាមញ្ញ។
ជាបឋម មុននឹងពិចារណាលើអាជីពនាពេលអនាគតរបស់លោក អូបាម៉ា គេត្រូវសួរថាតើលោក អូបាម៉ា និងក្រុមគ្រួសារនឹងផ្លាស់ទីលំនៅទៅរស់នៅទីក្រុងណា? សំរាប់រយៈពេលខ្លី លោក អូបាម៉ា ធ្លាប់បានប្រកាសហើយថា លោកនឹងមិនចាកចេញឆ្ងាយពីរដ្ឋធានីវ៉ាស៊ីងតោនឡើយ។ លោកគ្រោងបន្តរស់នៅរដ្ឋធានីនេះយ៉ាងហោចណាស់សំរាប់រយៈពេល ២ ឆ្នាំបន្ថែមទៀត ដើម្បីទុកឱកាសអោយកូនស្រីពៅគឺ នាង សាស្សា អាចរៀនបញ្ចប់ថ្នាក់មធ្យមសិក្សានៅវិទ្យាល័យ Sidwell Friends School។
ឆ្លៀតពេលបន្តរស់នៅរដ្ឋធានីវ៉ាស៊ីងតោន លោក អូបាម៉ា អាចនឹងចាប់អាជីពជាសាស្រ្តាចារ្យបង្រៀនផែ្នកនិតិសាស្រ្តអោយសាកលវិទ្យាល័យ Columbia។ វាគ្មានអ្វីចំឡែកទេ ព្រោះលោក អូបាម៉ា ក៏ធ្លាប់សិក្សាផែ្នកនិតិសាស្រ្តនៅសាកលវិទ្យាល័យនោះផងដែរ កាលពីកំឡុងទសវត្សរ៍ឆ្នាំ១៩៨០។ លោក អូបាម៉ា ក៏អាចនឹងចំណាយពេលសរសេរសៀវភៅរំលឹកការចងចាំ ក្នុងពេលធ្វើជាប្រធានាធិបតីដឹកនាំប្រទេស។ តាមពិតទៅ ការសរសេររំលឹកអតីតៈកាលកិច្ចការខ្លួនបែបនេះសឹងតែក្លាយជាកាតព្វកិច្ចទៅហើយសំរាប់ប្រធានាធិបតីអាមេរិកម្នាក់ៗ។ បើតាមការប៉ាន់ស្មាន ចំណូលរកបានពីការសរសេរសៀវភៅនេះស្ថិតក្នុងរង្វង់ទឹកប្រាក់ ៣០០ លានដុល្លារអាមេរិក ព្រោះលោក អូបាម៉ា ជាឥស្សរជននៅតែមានប្រជាប្រិយភាព។
ជំរើសមួយទៀត គឺលោក អូបាម៉ា ក៏អាចរកចំណូលបានផងដែរពីការឡើងថ្លែងសុន្ទរកថាតបតាមការអញ្ជើញពីស្ថាប័ននានា។ អតីតៈប្រធានាធិបតីអាមេរិក ឬឥស្សរជននយោបាយដ៏ទៃទៀតតែងចាប់យកអាជីពនេះតាមរយៈទេពកោសល្យថ្វីមាត់របស់ខ្លួន។ តួយ៉ាងដូចជាលោកអតីតៈប្រធានាធិបតី ប៊ីល ក្លីនតុន គាត់រកចំណូលបានចំនួន ២៥ ម៉ឺនដុល្លារសំរាប់សុន្ទរកថានិមួយៗ។ នៅក្នុងកិច្ចសម្ភាសន៍មួយជាមួយទស្សនាវដ្តី Rolling Stone កាលពីខែវិច្ឆិការ ឆ្នាំ២០១៦ លោក អូបាម៉ា ក៏បានពន្យល់ពីបំណង និងគំរោងមួយចំនួនសំរាប់រយៈពេលយូរអង្វែង។ លោក អូបាម៉ា ចង់បង្កើតមូលនិធិមួយ ដើម្បីបណ្តុះបណ្តាល និងជួយជ្រោមជ្រែងអ្នកដឹកនាំវ័យក្មេងជំនាន់ក្រោយ។ មូលនិធិនេះអាចធ្វើសកម្មភាពជួយអ្នកនយោបាយជំនាន់ក្រោយនៅសហរដ្ឋអាមេរិក ឬនៅតាមប្រទេសនានា ដែលចង់បណ្តុះថ្នាលលិទ្ធិប្រជាធិបតេយ្យ។
លោក អូបាម៉ា ក៏ចាប់អារម្មណ៍ផងដែរលើការពិចារណា និងការវិភាគលើប្រធានបទសំខាន់មួយ គឺការផ្សព្វផ្សាយព័ត៌មាន។ លោក អូបាម៉ា យល់ឃើញថា បណ្តាញសារព័ត៌មានកំពុងតែឆ្លងកាត់ការផ្លាស់ប្តូរមួយ។ គុណភាពនៃព័ត៌មាន ឬដំណឹងកំពុងតែត្រូវបានគំរាមកំហែងក្នុងប្រព័ន្ធអេកូថ្មីនៃបណ្តាញសារព័ត៌មានជាពិសេស គឺតាមរយៈបណ្តាញសង្គម និងការផ្សព្វផ្សាយតាមប្រព័ន្ធអ៊ីនធើណេត។ បច្ចុប្បន្ននេះ ព័ត៌មានត្រឹមត្រូវ និងព័ត៌មានកុហកបោកប្រាស់កំពុងតែចរាចរណ៍ពាសពេញបណ្តាញទាំងនេះ។ ប៉ុន្តែ លោកស្រី Jen Psaki នាយិកាទទួលបន្ទុកផែ្នកសារគមនាគមន៍របស់លោក អូបាម៉ា បានបដិសេធចំពោះពាក្យចចាមអារ៉ាមមួយដែលថាលោក អូបាម៉ា ចង់បង្កើតស្ថានីយ៍ទូរទស្សន៍ Obama TV។
ក្រៅពីរដ្ឋធានីវ៉ាស៊ីងតោន សំរាប់រយៈពេលយូរអង្វែង ក្រុមគ្រួសារលោក អូបាម៉ា ក៏អាចនឹងត្រលប់ទៅរស់នៅទីក្រុងស៊ីកាហ្គោវិញផងដែរ។ នៅទីនោះ លោក អូបាម៉ា បានសាងសង់បណ្ណាល័យប្រធានាធិបតីមួយ។ លោក អូបាម៉ា ស្គាល់ទីក្រុងនោះច្បាស់ដូចបាតដៃអញ្ចឹង ព្រោះលោកបានចំណាយពេលយុវវ័យរស់នៅអស់រយៈពេលជាច្រើនឆ្នាំ។ នៅទីនោះ លោកបានចាប់ផ្តើមការងារតំបូងក្នុងឋានៈជាអ្នកធ្វើការផែ្នកសង្គមកិច្ច។ ប៉ុន្មានឆ្នាំក្រោយមក លោកប្តូរមុខរបរធ្វើជាមេធាវី។ បន្ទាប់មកទៀត លោកបានក្លាយជាសាស្រ្តាចារ្យផែ្នកនិតិសាស្រ្ត។ ហើយចុងក្រោយ លោកបានប្រឡូកក្នុងឆាកនយោបាយមុននឹងជាប់ឆ្នោតជាសមាជិកព្រឹទ្ធសភាប្រចាំសភាក្នុងតំបន់របស់រដ្ឋអ៊ីលីណយ (Illinois)។
ហើយនៅទីក្រុងស៊ីកាហ្គោនេះផងដែរ លោក អូបាម៉ា បានជួបអនាគតភរិយា គឺលោកស្រី ម៉ីស្សែល អូបាម៉ា។ ដោយមានកូនស្រីពីរនាក់ គូស្វាមីភរិយាមួយគូនេះបានរស់នៅជាមួយគ្នានៅទីក្រុងនេះរហូតដល់ឆ្នាំ២០០៩។ ឆ្នាំដែលលោក បារ៉ាក់ អូបាម៉ា ត្រូវឡើងចូលកាន់កាប់មុខតំណែងប្រធានាធិបតីអាមេរិកជាផ្លូវការ។
សេណារីយ៉ោមួយទៀត ក្រុមគ្រួសារលោក អូបាម៉ា ក៏អាចទៅរស់នៅរដ្ឋហាវៃផងដែរ។ កូនកោះដែលជារដ្ឋនៅឯនាយសមុទ្ររបស់អាមេរិកនេះហើយជាទីកន្លែងដែលលោក អូបាម៉ា បានចាប់កំណើត។ លោកបានធំដឹងក្តីនៅទីនោះដោយបានរស់នៅក្នុងផ្ទះជាមួយជីដូនជីតា។ លោកតែងជំពាក់ចិត្តជាមួយទីកន្លែងកុមារភាពមួយនេះ។ រយៈពេល ៨ ឆ្នាំចុងក្រោយនេះ លោក អូបាម៉ា តែងចំណាយពេលរាល់ថ្ងៃវិស្សមកាលចុងឆ្នាំនៅកោះហាវ៉ៃនេះ។ ហើយកោះនេះក៏ជាទីកន្លែងស្ងប់ស្ងាត់សំរាប់គ្រួសារលោក អូបាម៉ា ក្នុងការសំរាកលំហែរកាយផងដែរ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ