អាជ្ញាធរអ៊ីតាលីរឹបអូសបានមីស៊ីលពីអ្នកគាំទ្រក្រុមស្តាំនិយមជ្រុលអ៊ីតាលី
មីស៊ីលមួយដើម ជើងទ្របាញ់មីស៊ីល ហើយនិងអាវុធ ស្វ័យប្រវត្តិជាច្រើនរយដើមផ្សេងទៀត ត្រូវបានប៉ូលិសអ៊ីតាលី រឹបអូសយកបានពីអ្នកគាំទ្រក្រុមស្តាំនិយមជ្រុល កាលពីថ្ងៃចន្ទទី ១៥ កក្កដា២០១៩ នៅ ភាគខាងជើងអ៊ីតាលី ក្បែរទៅព្រំដែនបារាំង។ តាមប៉ូលិសអ៊ីតាលី ការរឹបអូសសព្វាវុធសង្រ្គាមដ៏ច្រើនសន្ធឹកសន្ធាប់ ជារឿងដែលកម្រមាននៅអ៊ីតាលី។
ចុះផ្សាយនៅថ្ងៃ៖ កែប្រែថ្ងៃទី៖
ការស៊ើបអង្កេត លួចស្តាប់ទូរស័ព្ទរបស់ក្រុមគាំទ្រស្តាំនិយមជ្រុល នៅភាគខាងជើងអ៊ីតាលី បានអនុញ្ញាតឲ្យប៉ូលិសអ៊ីតាលី ស្រាវចាប់បានជនសង្ស័យបីនាក់ ហើយនិងរឹបអូសសព្វាវុធសង្រ្គាមជាច្រើនរយដើម កាលពីថ្ងៃចន្ទ។
ទៅតាមដីការបស់រដ្ឋអាជ្ញា ដែលស៊ើបអង្កេតទៅលើបណ្តាញអ៊ីតាលី ដែលគាំទ្រក្រុមជ្រុលនិយម នៅអ៊ុយក្រែន ប៉ូលិសបានបើកប្រតិបត្តិការវាយឆ្មក់ ចូលចាប់ខ្លួនមនុស្សបីនាក់ ដែលនៅក្នុងនោះ ១នាក់ ជាអតីតបេក្ខជនរបស់គណបក្សហ្វាស៊ីសថ្មី នៅអ៊ីតាលី។ នៅក្នុងឃ្លាំងមួយកន្លែង ដែលជាកម្មសិទ្ធិរបស់ Fabio Del Bergiolo អតីតបេក្ខជនគណបក្សហ្វាស៊ីសថ្មីអ៊ីតាលី ប៉ូលិសបានរឹបអូសបានមីស៊ីលអាកាសមួយដើម ប្រភេទ Matra Super 530F ទម្ងន់ ២៤៥គីឡូក្រាម និងផលិតដោយប្រទេសបារាំង នៅឆ្នាំ ១៩៨០។ តាមប៉ូលិស មីស៊ីលនៅដំណើរការល្អ និងជាកម្មសិទ្ធិរបស់ប្រទេសកាតា ដែលកុម្មង់ទិញ ពីបារាំង សម្រាប់បំពាក់ឲ្យកងទ័ពរបស់ខ្លួន។ តាមអ្នកជំនាញខាងមីស៊ីល ដែលទីភ្នាក់ងារ ព័ត៌មានបារាំងបានទាក់ទងសុំការព្យល់ មីស៊ីលអាកាស ដែលប៉ូលិសអ៊ីតាលីរឹបអូសបានពីជនសង្ស័យ ជាមីស៊ីល បាញ់ចេញពីយន្តហោះក្នុងចម្ងាយ ២៥គីឡូម៉ែត្រ។ ដូច្នេះ បាញ់មីស៊ីលប្រភេទនេះ ពីដី នឹងធ្វើឲ្យគេប្រឈមនឹងគ្រោះថ្នាក់ធ្ងន់បំផុត។
ក្រៅតែពីមីស៊ីលអាកាស ប៉ូលិសអ៊ីតាលី រឹបអូសបានសព្វាវុធសង្រ្គាមផ្សេងទៀត ដូចជា កាំភ្លើងស្វ័យប្រវត្តិ និងសម្ភារៈយោធាជាច្រើនរយមុខ រួមទាំងគ្រាប់បែក ជាង ៨០០គ្រាប់។ នៅក្នុងឃ្លាំងរបស់ជនសង្ស័យ ប៉ូលិសរកឃើញផងដែរ បន្ទប់បើកបររបស់យន្តហោះចម្បាំង ហើយនិងពាក្យឃោសនារបស់ក្រុមណាហ្ស៊ីថ្មី រួមទាំងស្លាកមានសរសេរឈ្មោះ ហ៊ីត្លែ។
តាមប៉ូលិស ការរឹបអូសបានអាវុធយុទ្ធភ័ណ្ឌដ៏សំខាន់លើកនេះ ជារឿងដែលកម្រមាននៅអ៊ីតាលី។ សម្រាប់ប៉ូលិសប្រឆាំងភេរវកម្ម គ្មានភស្តុតាងណាមួយ ដែលបញ្ជាក់ថា ជនសង្ស័យ ម្ចាស់សព្វាវុធខាងលើមានផែនការធ្វើវិទ្ធង្សនានោះទេ។
តាម ប៉ូលិសអ៊ីតាលី សាររបស់ជនសង្ស័យ នៅក្នុងកម្មវិធី Whatsapp ដែលប៉ូលិសបានចូលលួចតាមដានមើល មាននិយាយច្រើនតែពីការលក់មីស៊ីល ហើយនិងសព្វាវុធតែប៉ុណ្ណោះ។ តាមការចុះផ្សាយរបស់កាសែតក្នុងស្រុកអ៊ីតាលី គេជឿថា ជនសង្ស័យសង្ឃឹមលក់មីស៊ីលបានក្នុងតម្លៃ ជាង ៤៧០០០០អឺរ៉ូ។
រហូតមកដល់ពេលនេះ គេនៅតែមិនទាន់ដឹងពីប្រភព ដំណើរដើមទង ដែលធ្វើឲ្យមីស៊ីលរបស់ទ័ពអាកាសកាតា ទម្ងន់ ២៤៥ ធ្លាក់ទៅក្នុងដៃរបស់ ជនសង្ស័យដែលគាំទ្រក្រុមស្តាំនិយមជ្រុលនៅអ៊ីតាលី។ សម្រាប់ គណបក្សប្រឆាំង ដែលមកពីក្រុមកណ្តាល ឆ្វេង ប្រជាធិបតេយ្យអ៊ីតាលី វាជារឿងមិនគួរឲ្យជឿ ហើយនិងជារឿងធ្ងន់ធ្ងរ ដែលក្រុមស្តាំនិយមជ្រុលនៅអ៊ីតាលី ជួញដូរ សព្វាវុធសង្រ្គាម សូម្បីតែមីស៊ីលបាញ់លើអាកាស។ គណបក្សប្រឆាំងនៅបានទាមទារឲ្យរដ្ឋាភិបាលស្តាំនិយមជ្រុលអ៊ីតាលី ចាត់វិធានការតឹងរ៉ឹង ប្រឆាំងក្រុមស្តាំនិយមជ្រុលទៀតផង នៅពេលដែលរដ្ឋាភិបាលមកពីគណបក្សស្តាំនិយមជ្រុល នៅស្ងាត់មាត់ មិនទាន់ធ្វើអត្ថាធិប្បាយអ្វីនៅក្រោយការចាប់រឹបអូសមីស៊ីល កាលពីថ្ងៃចន្ទ៕
ព្រឹត្តិបត្រព័ត៌មានព្រឹត្តិបត្រព័ត៌មានប្រចាំថ្ងៃនឹងអាចឲ្យលោកអ្នកទទួលបាននូវព័ត៌មានសំខាន់ៗប្រចាំថ្ងៃក្នុងអ៊ីមែលរបស់លោកអ្នកផ្ទាល់៖
ចុះឈ្មោះ